TITUS 1:4 - WUKE SUSI WATTI'U AL᷊AL᷊USASSA

⁴ Titus, eteudde i'o atonna-tonna ana'u, ana waugu i'o wuṛṛu i ya'u suaddio'a suete nangimanna si Kristus. I ya'u mangantimma doronganna Ruata Iamangnga wuṛṛu Kristus Yesus Ratum Punnu Sal᷊amatti ite, mangonggolu al᷊amatta wuṛṛu paddarame si'o.

TITUS 1:4 Iomraidhean Croise

LUKAS 2:11

Allo indi su soan Daud nasungkangke Ratum Punnu Sal᷊amatti yamiu, eteudde i Kristus, Mawu.

YOHANES 4:42

I mangitou nabbisara wawine udde, “Orassa indi yami mangngimanna, wal᷊inewe ana waugu wisaranu si yami, arawe ana waugu i yami sassane suete naaringikka si Tou, wuṛṛu masingkatta manungku i Tou atonna Punnu Sal᷊amattu Runia.”

ROMA 1:12

Pandumangku eteudde ana waugu i ite su sambau buatte nangimanna Mawu Yesus Kristus, ne i ite wotongnge lai uatatohassa sangkatou ringannu sangkatou.

ROMA 1:7

Ana waugu udde i ya'u namoṛṛettu suratta indi si yamiu. Antimanna Ruata Iamangngi ite wuṛṛu Mawu Yesus Kristus mangonggolu al᷊amatta wuṛṛu al᷊al᷊uassa si yamiu.

2 KORINTUS 12:18

I ya'u suete nandolokki Titus inai mattembo si yamiu, wuṛṛu i ya'u nandolokku tuṛṛangnga waine apan Saṛṛani inai su sambau ringanni tou. Apa Titus nanganu auntunganna wuassi yamiu? Arawe iambua mammanara ringannu pandumma apan uasul᷊ungnga wuṛṛu ma'ola'a ringannu inolaanna apan uasul᷊ungnga!

2 KORINTUS 2:13

Arawe i ya'u tawe matammuda ana waugu taambe napassomban tuṛṛangngi ite Titus poiaroddi. Ne i ya'u naddorongke mapul᷊e su manga taumata su tampa udde see inaite watukku Makedonia.

2 KORINTUS 4:13

Sulal᷊ummu Wuke Susi pia bisara arendi, “I ya'u mangngimanna ana waugu udde ya'u mabbisara.” Ne ringannu atatohassu mangngimanna ereudde lai, yami mabbisara ana waugu i yami mangngimanna.

2 KORINTUS 7:6

Arawe aadiangkamanna, Ruata sidutu mannohassa naungngu taumata apan nial᷊iwune, i Tou nalluassa si yami ringannu darantan Titus.

2 KORINTUS 8:16

Lembon maadiangkamanna i yami su Ruata ana waugu i Tou suete na'ola'a si Titus maṛṛimadda ere i yami mantul᷊ungngi yamiu.

2 KORINTUS 8:23

Su ola'i Titus, i tou udde hawe'u, apan mammanara ringangku mantul᷊ungngi yamiu. Wuṛṛu su ola'u tuṛṛangnge darua udde, apan inai suadio'a ringanni tou, ete i mangitou udde taumata apan nirolokku manga jamaatta wuṛṛu naola'a sambau awawantugi Kristus.

2 KORINTUS 8:6

Ana waugu udde i yami nandolokki Titus – apan nanattaku manara indi – tadea'u i tou manassu manara apan mapia indi su wallatti yamiu lai.

GALATIA 2:3

Titus, apan uaammungnga si ya'u, eteudde sangkatou taumatan Yunani, arawe i tou tawe niwata'a tumuṛṛutta atorannu sunatta,

GALATIA 3:26

Ana waugu i yamiu mangngimanna si Kristus Yesus, ne i yamiu uaaukka ringanni Tou; wuṛṛu ana waugu udde i yamiu maola'a al᷊aṛṛana'u Ruata.

GALATIA 3:28

Sulal᷊ummu olangnge indi tate lai paṛṛalane su wallatu taumatan Yahudi wuṛṛu taumata wal᷊ine Yahudi, su wallatu allangnga wuṛṛu tawe allangnga, su wallatu esakka wuṛṛu wawine. I yamiu sarangkanambone sambau ana waugu Kristus Yesus.

EFESUS 1:2

I ya'u, Paulus, rasulli Kristus Yesus wuassu apulun Duata, mangngantimma doronganna Ruata Iamangngi ite wuṛṛu Mawu Yesus Kristus mangonggolu al᷊amatta wuṛṛu paddarame si yamiu.

