1 Yohanes 4:9 - Taaz Weru Witu u Nunuwu'en Tombulu

⁹ U raraatéan ni Opo Empung é méipapaileké wia ni kita witu ung kenu: Si Opo Empung nimatumé si Oki'-Na si esa uman i méyé wia ung kaayahan wo kita toro makailek ung katou-touan makaz ing kauré-uré mengiité si Oki'-Na itii.

1 Yohanes 4:9 Iomraidhean Croise

Markus 12:6

In tarékan im wia ni sia ém wéwéhampé' si esa si nimatezama, ni siamo si oki'na si ikararaaténa. Ing kamurian, iatunama si oki'na itii mangé wia ni séra, kuanna, ‘Tantumo si oki'ku ém pahsigi'en néra.’

Lukas 4:18

“Si Roh ni Opo Empung ém wia ni Aku, pahpaan ni Sia si timotoz ni Aku, i mahwoka' u Nuwu' Lé'os wia sé tou zéi'kan siapa apa; wo ni Aku é méiatu-Na

Yohanes 10:10

Si maremu' é méyé uman i rumemu', munu' wo méluméwo'. Taan ni Aku é niméyé, wo sé tou makailek ung katou-touan, niitumo ung katou-touan linakez ung kamang.

Yohanes 14:6

Kuan ni Yesus wia ni sia, “Ni Akumo si lalan i mangé wia si Opo Empung wo mapata'u ung kaulitan tumoro si Opo Empung wo si mahwéhé ung katou-touan makaz ing kauré-uré. Zéi'kan siapa zozo' in esa si mangé wia si Ama' sa zéi'kan mengiité ni Aku.

Yohanes 3:16

Pahpaan si Opo Empung totoz rumaraaté péléng sé tou wia ung kaayahan kenu, niitumo ni Sia timambéré si Oki'-Na si esa uman, wo péléng sé tou ma'éman ni Sia zéi'kan maté, taan makailek ung katou-touan makaz ing kauré-uré.

Yohanes 3:18

Séi uman si ma'éman ni Sia én zéi'kan ukumen. Taan si zéi'kan ma'éman ni Sia é nimakaileko un ukuman, pahpaan ni sia én zéi'kan ma'éman witu u ngaran ni Oki' ni Opo Empung si esa uman.

Yohanes 5:23

Niitu ém winangun ni Ama' wo péléng sé tou é mahsigi' si Oki' tanu ni séra i mahsigi' si Ama'. Si tou zéi'kan mahsigi' si Oki', ni sia kangkasii én zéi'kan mahsigi' si Ama' si nimatumé si Oki'.

Yohanes 6:29

Kuan ni Yesus wia ni séra, “Ung kenumo um paayangen kapaaz ni Opo Empung: Pa'émanela Sia si méiatumé ni Opo Empung.”

Yohanes 6:51

Ni Akumo u roti mahwéhé ung katou-touan um witi kasendukan an tumumpamé. Sa wéwéhan si tou kumana u roti kenu é mamenou-nou makaz ing kauré-uré. U roti iwéhé-Ku én awak-Ku, u maiwéhé-Ku wo sé tou wia ung kaayahan kenu mamenou-nou.”

Yohanes 6:57

Si Ama', si nimangun sé tou i menou-nou, nimatumé ni Aku wo ni Aku menou-nou pahpaan si Ama'. Téntu kangkasii, séi uman si kuman un awak-Ku, si tou itii é mamenou-nou pahpaan ni Aku.

Yohanes 8:29

Ni Sia, si nimatumé ni Aku é menaté-natér ni Aku. Zéi'kan iwaya-Na ni Aku i mengesa-ngesa, pahpaan ni Aku sekezé é mahwangun a mangun ni Sia mahpaa-paaz.”

Yohanes 8:42

Kuan ni Yesus wia ni séra, “Sa si Opo Empung én Ama' niou, ni kamu é marumaraaté ni Aku, pahpaan ni Aku ém wia si Opo Empung a méyé wo in tarékan ni Aku ém wia'i. Ni Aku i niméyé én zéi'kan pahpaan um paaz-Ku in esa, taan ni Siamo si nimatumé ni Aku.

Yohanes 9:3

Si Yesus mingkotla, “Ni sia nimaletok én zéi'kan pahpaan a siningkéla'na wo zéi'kan kangkasii pahpaan a siningkéla' né tu'ana, taan wo sé tou toro milek um pahpaayangen ung kawasa ni Opo Empung wia ni sia.

Roma 8:32

Si Opo Empung én zéi'kan sume'sel si Oki'-Na in esa taan si Oki'-Na itii é méiwéhé-Na wia ni kita péléng, kura kahuman ni Sia zéi'kan tumambéré péléng am péléng wia ni kita karia ni Oki'-Na itii?

Ibrani 1:5

Pahpaan wia si séi im wia sé malaekat kinuaano ni Opo Empung un téntii, “Ni Komo si Oki'-Ku! In endo kenu ni Aku kumua i ni Ko én Oki'-Ku?” Wo, “Ni Aku é maéndo Ama'-Na, wo ni Sia é maéndo Oki'-Ku?”

1 Yohanes 3:16

Karia ang kenumo ni kita mata'u u raraatéan ni Kristus, i si Kristus é nimayomo un tou-Na wia ni kita. Niitumo ni kita kangkasii é léwo'zéi' i mayola un touta wia sé katuarita esa pa'émanen.

1 Yohanes 4:10

Ung kenumo u raraaté itii: Zéi'kan ni kita sé rimaraatémo si Opo Empung, taan si Opo Empung si rimaraatémo ni kita wo nimatu si Oki'-Na in zuméi' a singkéla' pahlé'osenta.

1 Yohanes 4:16

Ni kita é mata'umo wo ma'émano u raraatéan ni Opo Empung wia ni kita. Si Opo Empung é rumaraaté, wo séi si rumaraaté, ni sia é nimaesa karia ni Opo Empung wo si Opo Empung é nimaesa kariana.

1 Yohanes 5:11

Ung kenumo un ipahkua ni Opo Empung tumoro si Oki'-Na: Ni Sia é niméhémomé wia ni kita ung katou-touan makaz ing kauré-uré. Ung katou-touan itii ém wia si Oki'-Na.

1 Yohanes 5:13

Péléng niana én ipantikkuma an iwéhéma wia ni kamu, wo kamu sé ma'éman witu u ngaran ni Oki' ni Opo Empung é mata'ula i ni kamu é makailek ung katou-touan makaz ing kauré-uré.