1 Timutius 3:16 - Taaz Weru Witu u Nunuwu'en Tombulu

¹⁶ Totoz ulit an tutuzu' ulit ni Opo Empung é mémoipapailek-Na witu um pa'émanenta karia ung kawangko'an-Na: “Ni Sia é nimapailek un tou-Na tanu in tou uman, kinua in ulit ni Roh ni Opo Empung wo nimapailek un tou-Na wia sé malaekat. Tumoro ni Sia é méiwoka' wia péléng sé tahsasana wanua. Ni Sia ém pa'émanen im wia ung kaayahan wo winénéta mangé witi kasendukan karia u sigi' wo looz.”

1 Timutius 3:16 Iomraidhean Croise

Matius 1:23

“Un ulitna, si raraha itii é mahawa-awak wo tumou si lowai wo ni Sia é ngaranan néra Imanuel.” (Ung kalakoana: Si Opo Empung é menaté-natér ni kita).

Matius 13:11

A si Yesus mingkotla, “Im wia ni kamu én tinambéran ung kamang in toro makatulap u méikawunipé' tumoro ung Kakolanoan ni Opo Empung, taan im wia ni séra én zéi'kan.

Matius 28:2

Kumompo'mé a méhzo'mé totoz repet pahpaan si malaekat ni Opo Empung si witi kasendukan én timumpamé a méyé witu um watu méipalot u lelewengan itii, a niitu isoro'nama a sia rumumezla witu um watu itii.

Matius 3:16

I si Yesus sinaranimola, a Sia rengan mondolé im witu un zano. In toro niitukan, a mawukama u langit an ileken-Nama si Roh ni Opo Empung tanu si bombo timumpama witu um wawo-Na.

Matius 4:11

A si Yesus itula'uma ni tonaas né sétang. An ilekena, sé malaekat niméyé i mahselewir ni Sia.

Markus 1:13

Epatna pulu' endo Sia im pema'wa'en ni tonaas né sétang witu. Si Yesus i mahwitu-witu éng karia né liontana' wo sé malaekat mahselewir ni Sia.

Markus 16:19

Makanuwu'la si Yesus wia sé pahtuzu'en-Na, a Sia mawénéta mangé witi kasendukan, a marumumez witu ung kakan ni Opo Empung.

Markus 16:5

Ni séra i nimuntepa witu un untep u lelewengan, maileken néra im witu ung kakan ém wéwéhan si tarétumou rimumez kimarai ung karai tonton kulo'. Niitumo ni séra mengompo'.

Lukas 2:32

ni Sia én tanu u sena' i sumena'ma witu u lalan né tahsasana wanua walina, wo ni séra méyé wia ni Ko, u sena' itii é maéndo sisigi'an wo lolooz né tou-Mu, Israel.”

Lukas 20:44

Niitumo, si Daud in esa mahkua si Mesias in ‘Tuang’, kura kahuman sa si Mesias kangkasii é suzu ni Daud?”

Lukas 22:43

A mémapailek wia ni Sia si malaekat si witi kasendukan a méyé i menté' ni Sia.

Lukas 24:4

Karegas séra rimendai wo mengusi-ngusingsing pahpaan niitu, kumompo'mokané ém wéwéhano sé tou zua rimendai witu u rété néra kimarai ung karai meto-petot.

Lukas 24:51

Karegas Sia i mahwéhé ung kamang wia ni séra, Sia matampasana karia néra a mawénéta mangé witi kasendukan.

Yohanes 1:14

U Nuwu' ni Opo Empung itii é nimaéndomo tou wo menou-nou im wia ni kita wo ni kita é nimileko ung kawangko'an-Na. Ung kawangko'an-Na itii éng kinailekan-Na pahpaan ni Sia én Oki' esa uman ni Opo Empung. Wo ni Sia én tumuzu'mé i si Opo Empung én ulit wo ni Sia mahtambéré ung kamang wia ni kita.

