YESAYA 26:8 - WUKE SUSI WATTI'U AL᷊AL᷊USASSA

⁸ I yami uatantalongnga laṛṛawen-Nu, oh Mawu, wuṛṛu sidutu ual᷊aṛṛaddo Si'o; ete I'o raddaloanna wuṛṛu ilaṛṛintulu naungngi yami.

YESAYA 26:8 Iomraidhean Croise

2 SAMUEL 23:5

Aroddi lai papapulungku nial᷊amatannu Ruata, pa'aire-Ne si ya'u, tawe mawal᷊u, pa'aire-Ne udde mal᷊annu-l᷊annu wuṛṛu nasuungnga, mangke sidutu uaatokka su sarangkanambone. Ruata uariaga auntungangku wuṛṛu nangutungngu al᷊awo'u apulun naungku.

DARALO 106:3

Lal᷊umanna'a su taumata apan tuttuṛṛutta manga parenta-Ne, wuṛṛu tawe sal᷊ane sulal᷊ummu inolaanne.

DARALO 130:5

I ya'u uaṛṛaddo sasumbalan Mawu, paaire-Ne ta'u aantimanna.

DARALO 18:23

Anambon tita-Ne raddaringiṛṛangku, manga parenta-Ne tawe abbul᷊ianangku.

DARALO 42:2

Naal᷊ihidda rusa maapulun ua'en sal᷊ukka, aroddi lai niawa'u maapulu-Nu, oh Ruata.

DARALO 65:6

I'o sinumimbakka si yami ringannu nangonggolu auntunganna si yami, I'o na'ola'a inolaanna apan maatiangnga ipanal᷊amatta si yami! Ete I'o antimannu anambon walahanna maddatingngu tahal᷊oangnga apan marau.

DARALO 73:25

Isai apan tatahuanangku su surga tumba'u I'o? Wal᷊ine wuassu Mawu taweddu ta'u ipaapulu su runia.

DARALO 84:2

Tumaniten maal᷊uassa tampa atatanaan-Nu, oh Ruata Apan Lembontaṛṛino!

SASABANGNGA 3:15

Pasingkata'a lai si mangitou manungku i Ya'u, Mawu, Ruatan iupungngu al᷊amona mangitou, Ruatan i Abraham, i Ishak wuṛṛu i Yakub, nandolokku ringanni mangitou. Ete i Ya'u Mawu, eteudde arang-Ku saran mal᷊annu-l᷊annu. Eteudde pananagoang-Ku su anambon balahannu maṛṛana'a mappulunna.

ANTARI MAWANTUGA 5:8

Paddiandite, ei manga maṛṛualan Yerusalem, napawe i yamiu masangkalla arangnguangku, wal᷊oa'e si tou, manungku i ya'u maradda'u paapulu.

YESAYA 12:4

Sarun a'omanna tempone i yamiu mabbisara, “Pa'adiangkamante su Mawu, wuṛṛu passubbate si Tou. Pasingkata'e su manga walahanna awawantuga wuṛṛu al᷊awo'u inolaan-Ne.

YESAYA 24:15

wuṛṛu taumata su samba'a ra'i maddalo si Tou. Tumana'u winggin sahatta sarun maddalo Mawu, Ruatan Israel.

YESAYA 25:1

Mawu, ete I'o Ruata'u i Ya'u mamantuga Si'o wuṛṛu maddalo aran-Nu. Ana waugu manga manara-Nu lembon ma'atiangnga; I'o buatte nakkiinna ro'en dorone, wuṛṛu nammanara ringannu satia.

YESAYA 25:9

Sutempo udde taumata sarun mabbisara, “Mangke atonna, ete i Tou Ruatan kite; ete i Tou apan raṛṛaddoanni ite tadea'u i ite masal᷊amatta. Atonna, eteindi Mawu; ete i Tou apan raṛṛaddoanna. Orassa indi i ite lumala'en lal᷊uassa, ana waugu i Tou buatte nanal᷊amatta si ite.”

