Efesus 2:16 - Taaz Weru Witu u Nunuwu'en Tombulu

¹⁶ Karia ni Sia nimaté witu u salip, ni Sia nimangun sé tou Yahudi karia né tou zéi'kan Yahudi nimaesaan wo mahlé'o-lé'osan karia ni Opo Empung. Karia in téntu ni séra én zéi'mo makahkoro'.

Efesus 2:16 Iomraidhean Croise

Roma 5:10

I ni kita makahkoro'pé' karia ni Opo Empung, a si Oki'-Na nimaté pahpaan ni kita akaz ni kita nimawurian sumaup karia ni Opo Empung. Woopé' kasii in tarékan. Sa kita nimawuriano sumaup karia ni Opo Empung, tantumo ni kita én ipiloté im witu un ukuman wana a singkéla', pahpaan ni Sia é mémoitoumé sumaup ni Opo Empung.

Roma 6:6

Kata'uanta sa ung katou-touanta im puuna é sinalipo pinahwali-wali karia ni Kristus, wo ni kita zéi'mo kinawasa ung kinanaram i mahsingkéla', wo ni kita zéi'kan pahata-atan a singkéla'.

Roma 8:3

An zéi'kan kawawaan im wangunen witu un ukum Torat pahpaan ni kita én tou zéi'kan enté' ém winanguno ni Opo Empung. Ni Sia é nimatumé si Oki'-Na in esa in tou uman tanumokan si tou simingkéla', in zuméi' a singkéla' wo méhé ukuman wana a singkéla' witu un awakta.

Roma 8:7

Si tou mahgenang um paaz un awakna in esa é makahkoro wo si Opo Empung. Pahpaan si tou itii én zéi'kan mahtali-talinga an tinotoz-Na wo ni sia én zéi'kan mamuali i mahtali-talinga an tinotoz-Na.

1 Korintus 10:17

Zozo' ni kita lakez wo u roti én esa uman, ni kita sé kiman u roti itii é nimaéndomola esa awak.

Galatia 2:20

In tarékan, zéi'mo ni aku si menou-nou taan si Kristus si menou-nou wo mahkawasa witu ung katou-touangku. Witu ung katou-touangku wia ung kaayahan in tarékan kangkasii, ni aku é menou-nou witu um pa'émanengku wia si Oki' ni Opo Empung, si totoz rimaraatémo ni aku wo niméhémo un tou-Na in esa wia ni aku.

Efesus 2:15

Pahpaan, karia ni Sia nimaté witu u salip, ni Sia nimangun un ukum Torat karia péléng an tinotoz wo am perénta witu zinéi'mo. Wo sé tou Yahudi karia né tou zéi'kan Yahudi maéndo tou wineru sé nimaesa im wia si Kristus wo karia um patéan-Na itii, si Kristus nimangun ni séra toro mahlé'o-lé'osan.

Efesus 3:6

Ung kenu u méikawunipé' itii: Péléng sé tou ma'éman u Nuwu' Lé'os tumoro si Kristus Yesus, ni séra in tou Yahudi kaapa zéi'kan tou Yahudi é makailek um wéwéténgan im wana a méitaaz ni Opo Empung wia sé tou-Na. Ni kita péléng é maéndo esa awak wo makailek u mémoitaaz ni Opo Empung wia sé nimaesa karia ni Kristus Yesus.

Efesus 4:4

Ni kamu é nimaéndomo tanu esa awak, esa Roh wo esa pahéré'an i mangun um paaz ni Opo Empung i ni Sia timawah ni kamu.

Kolose 2:14

wo ziméi'la an utang mémoikapantik a léwo'zéi' im waérenta, a mahindé' wo mukum ni kita pahpaan zéi'kan kawawaanta i maér. Si Opo Empung ziméi'la an utangta i nimakula um pinantikan an utangta itii witu u salip.

Kolose 3:15

Wangunela ung kaluasan witu un até u méiwéhémé ni Kristus mahkawasa wia ni kamu, pahpaan ni kamu én tinawahmo ni Opo Empung i maéndo esa awak. Wo ni kamu é léwo'zéi' i mahkuala u makasé wia ni Sia.