1 Yohanes 5:9 - Taaz Weru Witu u Nunuwu'en Tombulu

⁹ Ni kita én timalinga an ipahkua ni tou tumoro a niilekna, taan an ipahkuapé' ni Opo Empung tumoro ang kata'uan-Na un enté'. Pahpaan ung kenumo un ipahkua ni Opo Empung tumoro ung kata'uan-Na, i ni Sia mahkua ung kata'uan-Na tumoro si Oki'-Na.

1 Yohanes 5:9 Iomraidhean Croise

Matius 17:5

Taan i si Petrus karegaspé' mahnuwu', kumompo'mé an tumumpamé u ninahak mahsena' ang kumungkunga wia ni séra. Im witu un untep u ninahak itii tinalingamé u nuwu' kimuamé, “Si Kenumo si Oki'-Ku si ikararaaté-Ku, ni Sia si mahwangun un até-Ku mahpaa-paaz, pahtalingala Sia.”

Yohanes 10:38

Taan sa ni Aku nimangun niitu wo ni kamu soo ma'éman wia ni Aku, pa'émanenola am pinaayang-Ku itii, wo ni kamu toro mata'u wo makatulap i si Ama' é nimaesa karia-Ku wo ni Aku é nimaesa karia si Ama'.”

Yohanes 5:39

Ni kamu sekezé é mahtata'u um Pinantik Lenas pahpaan ni kamu mahgenangla im witu ni kamu toro mata'umé kura i makailek ung katou-touan makaz ing kauré-uré. Zozo' in téntu, witu um Pinantik Lenas itii én tumuzu'mé tumoro ni Aku.

Kisah Rasul-rasul 17:31

Niimek-Namo un oras i métumotoz wo meneksek ni kita. Méituzu'-Na si Tou esa i maéndo menonotoz zéi'kan mahsanaweka im wia ni kita péléng. Wo totoz kata'uanta sa niana péléng é mamuali téntu, si menonotoz itii é nimaté a Sia itoumé sumaup ni Opo Empung im wia sé nimaté.”

Kisah Rasul-rasul 5:32

Ni kaimo sé mapata'u um pina'ilek nai tumoro a nimamuali itii, ni kai wo si Roh Lenas si méitambéré ni Opo Empung wia péléng sé tou sé mahtali-talinga ni Sia.”

Ibrani 2:4

Si Opo Empung kangkasii é nimenté' an tinalinga wo an ipahkua néra itii, karia niméhé ung kawasa-Na wia ni séra i mahwangun sé tou mengusi-ngusingsing wo a makakompo'en wo an tatambér ni Roh Lenas, a méiwéhé-Na mengiit ung kapaaz-Na.

Ibrani 6:18

Si Opo Empung én zéi'kan mamuali in tumowo witu u méitaaz wo un tiwa'-Na. Un zua kenu én zéi'kan mamuali i mawalina, pahpaano niitu kita sé mekikelung wia ni Sia én toro maenté' wo totoz ma'éman witu um pahéré'anta.

1 Yohanes 5:10

Séi si ma'éman wia si Oki' ni Opo Empung, witu un aténa ém wéwéhano un ipahkua ni Opo Empung tumoro si Oki'-Na itii. Séi si zéi'kan ma'éman wia si Opo Empung, winangunna si Opo Empung in tantowo, pahpaan zéi'kan pa'émanenna un ipahkua ni Opo Empung tumoro si Oki'-Na.

1 Yohanes 5:8

Wo im wia ung kaayahan én telu un tumuzu'mé niitu]: Si Roh ni Opo Empung, un zano wo un zaha' wo sé telu itii én esa.