Efesus 4:12 - Taaz Weru Witu u Nunuwu'en Tombulu

¹² Si Kristus timambér wia ni séra u makawawa i maayang wia sé tou linenas ni Opo Empung, wo séra makawawa i maayang wia si Opo Empung wo toro mahsawa-sawangan i mahenté' um pa'émanen néra in awak ni Kristus,

Efesus 4:12 Iomraidhean Croise

Lukas 22:32

Taan ni Aku é nimengaléio ni ko wo um pa'émanennu zéi'kan mazéi'. Wo sa ko mawurimomé sumaup wia ni Aku, ni ko é léwo'zéi' i menté' um pa'émanen né katuarimu.”

Kisah Rasul-rasul 1:17

Im puuna si Yudas itii én esaané wia ni kita wo kapaayangta.”

Kisah Rasul-rasul 1:25

Si tou itiimo si masumawel um paayangen ni Yudas i maéndo aatu ni Yesus. Pahpaan si Yudas é nimatémo wo nimangémo witu un tampa um wangun im wia ni sia.”

Kisah Rasul-rasul 11:23

I si Barnabas méikaayomola witu, an ilekennala kura si Opo Empung in timambér ung kamang wia ni séra, ni sia én totoz mahpaa-paaz. A séra sésaanala in zéi'kan toro mazéi' i ma'éman wia si Yesus Mahpiara.

Kisah Rasul-rasul 20:24

Taan ni aku én zéi'kan mahwéhé genang witu ung katou-touangku kenu, asal uman um paayangen méiwéhé ni Yesus Mahpiara wia ni aku én toro ipakasampetku i mahwoka' u Nuwu' Lé'os tumoro si Yesus u méitambéré ni Opo Empung.

Kisah Rasul-rasul 20:28

Niitumo, mile-ilek wo pahilekela péléng sé jamaat. Pahpaan ni kamumo sé tinotoz ni Roh Lenas in tumatér sé jamaat ni Opo Empung i miara ni séra. Ni séra nimaéndo jamaat-Na pahpaan ni séra ém winaér-Namo karia un zaha' ni Oki'-Na.

Kisah Rasul-rasul 9:31

Kumawusa niitu, péléng sé jamaat witi Yudea, Galilea wo Samaria é mahlé'o-lé'osan. Pahpaan u sasawang ni Roh Lenas, um pa'émanen néra éng kaenté'namo, maindé' wia si Opo Empung wo ni séra kangkasii éng kalakeznamo.

Roma 12:5

Téntu kangkasii ni kita, zozo' i lakez taan ni kita ém pina'esamo witu un awak esa wia si Kristus wo si esa wo si esa é mahpapandungan.

Roma 12:7

Sa un tatambér ni Opo Empung é mahsawang sé tou walina, wangunenola niitu uli-ulit i sumawang sé tou walina; sa un tatambér ni Opo Empung é mahtuzu', wangunenola niitu in uli-ulit mahtuzu'.

Roma 14:19

Niitumo, mahtututu'mola i menéro a mahalimé u mahlé'o-lé'osan wo a mahenté' am pa'émanen né tou esa pa'émanen.

Roma 15:14

Katuari-katuariku, kata'uangku i ni kamu é mawuta-wutamo karia am wangun wo péléng ang kata'uan wo makawawa i sumésa wia si esa wo si esa.

Roma 15:2

Si esa wo si esa im wia ni kita é léwo'zéi' mahtututu' i menéro u mahpaa-paaz ni kasuat tou i mangun ung kawangunanna, wo kaenté'na um pa'émanen néra.

Roma 15:29

Wo kata'uangku sa ni aku méyé wia ni kamu, ni aku é mahalima malake-lakez ung kamang ni Kristus wia ni kamu.

1 Korintus 12:27

Ni kamu péléng i ma'éman é masuat karia un awak ni Kristus. Pahpaan ni kamu, si esa wo si esa én tanu u lengen, u lunteng, un a'é kaapa um weren im witu un awak ni Kristus.

