1 Yohanes 3:10 - Taaz Weru Witu u Nunuwu'en Tombulu

¹⁰ Ang kenumo an tumuzu'mé sé oki' ni Opo Empung wo sé oki' ni tonaas né sétang: Péléng sé tou sé zéi'kan mahwangun ung kaulitan wo kangkasii sé zéi'kan rumaraaté sé katuari néra esa pa'émanen, ni séra én zéi'kan oki' ni Opo Empung.

1 Yohanes 3:10 Iomraidhean Croise

Matius 13:38

Un uma itii éng kaayahan. Am watuna tatanemen wangun é sé tou witi Kakolanoan ni Opo Empung. Taan an tatanemen tanu ang gandum é sé tou ni tonaas né sétang.

Lukas 6:35

Taan ni kamu, iraraatéla sé kakoro' niou wo mahwangunla a lé'os wia ni séra. Ipinjangla an anu niou wia ni séra wo tia' mahgenangla in iwuri néramé sumaup. Sa téntu am pahwangunen niou, ni kamu é makailek um wawaér wangko' wo ni kamu é maéndo oki' ni Opo Empung si Totoz Rakék. Pahpaan ni Sia é lé'os im wia sé tou soo mahkua u makasé wo wia sé tou léwo'.

Yohanes 1:12

Taan péléng sé tou simungkul ni Sia wo ma'éman ni Sia ém winéhan-Na kawasa i maéndo oki' ni Opo Empung.

Yohanes 11:52

Wo zéi'kan uman wia sé tahsasana wanua itii taan kangkasii i ruméwok wo mapaheesa sé oki' ni Opo Empung sé méikasera.

Yohanes 8:44

Si ama' niou é si tonaas né sétang wo ni kamu ém paaz mahwangun ang kapaaz ni ama' niou. Rengané im puuna ni sia é mahwunu' sé tou wo ni sia én zéi'kan kawisa mahwangun an ulit. Pahpaan, ni sia zéi'kan kawisa kumuala an ulit. I ni sia mahtowo, un ipahkuana ém witu un aténa a méyé, pahpaan ni sia én tantowo wo ama' péléng né tantowo.

Yohanes 8:47

Séi uman si wia si Opo Empung a méyé, ni sia é mahtalinga u nuwu' ni Opo Empung. Taan ni kamu én zéi'kan wia si Opo Empung a méyé, pahpaano niitu ni kamu soo tumalinga u nuwu' ni Opo Empung.”

Kisah Rasul-rasul 13:10

ang kumua, “É oki' ni tonaas né sétang! Ni ko é mawuta-wuta a léwo'an wo an towo. Ni ko éng kakoro' ang kaulitan. Makaz sawisa u lalan terén ni Opo Empung im pahséa'mu?

Roma 13:8

Tia' mahutang apa uman wia si séi uman. Taan ni kita é léwo'zéi' i mahraa-raatéan si esa wo sé walina, niitu én utang zéi'kan kawaéran. Pahpaan si tou rumaraaté sé tou walina, ni sia é nimangunola un ukum Torat.

Efesus 5:1

Niitumo, ni kamu in oki' ni Opo Empung sé totoz ikararaaté-Na, ung katou-touan niou é mahkéréla wia si Opo Empung

Kolose 3:14

U lumousé péléng niitu é mahraa-raatéanola, pahpaan karia i mahraa-raatéan um pinaesaan niou é malekep.

1 Timutius 1:5

Ung kalakoan u sésésa itii, wo sé tou uli-ulit rumaraaté karia un até weresi, karia ung genang lé'os, wo uli-ulit ma'éman wia si Kristus.

1 Yohanes 2:29

Sa kata'uan niouo i si Opo Empung én ulit, ni kamu kasii é léwo'zéi' i mata'u im péléng sé tou mahwangun ang kaulitan én oki'-Na.

1 Yohanes 3:1

Ilekela, ung kawangko' u raraatéan méitambéré ni Ama' wia ni kita, taka-takazan ni kita pahkuan in oki' ni Opo Empung. Wo niitu én ulit i ni kita én oki' ni Opo Empung. Niitumo, sé tou mahkiit u lelo léwo' ung kaayahan én zéi'kan mata'u ni kita, pahpaan sé tou itii én zéi'kan mata'u ni Sia.

1 Yohanes 3:2

Katuari-katuari ikararaatéku, in tarékan ni kita én oki' ni Opo Empung, taan zéi'kampé' kata'uanta u mamuali wia ni kita. Taan kata'uanta sa si Kristus mapailekomé un tou-Na, ni kita é maéndo tanu ni Sia. Pahpaan ni kita é mamilek un ulitna ung katou-touan-Na.

1 Yohanes 4:21

Ung kenumo um perénta méiwéhé-Na wia ni kita: Séi si rumaraaté si Opo Empung, ni sia kangkasii é léwo'zéi' i rumaraatéla si katuarina esa pa'émanen.

1 Yohanes 4:6

Ni kita ém wia si Opo Empung a méyé: Séi si mata'u si Opo Empung, ni sia é mahtalinga ni kita. Séi si zéi'kan wia si Opo Empung a méyé, ni sia én zéi'kan mahtalinga ni kita. Niitu un tumuzu'mé wisa si Roh kaulitan wo wisa si roh mahlululu uman si tou.

1 Yohanes 4:8

Séi si zéi'kan rumaraaté, ni sia én zéi'kan mata'u si Opo Empung, pahpaan si Opo Empung é rumaraaté.

1 Yohanes 5:19

Kata'uanta i ni kita ém wia si Opo Empung a méyé wo ung kaayahan kenu éng kinawasa ni tonaas né sétang.

1 Yohanes 5:2

Karia ung kenu ni kita toro mata'u i ni kita rumaraaté sé oki' ni Opo Empung: Ni kita rumaraaté si Opo Empung wo mahwangun a méiperénta-Na.

3 Yohanes 1:11

Katuari ikararaatéku. Tia' mahkéré a léwo', taan mahkéréla a lé'os. Séi si mahwangun a lé'os, ni sia ém wia si Opo Empung a méyé. Taan séi si mahwangun a léwo', ni sia én zéi'kampé' mata'u si Opo Empung.