YEREMIA 3:9 - WUKE SUSI WATTI'U AL᷊AL᷊USASSA

⁹ wuṛṛu mangke tawe maapendamma asasili. I tou sinumandaga ana waugu massubba watu wuṛṛu alu, na'oman sara wanua indi naola'a lal᷊eo.

YEREMIA 3:9 Iomraidhean Croise

YESAYA 57:3

Arawe i yamiu, ammul᷊annu taumata marosa, rantate parikisanna! I yamiu tawe mappianne wuassu taṛṛa wal᷊i'immata, taumata apan apulune sussandagga wuṛṛu mabbal᷊u'u watanganne!

YESAYA 57:6

Nariaddi naṛṛinote i yamiu mangammullu manga watu mal᷊ewakka wua isudde. Eteudde wageangngu! Ete su manga watu udde lai i yamiu nallal᷊innu anggore wuṛṛu nangonggollu gandumma. Unnu pahinu i Ya'u mal᷊uassu sarangkanambone udde?

YEREMIA 10:8

Longonna wuṛṛu woddo mangitou sarangkanambone ana waugu mongannu tumba'u alu sangkabuwu, tawe maapangaṛṛa'a apa apan pia gunane.

YEREMIA 16:18

Rosa wuṛṛu al᷊al᷊eo mangitou sarun Ta'u iwal᷊issa ringannu ṛuumanna paarua anambone, ana waugu i mangitou buatte nandal᷊eo wanua-U ringannu manambo paal᷊uanna. Manga paal᷊uanna udde tawe niawane ere asuangnga.”

YEREMIA 2:27

I yamiu sarun pansilianna, ana waugu alu sampaddi waggoanni i yamiu iamangnga wuṛṛu watu sambau waggoanni yamiu inangnga. I yamiu wal᷊inewe rumanta ringang-Ku, ewe'e nanantang-Ku. Arawe napawe nirumanta asasusa, ete i Ya'u apan waggoanni yamiu tadea'u rumanta manal᷊amatta si yamiu.

YEREMIA 2:7

Watukku wanua apan masuwukka i Ya'u nanguntuddi mangitou tadea'u maatemma manga hessine wuṛṛu al᷊awo'a apan mapia poiaroddi. Arawe isudde leta-U nilal᷊eo mangitou wuṛṛu pussa'a-U niola'i mangitou maarantinna.

YEREMIA 3:2

Annama'o paningngara, su manga puiddu wuidda! Tampa suapa apan taambe niddantannu inai sumandaga? Ere taumatan Arab su wadda'u anne, etearoddi lai i'o ua'ianna si winggin dal᷊anna uaṛṛaddo taumata apan uaa apulunu. I'o nalluhudda wanua indi ringannu sasandaga wuṛṛu al᷊al᷊eonu.

YEHEZKIEL 16:17

Wuassu lal᷊ogakka wul᷊awanna wuṛṛu sal᷊a'a apan Ta'u nionggolla si'o, niolangngu manga paal᷊uanna taumata esakka, ana see i'o sinumandaga ringannu manga paal᷊uanna udde.

YEHEZKIEL 23:10

I tou nitatol᷊e mangitou ringannu tawe addanne, see nipaten hal᷊ele, wuṛṛu al᷊aṛṛanange niṛṛampassa. Suapan tampa nasimme udde naola'a ipagahatto manga wawine.

YEHEZKIEL 23:21

Ei Oholiba i'o mappulu manul᷊e al᷊al᷊eo apan niolangngu sutempo i'o ta'e dario'a sutempo taumatan Mesir maapulunu.)”

YEHEZKIEL 23:3

Sutempo saṛṛen tumuwo, itarua uatana'a su Mesir. Poiaroddi itarua niawul᷊iannu perawanne, see itarua nabbal᷊i masandaga.

HOSEA 2:2

Mawu nabbisara, “Ei manga ana-U, inangngu wal᷊ine awing-Ku, wuṛṛu i Ya'u wal᷊ine awingnge. Ana waugu udde, hattoa'e i tou tadea'u i tou tate ma'ionolaanna lal᷊eo wuṛṛu sumandaga apia.

HOSEA 4:12

I yamiu maddorongnga tatantiro wuassu alu sampaddi! Ta'inna sambua mammasingkatta si yamiu apa apan apulu singkatanni yamiu! I yamiu naal᷊ihidda sangkatou awingnga apan sussandaga; i yamiu nanantang-Ku wuṛṛu nanantillu watangannu su manga mawu waine.

YOEL 1:19

I ya'u ma'iontolla Si'o, oh Mawu ana waugu manga wadda'u nannal᷊o mangke naṛṛangu mamara manga aluanna lai naṛṛangu wuṛṛu nate naal᷊ihidda ere nisoṛṛobbu putungnga.

MATIUS 5:32

Arawe tempo indi Ya'u mabbisara si yamiu; isai-sai manantangngu awingnge manimbe wawine udde tawe sinumandaga, i tou napaola'u awingnge udde sinumandaga, amungkangngu awingngi tou udde ma'awingnga apia. Wuṛṛu isai-sai ma'awingnga ringannu wawine apan suete nitantangnga udde, sinumandaga lai.”