1 Korintus 12:7

Ung kawangunanta péléng, wia si esa wo si esa ém winéhan un tatambér ni Roh Lenas.

1 Korintus 14:12

Téntu kangkasii ni kamu, mahtututu'la i makailek an tatambér ni Roh Lenas. Lumouspé'mé niitu, pahtututu'enla wo u méitambér ni Roh Lenas wia ni kamu itii én toro mahenté' um pa'émanen né jamaat.

1 Korintus 14:14

Pahpaan sa ni aku mengaléi karia u nunuwu'en un akaz uman si Roh Lenas si mata'u, si rohku uman si mengaléi zéi'kan karia ung genangku.

1 Korintus 14:26

Katuari-katuari, kura in tarékan? Sa kamu nimaréwok i mahragés, um wangun si esa wo si esa é méndola katoroan tanu ang kenu: wéwéhan sé mahkantar ang kakantaren mahlooz si Opo Empung, wéwéhan sé mahtuzu', wéwéhan sé mahkua ung kalakoan tumoro u méiwunipé' ni Opo Empung, wéwéhan sé mahnuwu' karia u nunuwu'en un akaz uman si Roh Lenas si mata'u wo sé walina é mahkua ung kalakoan u nunuwu'en itii. Taan péléng niana é léwo'zéi' mahenté' um pa'émanen né tou.

2 Korintus 12:19

Kaa kamu ém woo mahgenangla péléng am pinantik nai kenu é mahuulit un tou nai? Zéi'kan ndootuu! Katuari-katuari ikararaatéku, a mémoipahkua nai wia ni kamu én ulit im witu u sinaru ni Opo Empung. Ni kai i mahkua téntu pahpaan ni kai é mahkiit um paaz ni Yesus Kristus. Wo péléng a méipahkua nai wia ni kamu é maheenté' um pa'émanen niou.

2 Korintus 13:11

Ung kamurian, katuari-katuari, ni kamu mahpaa-paazla, mahtututu'la wo péléng am pemangu-mangunen niou malekep. Pahwéhanla genang péléng a méisésaku wia ni kamu. Ni kamu én esa genang wo péléng mahlé'o-lé'osan. Si Opo Empung si mahtambéré ung kamang wo ung kaluasan witu un até é menaté-natér ni kamu.

2 Korintus 13:9

Ni kai é mahpaa-paaz sa ni kamu enté' wo ni kai zéi'kan enté'. Ni kai mengaléi wia si Opo Empung wo um pa'émanen niou malekep.

2 Korintus 3:8

tantumo u lumouspé'mé niitu é ung kawangko'an um pinataazan weru um pahpaayangen ni Roh Lenas u mahwali ni kita i maéndo ulit.

2 Korintus 4:1

Pahpaan u raraatéan ni Opo Empung, ni kai én toro maéndo tou i maayang a méiatu-Na. Niitumo, makaz in tarékan ni kai én zéi'kan mazéi' i mahéré'.

2 Korintus 5:18

Péléng ang kenu ém winangun ni Opo Empung. Winangun-Na kita toro mawurian sumaup karia-Na witu um pinaayang ni Kristus. Ni kai kasii ém winéhan-Na um paayangen i mahwoka' u Nuwu' Lé'os tumoro si Yesus wia sé tou makaz séra ma'éman wo mawurian sumaup karia-Na.

2 Korintus 6:3

Ni kai mahtututu' i mahpaayang uman am wangun, wo am pahpaayangen nai zéi'kan maéndo tanu watu pahkasangkilan né tou, wo zéi'kan siapa si mapahsasala' am pinaayang nai.

2 Korintus 7:1

Katuari-katuari ikararaatéku. Ni kita é nimakaileko a méitaaz ni Opo Empung. Niitumo, kumana'mola i memua-muali a singkéla', u mahwangun un tou wo si rohta makati'tiren. Ni kita é mahsigi'la wo maindé'la wia si Opo Empung wo péléng ung katou-touanta u linenas-Na é malekep.