Yohanes 13:3

Si Yesus mata'u i si Ama' é niméhémo péléng am péléng wia ni Sia. Wo ni Sia ém wia si Opo Empung a méyé wo mawuri sumaup wia si Opo Empung.

Yohanes 15:26

Ni Aku é matumé wia ni kamu si Menunulung si wia si Ama' a méyé. Ni Siamo si Roh Kaulitan, si mémapailek ung kaulitan tumoro si Opo Empung. Sa ni Sia méyé, ni Sia é mékumua ang kata'uan-Na tumoro ni Aku.

Yohanes 16:28

Ni Aku ém wia si Ama' a méyé wo ni Aku é niméyé wia ung kaayahan kenu. Ni Aku kangkasii én tumula'uma ung kaayahan kenu wo mangé wia si Ama'.”

Yohanes 17:5

Wo in tarékan, o Ama', ipapaileka ung kawangko'an-Ku in Oki'-Mu, karia ung kawangko'an un anu-Ku karia ni Ama' rengan im puuna, puunala ung kaayahan kenu im winangun.

Yohanes 20:12

an ilekenama sé zua malaekat kimarai kulo', si esa é rimumez witu ung kasaru un ulu wo si esa witu ung kasaru un a'é un im puuna zinetaan un awak ni Yesus.

Yohanes 6:62

Kura u mamuali sa kamu milek si Oki' ni Tou mawénéta i mawuri witi pinahwéha-wéhan-Na ing kataré?

Kisah Rasul-rasul 1:19

Péléng sé tou witi Yerusalem é mata'u u nimamuali wia si Yudas, pahpaano niitu un tana' itii é nginaranan néra karia u nunuwu'en néra ‘Akeldama’,ung kalakoana én Tana' Zaha'.

Kisah Rasul-rasul 10:34

A si Petrus rengan i mahnuwu', “Un ulitna, kinatulapangkumola i si Opo Empung én zéi'kan meméléng tou.

Kisah Rasul-rasul 14:27

I méikaayola witi Antiokhia, tawahen néramé sé jamaat i maréwoké. An isirita nérala péléng am pinaayang ni Opo Empung mengiité ni séra. Ni séra kasii simiritala i si Opo Empung é nimukamoma u lalan wia sé tou zéi'kan Yahudi i ma'éman wia si Yesus.

Kisah Rasul-rasul 20:28

Niitumo, mile-ilek wo pahilekela péléng sé jamaat. Pahpaan ni kamumo sé tinotoz ni Roh Lenas in tumatér sé jamaat ni Opo Empung i miara ni séra. Ni séra nimaéndo jamaat-Na pahpaan ni séra ém winaér-Namo karia un zaha' ni Oki'-Na.

Roma 10:12

Sé tou Yahudi wo sé tou zéi'kan Yahudi é masuat uman. Pahpaan, si Mahpiara én esa uman, si Mahpiara én anu né tou péléng. Wo ni Sia é meripu' umané i méhémé ung kamang malake-lakez wia péléng sé tou mekisawang wia ni Sia.

Roma 10:18

Taan ni aku é meligau: Apa sé tou Yahudi én uli-ulit zéi'kampé' timalinga u Nuwu' Lé'os tumoro si Yesus itii? Ni séra én timalingamo niitu. Pahpaan witu um Pinantik Lenas é méipantik in téntii, “Si nimahalimé an ipapata'u é nimapata'umoma wia péléng ung kaayahan, wo u méikua nérama én tinalingamoma makaz witi pondolna ung kaayahan.”

Roma 16:25

U sigi' wo looz wia si Opo Empung! Ni Sia ém wéwéhan kawasa i menté' um pa'émanen niou mengiit u Nuwu' Lé'os tumoro si Yesus Kristus u méipahwoka'ku mengiit u méipapailek ni Opo Empung, u rengan ing kataré-taré méikawuni im wia sé tou.

