Su ipando'appa tembonannu tantaran Asyur apan awawoanne lai i yamiu wal᷊ine parene. Arawe i yamiu mangngantimma lai Mesir mangirimmu sasumbala keretan pangalo wuṛṛu tantaran awal᷊o!
Manga seennu udde sarun mangaṛṛo al᷊awo'u pa'aala wuṛṛu wal᷊u'annu. I mangitou sarun makkimunsa'a manga darandungngu wuṛṛu mapaṛṛa'a manga wal᷊enu apan mapia. I mangitou sarun manganu manga watune, manga pappalla wuṛṛu letangnge, wua'udde niramme su tahal᷊oangnga.
Manga mabbawal᷊ungngu anambone nangillembo wuassu manga anumpitanna su langitta! Arawe orassa indi i mangitou nawul᷊i ere saṛṛappalanna apan nani'akka papaidde see tinumalla'a tate asiloanna.
Tirus buatte napararisikku manga tanda batun mangitou wuṛṛu nangombon manambo atonna wul᷊awanna wuṛṛu sal᷊a'a na'oman sara naola'a ere saranapa wiasa ere anne wuṛṛu labbo su lallanna.
Ana waugu ete olangnge udde, ne tumba'u sulal᷊ummu allo massallo i tou sarun maasomba silaka – radda'a, asasusa wuṛṛu al᷊aṛṛutumma. Wuṛṛu i tou sarun tutungannu putungnga, ana waugu Mawu Ruata piate taṛṛino ipakkuungngi tou udde.”