Efesus 6:12 - Taaz Weru Witu u Nunuwu'en Tombulu

¹² Pahpaan ni kita i mahkoro' én zéi'kan mahsaru sé tou, taan mahsaru sé pa'opoen léwo' mahperénta wia ung kaayahan wo péléng ang kawasa a mahperénta sé roh léwo' itii. Ni kita kasii é mahkoro' mahsaru ang kawasa wana ang karimbengbengan im wia ung kaayahan kenu wo sé roh léwo' witi langit.

Efesus 6:12 Iomraidhean Croise

Matius 16:17

Ang kuan ni Yesus wia si Simon, “Mahpaa-paazla ni ko Simon oki' ni Yunus pahpaan zéi'kan si tou si kimua niitu wia ni ko, taan si Ama'-Ku si witi kasendukan.

Markus 4:19

a méyé um paharétan tumoro ung katou-touan néra wo an eenou towo ung kawa'ilanan wo ang kapaaz walina. Niitu u nimangun u Nuwu' ni Opo Empung zéi'kan siapa torona im wia ni séra, makaz u Nuwu' itii zéi'kan nimua' witu un até néra.

Lukas 13:24

Am wingkotela ni Yesus, “Mahtututu'la i muntep kumiit um pepenet pesut itii! Pahpaan ikua-Kuma wia ni kamu, lakez sé tou mahuuntep kumiit um pepenet itii taan sé zéi'kan ikauntep.

Lukas 22:53

Sekez in endo ni Aku é mahkaria-karia ni kamu witi lésaz um Walé ni Opo Empung, taan ni Aku zéi'kan pahtitionan niou. Taan in tarékano un oras niou in tumion ni Aku wo un orasna si tonaas né sétang si mahkawasa wana ang karimbengbengan ing kumawasa.”

Yohanes 12:31

In tarékan én orasnamo si Opo Empung in tumotoz ulit kaapa zéi'kan am pahwangunen né tou wia ung kaayahan kenu, in tarékan kasii si Tonaas né sétang si mahkawasa wia ung kaayahan kenu éng kalan.

Yohanes 14:30

Zéi'mo lakez un ikua-Kuma wia ni kamu pahpaan si tonaas né sétang si mahkawasa wia ung kaayahan kenu é mahéyémo. Taan ni sia én zéi'kan siapa kawasa i merénta ni Aku.

Yohanes 16:11

Wo ni Sia kasii mapata'u i si Opo Empung én timotozo ulit kaapa zéi'kan am pahwangunen né tou, pahpaan si tonaas né sétang si mahkawasa wia ung kaayahan kenu é niukumo.

Kisah Rasul-rasul 26:18

i mangun am weren néra mawula', wo ni séra zéi'mo menou-nou witu ung karimbengbengan taan menou-nou witu un ayah. Wo menou-nou zéi'mo kinawasa ni tonaas né sétang taan mahkiito um paaz ni Opo Empung. Wo pahpaan um pa'émanen néra wia ni Aku, ni séra é makailek un ampungan wana a singkéla' néra. Wo ni séra kasii é makailek um wéwéténgan im wana an tinotozo in iwéhé ni Opo Empung wia sé tou sé linenas-Na.’

Roma 8:38

Pahpaan totoz kata'uangku zozo' i nimaté kaapa i menou-nou, sé malaekat kaapa sé mahkawasa wana ang karimbengbengan, u mahmuali in tarékan kaapa u mamuali im woo sawisa,

1 Korintus 15:50

Katuari-katuari, kenu un ikuaku wia ni kamu: Un awakta in tarékan én zaha' wo lé'ona u maléwo'. Niitumo, ni kita én zéi'kan toro muntep witi Kakolanoan ni Opo Empung ing Kolano. Un awakta u maléwo' én zéi'kan toro muntep witu pahpaan im witu én zéi'kan siapa a maléwo'.

2 Korintus 11:14

An téntu én tia' ikakompo' niou, pahpaan si tonaas né sétang kangkasii é mahasa-asar sé malaekat nimahalimé un ayah.

