Efesus 6:11 - Taaz Weru Witu u Nunuwu'en Tombulu

¹¹ Tanu sé suraro nimaké am pemamakén ing kumoro' i sumaru sé kakoro' néra, téntu kangkasii ni kamu é léwo'zéi' i maké péléng ang kakaraien ing kumoro' a méiwéhémé ni Opo Empung wo kamu makawawa i mahsaru ang genang léwo' ni tonaas né sétang.

Efesus 6:11 Iomraidhean Croise

Markus 13:22

Pahpaan sé mahwangu-wangun Mesias wo sé mahwangu-wangun nabi é méyé. Ni séra é mémangun a makakompo'en wo an zéi'kan kakuaan i lumulu sé tou. Wo sa toro kangkasii, sé tou pinéléngo ni Opo Empung én ipahlulu néra.

Roma 13:12

Un orasta i menou-nou wia ung kaayahan én tawimo maapu masuat wo um wengi i maendomo. Un endo si Mahpiara i méyé én zéi'mo uré. Niitumo, kumana'mola i mahwangun a léwo'an tanu am pemangu-mangunen né tou menou-nou wana ang karimbengbengan. Tanu sé suraro nimimeko ang kokoro' i masumaru sé kakoro', ni kita kangkasii é léwo'zéi' i mahwangunla an toro sumawang ni kita i sumaru a léwo'an.

Roma 13:14

Taan méyémo kita maéndo tanu si Yesus Kristus Mahpiara, wo pahilekené né tou am pahwangunenta. Karia in téntu, ni séra én tanu nimilek ni Sia witu un touta. Wo tia'mo megena-genang uman ing kumiit a lelo léwo' un awakmu in esa.

1 Korintus 10:13

Ni kamu ém pahwa'wa'en karia am pema'wa'en ang kinanaram im pahpendanen né tou, un toro pengalin niou. Pahpaan si Opo Empung zéi'kan maliuz wana a méitaaz-Na, niitumo zéi'kan iwaya-Na ni kamu im pema'wa'en karia am pema'wa'en an zéi'kan kawawaan niou. Sekez kamu i mahsaru am pema'wa'en, si Opo Empung é méhé lalan wia ni kamu makaz ni kamu makawawa i mahsaru am pema'wa'en itii.

2 Korintus 10:4

Pahpaan an ipahkoro' nai i mahsaru sé kakoro' én zéi'kan wia ung kaayahan a méyé, taan an ipahkoro' nai ém wia si Opo Empung a méyé karia ung kawasa-Na, un toro kumemu an tampa totoz enté' winangun né kakoro'.

2 Korintus 11:3

Taan ikaindé'ku én taa ung genang niou é méilulu makaz kamu zéi'mo uli-ulit mahkiit si Kristus, tanu si Hawa im puuna i méilulula ni ulé' karia ung kasigaanna i mahtowo.

2 Korintus 2:11

Winangunku téntu, wo kita zéi'kan towoan ni tonaas né sétang, pahpaan kata'uanta ung ginenangna.

2 Korintus 4:4

Sé tou itii zéi'kan ma'éman pahpaan ung genang néra éng kinawasapé' ni tonaas né sétang si kimawasa wia ung kaayahan kenu. Niitumo, zéi'kan kailekan néra u sena' u Nuwu' Lé'os tumoro ung kawangko'an ni Kristus si totoz masuat wo si Opo Empung.

2 Korintus 6:7

Ni kai é mahtuzu' uman an ulit karia ung kawasa ni Opo Empung. Un ulit pahwangunen nai niitu masuat wo u nimaéndo ipahkoro' i mahsaru sé tou kaapa ing kumelung un tou nai.

Efesus 4:14

Karia in téntu ni kita én zéi'mo tanu sé koki' sé mahkii-kiit uman an tutuzu' nimahwali-walinaan né menunuzu' towo. Niitu én tanumokan u sempa' pemolé-moléi u reges. Ni séra mahlululu uman karia an towo néra.

Efesus 4:24

Menou-noula karia ung katou-touan weru u méikiit um paaz ni Opo Empung, ung katou-touan ulit wo linenas ni Opo Empung.

Efesus 6:13

Niitumo, pakapakéla ang karai pemamakén i makumoro' a méiwéhémé ni Opo Empung, wo kamu makawawa i mahsaru sé kakoro' in endo a léwo'an i mamuali, wo i simampetoma um pahkoro'an itii, ni kamu én enté'pé'.

Kolose 3:10

Ni kamu in tarékan é nimakaileko ung katou-touan weru wo zéi'kan mazéi' im pahwerun ni Opo Empung si nimanguné ni kamu wo ni kamu maéndo tanu ni Sia. Karia in téntu ni kamu é mata'u ni Sia makauli-ulit.

1 Tesalonika 5:8

Taan ni kita sé menou-nou in endo é léwo'zéi' tuméga-tégam. Wangunela um pa'émanenta wia si Yesus wo u raraatéanta wia sé katuari esa pa'émanen maéndo tanu ung karai uaséi ing kimelung um wezwezta wo um pahéré'anta i ni kita én ipilot im witu un ukuman wana a singkéla', maéndo tanu um porong ing kumelung un ulu.

Ibrani 7:25

Niitumo ni Sia én uli-ulit makawawa i milot péléng sé tou im witu un ukuman wana a singkéla', sé méyé wia si Opo Empung mengiité ni Sia. Pahpaan ni Sia menou-nou makaz ing kauré-uré wo ni Sia zéi'kan mazéi' i mahmengaléi ni séra wia si Opo Empung.

Yakobus 4:7

Niitumo, iwéhéla un tou niou wo kumiitla si Opo Empung, sarula si tonaas né sétang, wo sia tumingkasé im wia ni kamu.

1 Petrus 5:8

Ni kamu é léwo'zéi' i mile-ilek wo tuméga-tégam! Pahpaan si tonaas né sétang si kakoro' niou itii é melili-liklik menéro tou ing kalan, masuat wo si singa melili-liklik i menéro tou in tongko'en.

Yudas 1:24

Wia ni Sia si mahkawasa si mahtéiz wia ni kamu én taa kamu ikasundui, wo si nimahwali ni kamu sé zéi'kan siapa um pahséro'an karia i mahpaa-paaz i marumendai sumaru witu un tampa-Na um pahloozen wo pahsigi'en.

Wahyu 12:9

Si naga tua'na itii é si ulé' tu'a, si pahkuan kangkasii in tonaas né sétang kaapa si sétang mahlulu sé tou. Ni siamo si limulu péléng sé tou wia ung kaayahan wo ni sia kasii méilombo'mé wia ung kaayahan karia né malaekatna.

Wahyu 19:20

A si binatang makaindé'en karia si nabi towo itii kationala. Si nabi towo itii é si nimahwangunola a makakompo'en witu u sinaru ni binatang itii karia ung kawasa méiwéhénamé. Karia a makakompo'en itii, méipahlulunamé sé tou nimakaileko un tanda ni binatang itii wo nimahongkot wo nimahsigi'mola si patongna. Si binatang makaindé'en wo si nabi towo itii é menou-noupé' an ilombo'ma witu un tasik api wo walélang melaya-layas.

Wahyu 2:24

Taan wia ni kamu sé tou walina witi Tiatira, sé zéi'kan mahkiit an tutuzu' ni Izebel wo soo mahtata'u an tutuzu' ni tonaas né sétang, ni Aku éng kumuama: Wia ni kamu én zéi'mo awesang-Ku am pengalin walina.