Roma 16:26

In tarékan witu um perénta ni Opo Empung si makaz ing kauré-uré, u méikawunipé' itii é mémoipahwoka' wana a méipantik né nabi wia péléng sé tahsasana wanua i mahkit ni séra i mahtali-talinga wia si Opo Empung si pa'émanen néra.

Roma 3:4

Zéi'kan! Si Opo Empung é mangun péléng a méitaaz-Na zozo' péléng sé tou én tantowo. Pahpaan witu um Pinantik Lenas é méipantik: “Péléng a Nuwu'-Mu é mémoikatuzu'mé in ulit, wo sa ni Ko im pahtotozen ulit kaapa zéi'kan am pahwangunen, ni Ko é nimuntung.”

Roma 8:3

An zéi'kan kawawaan im wangunen witu un ukum Torat pahpaan ni kita én tou zéi'kan enté' ém winanguno ni Opo Empung. Ni Sia é nimatumé si Oki'-Na in esa in tou uman tanumokan si tou simingkéla', in zuméi' a singkéla' wo méhé ukuman wana a singkéla' witu un awakta.

Roma 9:5

Ni séra é suzu né nimaopota. Si Mesias in tou é nimatoumé wia sé nimaopota wo ni Sia é mahkawasa wana péléng am péléng. Ni Siamo si Opo Empung si léwo'zéi' im pahloozen makaz ing kauré-uré. Amin!

1 Korintus 15:47

Si tou kataré winangun ni Opo Empung én tana' am wangunen. Un tana' itii niéndo wia ung kaayahan kenu. Taan si Kristus si Tou kazua, ém witi kasendukan a méyé.

1 Korintus 2:7

Taan an ipahwoka' nai itii éng katulapan ni Opo Empung a méikawunipé' wo zéi'kampé' kata'uan. Ang katulapan ni Opo Empung itii é niimek-Namo puunala ung kaayahan kenu im winangun. Niitu ém winangun ni Opo Empung wo kita sigi'en wo loozen.

2 Korintus 1:19

Pahpaan, si Yesus Kristus, si Oki' ni Opo Empung si méipahwoka'ku karia ni Silwanus wo ni Timotius wia ni kamu én zéi'kan mahkua ‘éné’ wo witu ung ginenang én ‘zéi'kan’. Taan im wia ni Sia én akaz uman mahkua ‘éné’.

Galatia 2:8

Pahpaan si Opo Empung si nimangun si Petrus makawawa i maéndo aatu ni Yesus Kristus wia sé tou Yahudi sé sinunat, ni Sia kasii si nimangun ni aku makawawa i maéndo aatu ni Yesus Kristus wia sé tou zéi'kan Yahudi.

Galatia 4:4

Taan sa méikaayomola witu un orasna, si Opo Empung matumé si Oki'-Na si méitoumé ni raraha wo si Koki' itii é menou-nou mahkiit un ukum Torat.

Efesus 1:9

Si Opo Empung nimapata'umo ung ginenang-Na u méikawunipé' wia ni kita. Ung ginenang-Na rengané im puuna mengiit um paaz-Na én tinotoz-Na i lekepen mengiité si Kristus.

Efesus 6:19

Ipengaléipé' kasiimé ni aku wo ni aku i mahnuwu' wia sé tou, si Opo Empung é mahwéhémé u nunuwu'en ulit wia ni aku, wo zéi'kan maindé' i mahwoka' u Nuwu' Lé'os tumoro si Yesus a méikawunipé' im wia ni séra.

Kolose 1:23

Niitumo, ni kamu én tia'mo kumana' i ma'éman wo tia'mo mahzua-zua genang. Ni kamu én uli-ulit ma'émanla wo tia' ipahtutula'u um pahéré'an niou witu u Nuwu' Lé'os tumoro si Yesus, un tinalinga niouo itii. U Nuwu' Lé'os itii é méikawoka'mo wia ung kaayahan, wo ni aku, Paulus, si mahpaayang a méiatu ni Opo Empung i mapata'u u Nuwu' Lé'os tumoro si Yesus itii.