2 Korintus 4:4

Sé tou itii zéi'kan ma'éman pahpaan ung genang néra éng kinawasapé' ni tonaas né sétang si kimawasa wia ung kaayahan kenu. Niitumo, zéi'kan kailekan néra u sena' u Nuwu' Lé'os tumoro ung kawangko'an ni Kristus si totoz masuat wo si Opo Empung.

Galatia 1:16

ni Sia nimapata'u a méikawunipé' tumoro si Oki'-Na wia ni aku wo ni aku mahwoka' u Nuwu' Lé'os tumoro si Oki'-Na itii wia sé tou zéi'kan Yahudi. In toro niitu ni aku én zéi'kan rengan i nimahaléi a sésésa né tou walina i sumawangé ni aku makatulap u Nuwu' Lé'os tumoro si Yesus itii.

Efesus 1:21

Ung kawasa ni Kristus itii é lumouspé'mé sé pemerénta, lumouspé'mé ung kawasa wia ung kaayahan, lumouspé'mé sé tonaas, lumouspé'mé sé tuang wo séi uman sé pahsigi-sigi'en, séra i menou-nou in tarékan kaapa sé mamenou-nou in tumondong.

Efesus 1:3

Loozela si Opo Empung, si Ama' ni Yesus Kristus Mahpiarata si timambéré wia ni kita péléng ang kamang witi kasendukan mengiité si Roh Lenas pahpaan nimaesa karia ni Yesus Kristus.

Efesus 2:2

In toro niitu ni kamu é menou-nou mengiit ang kinanaram né tou wia ung kaayahan, ni kamu mahtali-talinga sé roh léwo' mahkawasa witi langit, ni séramo sé roh mahkawasa witu un até né tou zéi'kan mahtali-talinga si Opo Empung.

Efesus 3:10

Wo mengiité sé jamaat, si Opo Empung in tarékan toro mapata'u ang ginenang-Na tumoro péléng ang katulapan-Na wia sé mahperénta wo sé mahkawasa witi kasendukan.

Kolose 1:13

Ni Sia si nimilotomé ni kita im witu ung kawasa ni sétang si wana ang karimbengbengan wo ni Sia kangkasii nimahwali ni kita witi tampa sumena-sena', ung Kakolanoan ni Oki'-Na si ikararaaté-Na.

Kolose 2:15

Karia si Kristus nimaté i sinalip, si Opo Empung éng kimala péléng sé roh léwo' sé mahpeperénta wo sé mahkakawasa, wo nimangun ni séra méipapaiza-izang witu u sinaru né tou lakez pahpaan ni Sia é nimuntungo im wia ni séra.

2 Timutius 2:5

Si tou kumiit um pahlolowaan én zéi'kan muntung sa sia zéi'kan mahkiit an tinotoz im witu um pahlolowaan.

Ibrani 12:1

Katuari-katuari, péléng sé tou ma'éman sé menou-nou im puuna itii é limiklik ni kita tanu u ninahak. Karia ung katou-touan néra i ma'éman wia si Opo Empung u méipapailek néra wia ni kita, toro maéndo kékéréan wia ni kita i menté' um pa'émanenta. Niitumo, itula'umola péléng am mahwutez wo a singkéla' u mengapé-ngapé' ni kita, tanu i mahtututu' im wana am pahlolowaan u léwo'zéi' ing kiitenta.

Ibrani 12:4

Pahpaan ni kamu i mahtututu' mahsaru a singkéla', ni kamu én zéi'kampé' méikaayoma witu u nimazézéha akaz nimaté simaroi un zaha'.

1 Petrus 3:22

In tarékan si Yesus Kristus é nimangémo witi kasendukan a rumumezla witu u rurumezan totoz pahsigi'en witu ung kakan ni Opo Empung. Wo péléng sé malaekat, péléng sé mahkawasa wo péléng ang kaketezan ém witumo ung kawasa ni Yesus Kristus.