1 Timutius 6:2 - Taaz Weru Witu u Nunuwu'en Tombulu

² Sa si tuang néra én tou ma'éman wia si Yesus, tia' wo sia zéi'kan tahlous pahsigi'en, pahpaan ni séra é mahtuari i ma'éman. Taantaré, sé ata é léwo'zéi' kalousna i mahpaayang wia si tuang néra, pahpaan si tuang pahpaayangan néra itii éng katuari i ma'éman wo ikararaaté néra. Péléng ang kenu én uli-ulit ituzu'la wo isésala wia sé jamaat.

1 Timutius 6:2 Iomraidhean Croise

Matius 23:8

Taan ni kamu, tia' ipahwaya niou sé tou mahtawah ni kamu i ‘méster’! Pahpaan si Méster niou én esa uman wo ni kamu péléng é mahtuari.

Matius 25:40

Si Kolano itii é mingkot wia ni séra in téntii, ‘Uli-ulit ikua-Kuma wia ni kamu, péléng am winangun niouola wia si esaané im wia sé katuari-Ku sé totoz roros kenu, niitu ém winangun niouola wia ni Aku.’

Matius 6:24

Zéi'kan siapa si tou toro maayang wia sé zua tuang. Pahpaan sa téntu si esa é maikazi'zisna wo si walina én iraraaténa. Kaapa ni sia é mahtali-talinga wia si esa wo zéi'kan mahtali-talinga si walina. Ni kamu én zéi'kan mamuali i mahpaayang wia si Opo Empung wo karegas niitu mahpaayang wia si Mamon.”

Kisah Rasul-rasul 1:15

I sana endo, sé katuari esa pa'émanen é nimaréwok. Ung kalakez néra ém woo sana atus wo zuana pulu' tou. A si Petrus rumendaila witu un unez néra ang kumua,

Roma 11:17

Sé woopira im wia sé tou Yahudi én tanu am panga kai zaitun ni Opo Empung ang kinetoro. An iéndomé pangana ang kai zaitun wana an talun an ilaput witu ung kai zaitun ni Opo Empung. Ni kamu in tou zéi'kan Yahudi én tanu am panga kai zaitun wana an talun. In tarékan, ni kamu é nimakaileko ung katou-touan wo ung ketez witu un ahmut ung kai méitanem ni Opo Empung.

Roma 8:29

Pahpaan péléng sé kata'uano ni Opo Empung rengané im puuna, ni séra én tinotoz-Namo rengané im puuna i maéndo tanu si Oki'-Na. Si Oki'-Na itii é maéndo Oki' tu'a im wia sé lakez mahtuari.

Galatia 5:6

Pahpaan sinunat kaapa zéi'kan sinunat é masuat uman im wia sé tou sé nimaesamo karia ni Kristus Yesus. Un totoz ipahpuu-puuna é ma'éman si Kristus Yesus un toro pa'ileken karia i rumaraaté sé tou walina.

Efesus 1:1

Um pinantik kenu ém wia ni aku Paulus a mangé, si witu um paaz ni Opo Empung tinawah i maéndo aatu ni Kristus Yesus. Um pinantik kenu én iwéhé wia sé tou linenas ni Opo Empung witi Efesus sé ma'émano wo mahtali-talinga wia si Kristus Yesus.

Efesus 1:15

Niitumo, in tinalingakumola ni kamu ma'éman wia si Yesus Mahpiara wo u raraatéan niou wia péléng sé tou linenas ni Opo Empung,

Efesus 3:6

Ung kenu u méikawunipé' itii: Péléng sé tou ma'éman u Nuwu' Lé'os tumoro si Kristus Yesus, ni séra in tou Yahudi kaapa zéi'kan tou Yahudi é makailek um wéwéténgan im wana a méitaaz ni Opo Empung wia sé tou-Na. Ni kita péléng é maéndo esa awak wo makailek u mémoitaaz ni Opo Empung wia sé nimaesa karia ni Kristus Yesus.