YESAYA 26:13

I yami buatte niparentannu manga mawu waine, arawe tumba'u I'o apan a'uanni yami, oh Mawu Ruatan kami!

YESAYA 30:18

Salaiwe aroddi, Mawu mangke ual᷊aṛṛaddo tempone mamasilon tatal᷊antu-Ne si yamiu. I Tou uasaddiate umakkanni yamiu. Ana waugu Mawu eteudde Ruata apan ma'ola'a sarangkanambone apan suṛṛinone. Lal᷊umanna'a su taumata apan mangngantimma si Tou.

YESAYA 33:2

Oh Mawu, tal᷊antupa'awe i yami. Ete I'o apan pangantimanni yami. Lu'arewe i yami wuassu allo maddatingngu allo wuṛṛu sal᷊amatewe i yami sutempo masuṛṛipitta.

YESAYA 49:23

Manga ratu ere iamangngi yamiu, wuṛṛu manga wo'i ere inangnga. I mangitou sarun umal᷊intudda mangaddatta si'o wuṛṛu sumallungngu watanganne si'o. Ne i'o sarun maasingkatta manungku i Ya'u Mawu; taumata apan uaantimma si Ya'u tawe sumassilla.”

YESAYA 51:4

Panutukke tingi-U, ei pabbawala-U, paddaringikke manga wisara-U, ei uma-U. I Ya'u nangongollu al᷊aṛṛa-U su manga walahanna, manga tita-U sarun manualaga si mangitou.

YESAYA 56:1

Mawu nabbisara su uman-Ne, “Pa'ola'e atatul᷊idda wuṛṛu apan uasul᷊ungngu tita-U. Ana waugu tal᷊ang kadio'a lai Ya'u rumanta manal᷊amatta si yamiu wuṛṛu atatul᷊i-U iapal᷊iatta'a.

MIKHA 4:5

Suapan walahanna su wowon dunia massubba wuṛṛu tuttuṛṛutta su monganne sassane. Arawe i ite sarun tumuṛṛutta su Mawu Ruatan kite wuṛṛu massubba si Tou saran mal᷊annu-l᷊annu.

MIKHA 7:7

Arawe i ite mangngantimma Mawu; ringannu napenen pangangimanna i ite tuttuṛṛutta Ruatan kite. I Tou sarun maddaringikka aal᷊iomanni ite wuṛṛu manal᷊amatta si ite.

MALEAKHI 4:4

Naungete manga al᷊aṛṛa'u allang-Ku Musa, naungete manga tita wuṛṛu manga parenta apan Ta'u nionggolla si tou su Wowon Sinai tadea'u tattuṛṛutannu anambon umattu Israel.

REENGANNA 36:13

Eteudde manga atoranna wuṛṛu manga tita apan nionggolu Mawu su walahannu Israel si Musa, su tempo walahannu Israel uatana'a su ratakku Moab su wiwikku Sal᷊ukku Yordan maranin Soan Yerikho.

LUKAS 1:6

Rua sangkawinganna udde, mabbiakka ma'al᷊uassa naungngu Ruata. Itarua matuṛṛutta anambon parenta wuṛṛu tita Mawu ringannu ahewallu naungnge.

WATTI'U MANGA RASUL 1:4

Wuṛṛu su tempo i Tou uaammulla suadio'a ringanni mangitou, i Tou nangonggolu parenta indi si mangitou, “Arie pangingkatta wuassu Yerusalem. Paṛṛaddo isudde ma'oman sara Iamangnga mangonggolu apa apan suete pinaire-Ne, eteudde apa apan suete niapaasingkatta si yamiu rorone.

ROMA 8:25

Arawe amungkangngu i ite mangngantimma apa apan taambe niasiloanni ite, ne i ite ṛinone uaraṛṛado ringannu asasabare.

2 TESALONIKA 3:5

Doronganna Mawu mangehetta si yamiu ana see wotongnge lembon maasunna manungku Ruata marangngu si yamiu wuṛṛu manungku Kristus nangonggollu atatamudda si yamiu.