Efesus 3:3 - Taaz Weru Witu u Nunuwu'en Tombulu

³ Si Opo Empung é nimapata'umo wia ni aku ang ginenang-Na a méikawunipé', tanu a méipantikumo witu um pinantikku potot kenu.

Efesus 3:3 Iomraidhean Croise

Kisah Rasul-rasul 22:17

A ni aku mawurima sumaup witi Yerusalem. Karegas ni aku i mengaléi witi Walé ni Opo Empung si rohku éng kinawasa ni Roh ni Opo Empung.

Kisah Rasul-rasul 22:21

Taan kuan ni Tuang wia ni aku, ‘Mangémo, pahpaan ni ko én iatu-Ku i mangé witi tampa zou'ma im wia'i wia sé tou zéi'kan Yahudi.’ ”

Kisah Rasul-rasul 23:9

A séra mahzéi-zéi'an makaz i nimarikoka'ma. Sé woopira tou tulap un Torat im wia sé sana réwok tou Farisi é nimangé witi puuna a mahkelung si Paulus kuan néra, “Sa ikiit ni kai, si tou kenu én zéi'kan siapa sinala'! Séi si mata'u sa wéwéhan si roh kaapa malaekat nimuwu'moma wia ni sia.”

Roma 11:25

Katuari-katuari, tia' kamu mahgenangla i ni kamu é mata'umo péléng am péléng. Kapaazku ni kamu é mata'uma un ipahwuni-wunipé' kenu: lakez im wia sé tou Israel én tampezéi' taan niitu é mamuali uman akaz sé tou zéi'kan Yahudi sé ma'éman si Opo Empung lekepo.

Roma 16:25

U sigi' wo looz wia si Opo Empung! Ni Sia ém wéwéhan kawasa i menté' um pa'émanen niou mengiit u Nuwu' Lé'os tumoro si Yesus Kristus u méipahwoka'ku mengiit u méipapailek ni Opo Empung, u rengan ing kataré-taré méikawuni im wia sé tou.

2 Korintus 12:1

Ni aku én totoz mahlooz un touku, zozo' ing kata'uangkumo u mahlooz itii én zéi'kan siapa torona. Taan, ni aku éng kumua wia ni kamu a méipapailek ni Opo Empung wia ni aku wo a méipapata'u-Na wia ni aku.

Galatia 1:12

U Nuwu' Lé'os tumoro si Yesus itii én zéi'kan kinailekangku wia sé tou wo zéi'kan sé tou sé timuzu' niitu wia ni aku, taan si Yesus Kristus in esa si nimapata'u a méikawunipé' itii wia ni aku.

Efesus 1:17

Ni aku mahaléi wia si Opo Empung si Ama' ni Yesus Kristus Mahpiarata, si pahloozen wo pahsigi'en itii i méhémé wia ni kamu si Roh-Na, si nimangun ni kamu matulap wo si Roh si matumuzu' tumoro si Opo Empung, wo ni kamu karia in ulit mata'u tumoro ni Sia.

Efesus 3:4

Um pinantik kenu im baca nioua én toro kata'uan niou ung kinatulapangkumola u méikawunipé' tumoro si Kristus,

Efesus 3:6

Ung kenu u méikawunipé' itii: Péléng sé tou ma'éman u Nuwu' Lé'os tumoro si Kristus Yesus, ni séra in tou Yahudi kaapa zéi'kan tou Yahudi é makailek um wéwéténgan im wana a méitaaz ni Opo Empung wia sé tou-Na. Ni kita péléng é maéndo esa awak wo makailek u mémoitaaz ni Opo Empung wia sé nimaesa karia ni Kristus Yesus.

Efesus 3:9

Ni aku kasii én tinambéran ung kamang i mapata'u wia péléng sé tou ung ginenang ni Opo Empung u méikawunipé' itii. Pahpaan ung ginenang itii é méiwuni ni Opo Empung rengan ung kaayahan im winangun-Na, si nimangun péléng am péléng.

Efesus 6:19

Ipengaléipé' kasiimé ni aku wo ni aku i mahnuwu' wia sé tou, si Opo Empung é mahwéhémé u nunuwu'en ulit wia ni aku, wo zéi'kan maindé' i mahwoka' u Nuwu' Lé'os tumoro si Yesus a méikawunipé' im wia ni séra.

Kolose 2:2

Ni aku nimangun un téntu wo un até néra én toro maenté' wo mahesa-esaan pahpaan i mahraa-raatéan. Karia in téntu, ni séra péléng én uli-ulit makatulap wo totoz mata'ula un im puuna zéi'kampé' méipapata'u ni Opo Empung. Un zéi'kampé' méipapata'u itii é si Kristus in esa.

Kolose 4:3

Ipahpengaléipé' kasiimé kai, wo si Opo Empung mukamé lalan wia ni kai i mangé mahwoka', wo kai toro makumua u méikawunipé' tumoro si Kristus. Pahpaano i mahwoka' niitu, ni aku in tarékan ém wiapé' um bui.

Ibrani 13:22

Katuari-katuari, ni aku é sumésama wia ni kamu, zozo' um pinantikku kenu ém potot uman. Mengalé-ngaléi uman ni kamu é sumungkul um pinantik kenu karia i mahpaa-paaz.

1 Petrus 5:12

Karia im pinahsawangala ni Silas, ni aku nimantika um pinantik potot uman kenu. Totoz kata'uangku i si Silas kenu éng katuariku esa pa'émanen wo ni sia én toro pahtali-talingan. Um pinantik kenu ém pinantikku wo iwéhékuma i sumésama wo totoz mapagenanga wia ni kamu sa niia én uli-ulit kamang méitambér um wia si Opo Empung a méyé. Totoz in enté'ela um pa'émanen niou im wana ang kamang méitambér ni Opo Empung itii.

2 Petrus 3:15

Genangenola ung kaezenan ni Mahpiarata én témpo niou in ipilot im witu un ukuman wana a singkéla'. Ang kenu é masuat wo u méipantik ni Paulus an iwéhé wia ni kamu pahpaan ang katulapanna a méitambéré ni Opo Empung wia ni sia. Ni sia éng katuarita esa pa'émanen wo ikararaatéta.