TAHIUL᷊E 17:15 - WUKE SUSI WATTI'U AL᷊AL᷊USASSA

¹⁵ Panutukka paapia-pia, tadea'u taumata apan itenegi yamiu maola'a ratunu, eteudde taumata apan nipilen Mawu Ruatanu. I tou ṛinone sangkatou wuassu walahanna sassane; imbaṛṛangnga mapatenegu sangkatou taumata raho maola'a ratunu.

TAHIUL᷊E 17:15 Iomraidhean Croise

2 SAMUEL 5:1

Wua'udde anambon piaṛṛa'u manga ruanganni Israel nirumantate ringanni Daud su Hebron wuṛṛu nabbisara si tou, “Yami indi tuṛṛangngi Tuangnga.

2 SAMUEL 5:2

Ro'en dorone, ewe'e lai sutempo i Saul ta'e uaparenta si yami, masokka lai i Tuangnga mamiaṛṛa'u tantaran Israel napawe inaite mapapangalo, see lai Mawu buatte naddiandi si Tuangnga manungku ete i Tuangnga apan mamiaṛṛa'u al᷊aṛṛanang-Nge wuṛṛu maola'a ratun mangitou.”

1 TAWARIKH 12:23

Sutempo i Daud su Hebron manambo tantara apan masiṛṛangke naammuli tou. I mangitou nassumbala si Daud tadea'u i tou wotongnge maola'a ratu mallol᷊ossa si Saul, ere buatte pina'iren Mawu. Reenganni mangitou ere manansunna indi: Wuassu ṛuanganni Yehuda 6.800 su atoune, nasuungnga ringannu allungnga wuṛṛu sambeangnga. Wuassu ṛuanganni Simeon 7.100 tantara apan masiṛṛongke. Wuassu ṛuanganni Lewi: 4.600 su atoune. Tantaran Yoyada uapiaṛṛa'u papapulunni Harun: 3.700 su atoune. Manga tuṛṛangngi Zadok, sangkatou tantara saṛṛen tumuwo apan waṛṛani: 22 su atoune – sarangkanambone tembonannu alahanna. Wuassu ṛuanganni Benyamin (ṛuanganni Ratu Saul): 3.000 su atoune; anamboanne wuassu ṛuanganni Benyamin sidutu tuttuṛṛuta si Saul. Wuassu ṛuanganni Efraim: 20.800 taumata apan tinumelengnga sulal᷊ummu amonanne sambau-sambau Wuassu ṛuanganni Manasye su samba'a waṛṛattu Sal᷊ukku Yordan: 18.000 su atoune apan nipile mapatenegi Daud maola'a ratu Wuassu ṛuanganni Izakhar: 200 piaṛṛangnge ringannu tantaran mangitou; manga piaṛṛangnge udde pande manantunnu apa apan ṛinone manarannu tumana'u Israel sutempone Wuassu ṛuanganni Zebulon: 50.000 su atoune apan pande mappaattu al᷊awo'u lutangnga, uasaddiate mapapangalo; ete i mangitou udde manga taumata apan matuṛṛutta wuṛṛu apangimananna Wuassu ṛuanganni Naftali: 1.000 su atoune piaṛṛa'a suadio'a ringannu 37.000 tantara apan nasuungnga ringannu allungnga wuṛṛu sambeangnga Wuassu ṛuanganni Dan: 28.600 su atoune apan nal᷊atite Wuassu ṛuanganni Asyer: 40.000 su atoune apan nasaddiate mapapangalo Wuassu manga ṛuanganna su samba'a ra'in Sal᷊ukku Yordan eteudde Ruben, Gad wuṛṛu sambageanganna wuassu ṛuanganni Manasye: 120.000 su atoune apan pande mappaattu al᷊awo'u hatin lutangnga.

1 TAWARIKH 22:10

Ete anangngu esakka udde apan mapararisikku Wal᷊e-U. I tou sarun maola'a ana-U wuṛṛu i Ya'u sarun maola'a iamangnge. Adderan araratuannu Israel sidutu sarun su papapulunne saran mal᷊annu-l᷊annu.’ ”

1 TAWARIKH 28:5

I tou nangonggolu manambo ana'a si ya'u wuṛṛu wuassu anambon ana'u udde i Tou namile si Salomo iapaparenta Israel, araratuannu Mawu.

DARALO 2:2

Manga Ratun dunia sangkawuatta wuṛṛu manga tembonanne ma'ire lumawanga Mawu wuṛṛu ratu apan nipile-Ne.

DARALO 2:6

Wisara-Ne, “Su Sion wui-U apan susi buatte Ta'u nitenega ratu nipile-U.”

DARALO 89:20

Sutempo dorone sulal᷊ummu sambau sondappa, I'o nabbisara su manga allang-Ngu apan matuṛṛutta, “I Ya'u buatte nantul᷊ungngu sangkatou atumannaṛṛane, sangkatou apan Ta'u nipile wuassu tumana'u soa apan Ta'u nitanggakka.

YEREMIA 2:25

Israel, imbaṛṛangnga i'o tumal᷊angnga mangenggenna manga monganna, wuṛṛu imbaṛṛangnga mangintul᷊i mamaggo si mangitou, sal᷊immurine leddanu mal᷊essa wuṛṛu tonggol᷊annu mamara ana waugu marou. ‘Tawe, i ya'u tawe suṛṛinone maawelengnga,’ i'o mabbisara, ‘ana waugu i ya'u marangngu manga monganna, wuṛṛu mappulu tumantalongnga si mangitou.’ ”

YEREMIA 30:21

Ratu apan mamarenta si yamiu inasapputanne wuassu walahannu. Ringannu tawe go'ane i tou sarun mangundani-U napawe i tou Ta'u waggoanna sumaruanna si Ya'u. Ana waugu isaite apan waṛṛani sumaruanna si Ya'u ringannu apulune sassane? I yamiu sarun maola'a uma-U wuṛṛu i Ya'u mabbal᷊i Ruatanu. I Ya'u, Mawu apan namasingkattu udde.”

MATIUS 22:17

Ana waugu udde, wal᷊oa'e si yami Iamangnga: Tumuṛṛuttu atorannu agamang kite, wotongngewe mamaekka wose si Kaisar ara'e tawe?”

1 SAMUEL 10:24

Wua'udde i Samuel nabbisarate su tumana'u soa, “Eteindi taumata apan nipilen Mawu, taweddu panumandinganne suwallatti ite sarangkanambone.” Anambon walahanna udde hinumio, “Wiakke ratu!”

1 SAMUEL 16:3

Ana see wal᷊oite paranta'a i Isai su darohan pangangonggollu sasamba udde. I Ya'u sarun mamasingkatta apa apan ṛinone olaannu. Taumata apan Ta'u nita'e si'o, ṛinone itenegu maola'a ratu.”

1 SAMUEL 8:5

wuṛṛu nabbisara si tou, “Daringiṛṛewe Papa, i Papa timmadete wuṛṛu manga ana'i Papa tawe nangaṛṛussa pallal᷊aghu Papa. Nariaddi mappianne i Papa manenegu sangkatou ratu tadea'u yami pia ratu ere lai manga walahanna waine.”