1 TIMOTIUS 1:12

I ya'u maadiangkamanna si Kristus Yesus Mawun kite. I Tou suete nangonggolu atatohassa si'u ipangimbe si Tou, wuṛṛu i Tou mammendama manungku i ya'u wotongnge su manara udde,

2 TIMOTIUS 1:1

Timotius, ana'u apan aranguanna! I ya'u Paulus, namoṛṛetu suratta indi si'o, wuṛṛu mangngantimma doronganna Ruata Iamangnga wuṛṛu Mawun kite Kristus Yesus mangonggolu al᷊amatta, darangngu wuṛṛu paddarame si'o. Wuassu apulun Duata, i ya'u nitenega naola'a rasulli Kristus Yesus wuṛṛu nirolokka mamasingkatu wiakka apan pina'iren Duata. Wiakka udde nisengkammi ite ana waugu i ite uaaukka ringanni Kristus Yesus.

2 TIMOTIUS 4:10

ana waugu Demas suete nanantangku ana waugu nandangute runia indi. I tou nanute watukku Tesalonika. Kreskes nabatukken Galatia, wuṛṛu Titus watukku Dalmatia.

TITUS 1:3

Su tempo apan suete nitantunna, Ruata mapaal᷊iatta'u paaire-Ne udde sulal᷊ummu tanata-Ne. Tanata udde suete niwal᷊o si'u, wuṛṛu i ya'u namasingkattu tanata udde ana waugu darolokku Ruata Punnu Sal᷊amatti ite.

TITUS 2:13

Orassa indi i ite tantal᷊anna uaraṛṛaddo Allo apan aantimanni ite udde; su Allo udde runia sarun maasilo awawantugi Yesus Kristus, eteudde Mawu Ahewal᷊anne wuṛṛu Ratun Punnu Sal᷊amatti ite.

2 PETRUS 1:1

Manga tuṛṛangnga apan atonna-tonna mangngimanna ere i yami! Yesus Kristus, eteuddde Ruata wuṛṛu Ratun Punnu Sal᷊amatti ite, namalan kite mangngimanna si Tou, ana waugu i Tou pia paa'ola'a apan su ṛinone. Suratta indi wuassi Simon Petrus, sangkatou allangnga wuṛṛu rasullu Mawu Yesus Kristus.

2 PETRUS 1:11

Ringanni aroddi yamiu sarun onggol᷊annu taṛṛino sumutta su Araratuanna apan saran mal᷊annu-l᷊annu wuassu Mawu wuṛṛu Ratun Punnu Sal᷊amatti ite Yesus Kristus.

2 PETRUS 2:20

Taumata apan maaillal᷊a Mawu wuṛṛu Punnu Sal᷊amatti ite Yesus Kristus, napallose wuassu taṛṛinon runia apan maal᷊uhuda taumata. Arawe amungkangu sal᷊imurine i tou niasametta apia na'oman sara tawe naaroapa manga taṛṛino udde, ne ola'u taumata udde panginsueanne maddal᷊eoanne lai wuassu paarorone.

2 PETRUS 3:18

Ṛinone i yamiu lembon maapendamma al᷊amattu Mawu Yesus Kristus, Mawu wuṛṛu Punnu Sal᷊amatti ite, wuṛṛu ṛinone i yamiu lai lembon maaillal᷊a si Tou. Daralo si Tou, orassa indi wuṛṛu ma'oman sara mal᷊annu-l᷊annu! Amin. Tabea wuassi yami, Petrus

2 PETRUS 3:2

I ya'u mandolokka tadea'u i yamiu mannaungnga manga wisara apan rorone suete niwisara manga nabi Ruata, wuṛṛu parentan Mawu. Ratum Punnu Sal᷊amatta apan niapassingkatu manga rasul si yamiu.

1 YOHANES 5:14

Wuṛṛu i ite waṛṛani sumaruanna Ruata, ana waugu i ite mangngimanna manungku i Tou naddaringikka aal᷊iomanni ite, amungkangu i ite maddorongnga apa apan uatuṛṛuta su apulu-Ne.

YUDAS 1:3

Manga tuṛṛangnga apan arangnguanna! I ya'u atonna-tonna pia pandumanna mamoṛṛettu suratta si yamiu su ola'u asasal᷊amatta apan suete niapendamanni ite suaddio'a. Arawe orassa indi ya'u pia pandumma mangaṛṛa'a si yamiu ringannu suratta indi tadea'u i yamiu siddutu mammanara maddea'a pangangimanna apan paassate nionggolu Ruata ma'oman sara mal᷊annu-l᷊annu su al᷊aṛṛanang-Nge.