Kolose 1:27

Im wia sé tou-Na, si Opo Empung ém paaz i mapata'u, in totoz wa'ilan wo wangko' a méikawunipé' itii im wia sé tou walina sé zéi'kan Yahudi. U méikawunipé' itii én téntii: Si Kristus ém witumo un até niou, ni Siamo si pahéré'an i makailek u sigi' wo looz ni Opo Empung.

Kolose 1:6

u mémoiwoka' wia ni kamu. U Nuwu' Lé'os itii é mémoiwoka'ma wia sé tou lakez wia ung kaayahan, wo u Nuwu' itii kangkasii éng kimamang ung katou-touan né tou wia ung kaayahan, tanu ung katou-touan niou ing kinamang rengan ni kamu in timalinga wo uli-ulit mata'u ung kamang méitambér ni Opo Empung.

Kolose 2:2

Ni aku nimangun un téntu wo un até néra én toro maenté' wo mahesa-esaan pahpaan i mahraa-raatéan. Karia in téntu, ni séra péléng én uli-ulit makatulap wo totoz mata'ula un im puuna zéi'kampé' méipapata'u ni Opo Empung. Un zéi'kampé' méipapata'u itii é si Kristus in esa.

2 Tesalonika 1:10

Péléng niitu é mamuali witu un endo i ni Sia méyé sumaup. Ni Sia é loozen wo sigi'en né tou lenas wo sigi'en péléng né tou ma'éman. Ni kamu kangkasii é méikauntep wia sé tou lenas itii, pahpaan ni kamu é nima'émanola an tutuzu' méipahtuzu' nai wia ni kamu.

2 Tesalonika 2:7

Si tou totoz léwo' itii é mahpaayango karia i mahwuni-wuni, taan wéwéhampé' u nimokal ni sia. Taan sa u nimokal ni sia niéndomoma,

1 Timutius 3:9

uli-ulit mahkiit an tutuzu' tumoro um pa'émanen wia si Kristus u mémoipapailek ni Opo Empung wia ni kita wo mahwangun niitu karia ung genang weresi.

Ibrani 1:3

Ni Siamo si mahsena'mé u sena' ni Opo Empung wo mengiité ni Sia kita toro milek si Opo Empung. Karia u Nuwu'-Na un totoz mahkawasa, si Yesus mahtéiz péléng am wia ung kaayahan. Kumawusa Sia i miloté sé tou im witu un ukuman wana a singkéla', ni Sia rimumez witu ung kakan ni Opo Empung si totoz wangko' witi tampa totoz rakék.

Ibrani 12:2

Mahweren umana wia si Yesus si mahtu'tul um pa'émanenta wo nimangun um pa'émanenta nimalekep. Ni Sia ezen i nimazézéha witu u salip wo zéi'kan pandungen-Na zozo' niitu makaizangen, ni Sia mahgenang umana u mahpaa-paaz u mapendanen-Na in tumondong. In tarékan ni Sia é rimumezo witu ung kakan u rurumezan ni Opo Empung ing Kolano.

Ibrani 7:7

Kata'uantamo péléng, si mahwéhé ung kamang é lumouspé'mé si winéhan ung kamang itii.

Ibrani 8:1

Un totoz ipahpuu-puuna witu um pahkuaku kenu, ni kita ém wéwéhano si Walian Wangko' téntu, si rimumezo witu ung kakan u rurumezan ni Opo Empung si Kolano Totoz Wangko' witi kasendukan.

