Efesus 3:6 - Taaz Weru Witu u Nunuwu'en Tombulu

⁶ Ung kenu u méikawunipé' itii: Péléng sé tou ma'éman u Nuwu' Lé'os tumoro si Kristus Yesus, ni séra in tou Yahudi kaapa zéi'kan tou Yahudi é makailek um wéwéténgan im wana a méitaaz ni Opo Empung wia sé tou-Na. Ni kita péléng é maéndo esa awak wo makailek u mémoitaaz ni Opo Empung wia sé nimaesa karia ni Kristus Yesus.

Efesus 3:6 Iomraidhean Croise

1 Korintus 12:12

Witu un awak ni tou ém wéwéhan un a'é, u lengen wo am walina, taan un awak itii én esa uman. Zozo' um witu un awak é lakez, taan un awak én esa uman. Téntu kangkasii ni kita i ma'éman, zozo'pé' ni kita é lakez, taan ni kita én esa wia si Kristus.

1 Korintus 12:27

Ni kamu péléng i ma'éman é masuat karia un awak ni Kristus. Pahpaan ni kamu, si esa wo si esa én tanu u lengen, u lunteng, un a'é kaapa um weren im witu un awak ni Kristus.

Galatia 3:14

Si Yesus Kristus nimanguno niitu, wo sé tou zéi'kan Yahudi é makailek ung kamang mémoitaaz ni Opo Empung wia si Abraham pahpaan ni séra nimaesa karia ni Kristus. Karia in téntu mengiité um pa'émanen wia si Kristus ni kita makailek si Roh ni Opo Empung si mémoitaaz-Na itii.

Galatia 5:24

Séi uman sé toumo ni Kristus Yesus, ni sia én zéi'mo mahkiit u lelo un awak i mahwangun a léwo' wo ung genang i mangun a léwo'an. Ni sia é simalipo péléng a lelo un awak i mahwangun a léwo' wo um paaz i mangun a léwo'an.

Efesus 3:3

Si Opo Empung é nimapata'umo wia ni aku ang ginenang-Na a méikawunipé', tanu a méipantikumo witu um pinantikku potot kenu.

Efesus 5:30

Ni Sia nimiara wo nimurus ni kita pahpaan ni kita é méikauntep awak-Na.

Efesus 5:7

Niitumo, tia' kamu mahkari-karia i mahwangun am pahwangunen néra.

Kolose 2:19

Ni séra kangkasii én zéi'mo mahkiit un tutuzu' ni Kristus si tanu ulu im witu un awak, wo un awak é sé tou-Na. Am witu un awak itii ém pahtu'tul-Na wo péléng nimaesa, tanu sé tou-Na in zéi'kan mata'u matampasan. Karia in téntu, kuramo un awak mahtu'amé mengiit ung kapaaz ni Opo Empung, téntumo um pa'émanen niou im wia si Opo Empung éng kaenté'na.

1 Yohanes 1:3

A niilek wo an tinalinga naimo itii én iwoka' nai kasiima wia ni kamu, wo kamu toro maesa karia nai. Wo um pahesa-esaanta ém pahesa-esaan karia ni Ama' wo karia ni Oki'-Na, si Yesus Kristus.

1 Yohanes 2:25

Ang kenumo a mémoitaaz-Na in esa wia ni kita, niitu éng katou-touan makaz ing kauré-uré.