1 Timutius 4:6 - Taaz Weru Witu u Nunuwu'en Tombulu

⁶ Timotius, niitu péléng én totoz in ipahtuzu'mula wia sé katuari esa pa'émanen, wo séra zéi'kan kumiit an tutuzu' zéi'kan ulit. Karia in téntu, ni ko é maéndo memamaayang ni Kristus Yesus si lé'os uman. Sa ko mangunla un téntu, um pa'émanennu éng kaenté'na pahpaan rengan im puuna é mahkiit an tutuzu' ulit.

1 Timutius 4:6 Iomraidhean Croise

Matius 13:52

Ang kuan ni Yesus wia ni séra, “Niitumo, péléng sé tou tulap un Torat sé timalingamo an tutuzu' tumoro ung Kakolanoan ni Opo Empung én tanu si makawalé si nimondolé péléng a sangkum werupé' wo an urémo im wana am pahtu'tulan a sangkumna.”

Lukas 1:3

Pahpaano niitu, kumawusa péléng a nimamuali itii im pinahtata'ukula rengané witu ung kataré-taré nimamuali, a ni aku tumotozla in tumu'tul niitu witu um pinantik wo iwéhé wia si ama'.

Kisah Rasul-rasul 1:15

I sana endo, sé katuari esa pa'émanen é nimaréwok. Ung kalakez néra ém woo sana atus wo zuana pulu' tou. A si Petrus rumendaila witu un unez néra ang kumua,

Kisah Rasul-rasul 20:31

Niitumo ni kamu é léwo'zéi' in tuméga-tégam. Gena-genangen, teluna ta'un ung kauréna endo wo wengi ni aku zéi'kan mazéi' i mahsésa wia ni kamu si esa wo si esa karia im pahlué'an.

Kisah Rasul-rasul 20:35

Im wana am péléng ni kamu ém winéhangkumoma ung kékéréan, karia i mahpaayang tanu niitu ni kita én toro sumawang sé tou susa. Ni kita é léwo'zéi' ing gumenang u méikua ni Yesus Mahpiara in téntii, ‘Si tou mahwéhépé' si mahpaa-paaz taan si tou pahwéhan.’ ”

Roma 15:15

Taan pahpaan ang kamang tatambér ni Opo Empung wia ni aku, makaz ni aku ém wuaya i mapagenang wia ni kamu tumoro am walina a mémoipantikku witu um pinantikku kenu.

1 Korintus 4:17

Pahpaano niitu si Timotius méiatukuma i mangé wia ni kamu. Ni sia én tou ma'éman wia si Opo Empung, ni sia én tanumokan oki'ku totoz ikararaatéku wo ni sia ém pa'émanengku. Ni sia si mapagenang wia ni kamu kura ung katou-touangku i nimaesa karia ni Kristus Yesus, tanu a méipahtuzu'ku wia sé jamaat wisa uman um pahwéha-wéhan néra.

2 Korintus 11:23

Ni séra é mahkua i ni séra én aatu ni Kristus? Ni aku é lumouspé'mé ni séra! (Ni aku i mahkua téntu én tanumo si tou pahléla'en). Ni aku i mahpaayang é lumouspé'mé um pakahpaayang néra. Ni akupé' si makalakez méiuntep bui taan ni séra. Ni akupé' si makalakez sinaluk taan ni séra. Ni aku makalakez én tawimo maté.

2 Korintus 3:6

Ni Sia si nimangun ni kai makawawa i maéndo tou maayang a méiatu-Na i mahwoka' um pinataazan weru wia sé tou. Um pinataazan weru itii ém pahpaayangen ni Roh Lenas. Um pinataazan weru itii én zéi'kan am pinantik witu ung kitap Torat. Pahpaan a méipantik witu ung kitap Torat é mahwali sé tou witu um patéan, taan si Roh Lenas é mahwali ni kita witu ung katou-touan.

2 Korintus 6:4

Taan, im wana am péléng, ni kai é mapailek i mahpaayang uman u méiatu ni Opo Empung. Niitu méipapailek nai i ni kai ezen im wana: an zézéha, am pengalin wo ang kasusaan,

Efesus 6:21

Si Tikhikus, katuarita esa pa'émanen si ikararaaté nai wo si ma'ulit i mahpaayang wia si Opo Empung é makumua péléng niitu wia ni kamu wo ni kamu toro mata'u kura ni aku in tarékan wo apa um pahwangunengku in tarékan.

Filipi 2:20

Pahpaan zéi'mo siapa si kapaayangku si esa genang wo nimata'uano kariaku tanu si Timotius. Ni kai zua én totoz mahwéhé genang wana am wangun wo am wéwéhan torona wia ni kamu.

Filipi 2:22

Taan ni kamu nimileko un ulitna si Timotius. Pahpaan ni sia é nimapaileko i ni sia én toro pa'émanen wo uli-ulit mahpaayang i mahsawang ni aku i mahwoka' u Nuwu' Lé'os tumoro si Yesus, tanumokan si koki' mahsawang si ama'na.