Efesus 1:23

Sé jamaat én awak ni Kristus. Si Kristus nimangun sé jamaat-Na nimalekep im wana péléng am péléng.

Efesus 4:16

Sé jamaat én tanu un awak, ni Siamo si nimimek un awak akaz nimatu'tul wangun, wo un esa wo un esa ém pinasondol karia am wuku. Wo un esa wo un esa wéténgna un awak mahpaayang wangun mengiit um paayangenna, péléng un awak é matua'na wo malutu' wo maenté' pahpaan i mahraa-raatéan tanu ni kita in jamaat maenté' pahpaan i mahraa-raatéan.

Efesus 4:29

Tia'mo a nunuwu'en saparuni mahondolé im witu u sumahmu. Taan mahnuwu' umané am wangun i sumawang sé tou walina i ni séra memandung a sasawang, wo sé tou timalingama u méipahnuwu'muma é makailek ung kamang.

Efesus 4:4

Ni kamu é nimaéndomo tanu esa awak, esa Roh wo esa pahéré'an i mangun um paaz ni Opo Empung i ni Sia timawah ni kamu.

Kolose 1:24

In tarékan, ni aku é mahpaa-paaz i nimazéha pahpaan nimapata'u u Nuwu' Lé'os tumoro si Yesus wia ni kamu wo pahpaan mahpaayang wia si Kristus i lumekep un zéha-Na wia sé jamaat sé tanumokan un awak-Na.

Kolose 1:28

Si Kristus itiimo si ipahwoka' nai wia si esa wo si esa, i ni kai mahsésa wo mahtuzu' ni séra karia ung katulapan u méiwéhémé ni Opo Empung, i mangun péléng sé tou uli-ulit ma'éman wia si Kristus.

Kolose 4:17

Wo ikuapé'la wia si Arkhipus: Wéhanla genang, ipakasampetla am paayangen méiwéhémé ni Mahpiara wia ni ko.

1 Timutius 1:12

Ni aku kumua u makasé wia si Kristus Yesus Mahpiarata, pahpaan ni Sia si nimenté' ni aku i maayang wia ni Sia wo ni aku ém pahgenangen-Nala wangun i maayang um paayangen itii, wo ni Sia niméhé um paayangen wia ni aku i maayang wia ni Sia.

2 Timutius 4:11

Akazokan si Lukas si mahento' kariaku. Niitumo, sungkulena si Markus wo iwalimé wia'i, pahpaan ni sia én totoz pemandungengku i sumawang ni aku wana am paayangengku.

2 Timutius 4:5

Zozo' in téntu, ni ko é léwo'zéi' i mahime-imek un toumu wo ezen im wana an zézéha, ipahwoka'la u Nuwu' Lé'os, wo paayangela a léwo'zéi' im paayangennu wia si Opo Empung.

Ibrani 13:17

Pahtali-talingala sé tonaas niou wo mahkii-kiitla ni séra, pahpaan si Opo Empung si niméhé um paayangen wia ni séra in tuméiz um pa'émanen niou in tou mahwangun a méiatu ni Opo Empung. Karia in téntu, ni séra i mahtéiz um pa'émanen niou éng karia i mahpaa-paaz, zéi'kan karia i mema'o-ma'os. Pahpaan sa séra mema'o-ma'os, um pahpaayangen néra én zéi'kan siapa torona im wia ni kamu.

Ibrani 6:1

Niitumo, méyémo kita méra i mahtata'u an tutuzu' a lumouspé'mé an tutuzu' kataré-taré u nimaéndo to'tolan tumoro um pa'émanen wia si Kristus, wo um pa'émanenta éng kalutu'na. Tia'mo mawuri sumaup wana an tutuzu' kataré-taré tumoro un tumula'ula am pemangu-mangunen an zéi'kan siapa torona wo kasii an tutuzu' tumoro kura i ma'éman si Opo Empung.