Kolose 1:2

Um pinantik kenu én iwéhé wia ni kamu in tou linenas ni Opo Empung wo sé ma'éman si Kristus witi Kolose. Mengalé-ngaléi uman ung kamang tatambér wo ung kaluasan witu un até, um wia si Opo Empung, si Ama'ta é menaté-natér ni kamu.

Kolose 1:4

pahpaan tinalinga naimo tumoro um pa'émanen niou wia si Kristus Yesus, wo kura u raraatéan niou wia péléng sé tou linenas ni Opo Empung.

Kolose 4:1

É kamu in tuang, mapailekla an ulit wo tia' mahtémbo-témbo wia sé ata niou. Gena-genangen, ni kamu in tuang kangkasii ém wéwéhan si tuang im witi kasendukan.

2 Tesalonika 1:3

Katuari-katuari, pahpaan ni kamu ni kai sekezé é léwo'zéi' ing kumua u makasé wia si Opo Empung. Ni kai é léwo'zéi' i mahwangun un téntu pahpaan ni kamu éng kalousnamo i ma'éman wia si Yesus wo ni kamu si esa wo sé walina éng kalousnamo i mahraa-raatéan,

1 Timutius 4:11

Péléng niana én ipahwoka'la wo ipahtuzu'mula wia sé tou.

1 Timutius 5:1

Timotius! Tia' mahrekak wia sé tuama tu'amo. Taan maheluz umanla i mahnuwu' wia ni séra tanu i mahnuwu' wia si ama'mu. Wo pahnuwu'ala sé tarétumou tanumokan ko i mahnuwu' wia sé tuarimu.

Titus 2:1

Taan ni ko Titus, ipahtuzu'la an tutuzu' ulit.

Titus 2:15

Titus, ipakawoka'la niana péléng, pahsésaala wo pahséro'ela séra karia ung kawasa in aatu ni Opo Empung. Tia' ipahwaya séi uman si meroros ni ko.

Titus 3:8

Péléng a méikuakuma kenu én ulit wo kapaazku péléng niitu én uli-ulit ikuala, wo sé tou ma'émano wia si Opo Empung én uli-ulit mahtututu' i mahpaayang am paayangen wangun. Nianamo a lé'os wo wéwéhan torona wia sé tou.

Ibrani 3:1

Katuari-katuari sé linenas wo sé tinawahmo i maayang wia si Opo Empung. Wéhan nioula genang si Yesus si niéndo Aatu ni Opo Empung wo Walian Wangko', si pa'émanenta in ulit wo zéi'kan maindé' in ipahwoka'ta wia sé tou walina.

Ibrani 3:14

Pahpaan ni kita é nimaesamo karia ni Kristus in tou-Na, niitumo tio-tionan um pa'émanen um wiamo ni kita rengané ing kataré-taré i ma'émanla si Yesus makaz ing kamurian.

1 Petrus 5:1

Ni aku ém penatua tanu ni kamu wo ni aku éng kumuama a niilekku wo an tinalingaku tumoro an zézéha pinahpendané ni Kristus im puuna. Ni aku kangkasii é lamakailek wéténg im witu ung kawangko'an-Na i si Kristus mémapailek ung kawangko'an-Na. Niitumo ni aku é sumésama wia ni kamu:

2 Petrus 2:10

sé ipahpuu-puuna é sé tou sé mahkiit uman a lelo léwo' un awak néra a mahwangun ni séra in zéi'kan wangun wo mahséro' ung kawasa ni Opo Empung. Sé méster towo itii én totoz wuaya wo wera', makaz ni séra én zéi'mo maindé' i mahséro' sé pahloozen wo pahsigi'en witi kasendukan.

Yudas 1:8

Téntu kangkasii sé tou mengingipi itii é mahkilamu' an awak néra wo meroros ung kawasa ni Opo Empung wo kasii mahséro' wia péléng sé pahloozen wo pahsigi'en witi kasendukan.