Filipi 3:16

Un totoz ipahpuu-puuna, ung katou-touanta é mahkiitla an tutuzu' ulit mémoituzu' ni Opo Empung makaz in tarékan.

Kolose 2:19

Ni séra kangkasii én zéi'mo mahkiit un tutuzu' ni Kristus si tanu ulu im witu un awak, wo un awak é sé tou-Na. Am witu un awak itii ém pahtu'tul-Na wo péléng nimaesa, tanu sé tou-Na in zéi'kan mata'u matampasan. Karia in téntu, kuramo un awak mahtu'amé mengiit ung kapaaz ni Opo Empung, téntumo um pa'émanen niou im wia si Opo Empung éng kaenté'na.

Kolose 3:16

U Nuwu' ni Kristus é léwo'zéi' malake-lakez ing kimawasa witu péléng ung katou-touan niou, taka-takazan karia péléng ung katulapan, ni kamu mahtuzu' wo mahsésésaan si esa wo si esa karia i mahkantar a mazmur wo ang kakantaren lolooz wo ang kakantaren né tou ma'éman, wo mahkua u makasé wia si Opo Empung witu un até niou.

Kolose 4:7

Péléng a nimamuali wia ni aku é mamokan ikuala ni Tikhikus wia ni kamu, ni sia éng katuari esa pa'émanen si ikararaatéta, wo kasii ata mahtali-talinga uman wo kapaayang i mahpaayang wia si Mahpiara.

1 Tesalonika 3:2

An iatu naima si Timotius i mangé wia ni kamu. Ni sia éng katuarita esa pa'émanen wo kapaayang nai i mahpaayang wia si Opo Empung i mahwoka' u Nuwu' Lé'os tumoro si Kristus. Ni sia méiatu naima i mamenté' un até niou wo sumésa wia ni kamu, wo kaenté'na um pa'émanen niou.

1 Timutius 1:10

sé tou samek wo sé tuama mahwangun karia né katuama nérakan an toro uman pahwangunen né tuama wo wéwéné, sé mahremu' sé tou in iwangkér maéndo ata, sé tantowo, sé mahtiwa' an zéi'kan ulit wo péléng an zéi'kan mahkiit an tutuzu' ulit

1 Timutius 4:16

Ime-imeken ung katou-touannu wo an tutuzu'mu. Tia' ko mazéi' i mahwangun niana péléng, pahpaan karia in téntu ni ko toro tumulung un toumu wo péléng sé tou mahtalinga an tutuzu'mu, im witu un ukuman ni Opo Empung.

1 Timutius 6:3

Séi si mahtuzu' an tutuzu' an zéi'kan masuat wo soo kumiit an tutuzu' ni Yesus Kristus Mahpiarata wo kasii nimawalinaan karia an tutuzu' kaulitan tanu am pahkiitenta i mahragés wia si Opo Empung,

2 Timutius 1:6

Pahpaano niitu, ni aku é mapagenanga wia ni ko im wuaya-wuayan un tatambér ni Opo Empung um wiamo ni ko, ung kinailekannu i ni aku zimeta'la u lengenku wia ni ko.

2 Timutius 3:10

Taan ni ko éng kimiitola an tutuzu'ku, kura um pahwangunengku, wo um paayongku, um pa'émanengku, ung kaezenangku, u raraatéangku wo kura aku mahtututu' i mahpaayang zozo' in zézéha.

2 Timutius 4:3

Pahpaan un orasna é méyé i sé tou soomo an tutuzu' ulit. Ni séra ruméwok sé méster mengiit um paaz néra ing kumua ang kapaaz néra in talingan.

Titus 2:1

Taan ni ko Titus, ipahtuzu'la an tutuzu' ulit.

1 Petrus 2:2

Tanumokan si taré itoumé si sekezé é mekisusu, ni kamu kangkasii é léwo'zéi' im paaz un uli-ulit Nuwu' ni Opo Empung um witi kasendukan a méyé. Pahpaan karia in téntu ni kamu é mahtou wo ipiloté im witu un ukuman wana a singkéla'.

2 Yohanes 1:9

Si tou zéi'kan mahkiit an tutuzu' ni Kristus ang kumiitla an tutuzu' walina, ni sia én zéi'kan makaanu si Opo Empung. Séi si mahkiit an tutuzu' ni Kristus, ni sia é makaanu si Ama' wo si Oki'.

Yudas 1:5

Zozo' ni kamu én totozo mata'u niana péléng, taan ipapagenangkuma wia ni kamu i si Opo Empung im puuna é nimiloté sé tou-Na im witi tana' Mesir. Taan tumondong niitu im wia sé tou Israel sé zéi'kan ma'éman én zéi'kan méiwaya-Na i menou-nou.