1 Petrus 1:12

Sé nabi itii éng kinuaan sa am pahtata'un néra én zéi'kan méipapata'u in tumulung uman un tou néra in esa, taan in tumulung ni kamu. Sé nabi itii éng kinawasa ni Roh Lenas si witi kasendukan a méyé i mapata'u u Nuwu' Lé'os tumoro si Yesus wia ni kamu. A méipahtuzu' nérama itiimo ang kapaaz né malaekat im pahtata'un.

1 Petrus 1:20

Si Kristus ém pinéléngo ni Opo Empung puunala ung kaayahan kenu im winangun. Wo wana an endo kaakazan ung kaayahan kenu, ni Sia é niméyémoma wia ung kaayahan wo kamu toro ipilot im witu un ukuman wana a singkéla'.

1 Petrus 1:21

Pahpaan am winanguna ni Kristus itiimo, taka-takazan ni kamu én toro ma'éman wia si Opo Empung. Si Opo Empung si timou si Kristus im wia sé nimaté wo nimangun ni Sia pahsigi'en wo pahloozen. Karia in téntu ni kamu én toro ma'éman wo mahéré' uman wia si Opo Empung.

1 Petrus 3:18

Pahpaan si Kristus kangkasii é nimaté makasa uman in ziméi' a singkéla'ta. Ni Sia si mahwangun an ulit é nimaté in timubus sé tou mahwangun an zéi'kan ulit, wo kita toro ipahwali-Na wia si Opo Empung. Ni Sia ém winunu' i ni Sia in tou uman, taan ni Sia é méitoumé sumaup ni Roh Lenas im wia sé nimaté.

1 Petrus 3:22

In tarékan si Yesus Kristus é nimangémo witi kasendukan a rumumezla witu u rurumezan totoz pahsigi'en witu ung kakan ni Opo Empung. Wo péléng sé malaekat, péléng sé mahkawasa wo péléng ang kaketezan ém witumo ung kawasa ni Yesus Kristus.

1 Yohanes 1:2

Ung katou-touan itii é méipapaileko wo niitu é niilek naimo wo in tarékan, ni kai é mahwoka' wia ni kamu a niilek wo tinalinga nai tumoro ung katou-touan makaz ing kauré-uré, u memali-mali karia ni Ama' wo u méipapaileko wia ni kai.

1 Yohanes 3:5

Kata'uan niou, si Kristus i nimapailek un tou-Na i mézuméi' péléng a singkéla', wo im wia ni Sia én zéi'kan siapa a singkéla'.

1 Yohanes 3:8

Séi si memua-mualipé' a singkéla', ni sia ém wia si tonaas né sétang a méyé, pahpaan rengané im puuna si tonaas né sétang én zéi'kan kumana' i memua-muali a singkéla'. Pahpaano niia, si Kristus, si Oki' ni Opo Empung é mapailek un tou-Na, wo am pinaayang ni tonaas né sétang ém pakaléwo'en-Na.

Wahyu 17:5

Wo witu un tungtungna ém pinantikan u ngaran ung kalakoana é méiwunipé'. U méipantik itii én téntii, “Babel totoz ipahkua-kua! Ina' péléng né wéwéné sangaya wo péléng a léwo'an wia ung kaayahan.”

Wahyu 17:7

Ang kuan ni malaekat itii wia ni aku, “Kaa ko mengusi-ngusingsing? Ni ko éng kuaangku un ipahwuni-wuni tumoro si wewéné itii wo un tumoro si binatang makaindé'en si rinumezan ni wéwéné itii, si binatang pitu ulu wo mapulu' sungé.

Wahyu 7:9

Kumawusa niitu, ilekengkuma sé sana réwok tou totoz lakez sé zéi'mo karékénan. Ni séra ém wia péléng sé tahsasana wanua, tahsasana suzu, tahsasana réwok mahtuari, wo sé tahsasana nunuwu'en. Ni séra péléng é rimendai witu sinaru u rurumezan ni Kolano wo witu sinaru ni Anak ni Domba, kimarai ang karai tonton kulo', timion am pala'pa'na am palem.