TAHIUL᷊E 12:3 - WUKE SUSI WATTI'U AL᷊AL᷊USASSA

³ Ṛaea'e manga mezbah mangitou wuṛṛu ṛimunsa'a manga diṛṛine watu apan a'antimanni mangitou pia taṛṛinone. Tambuna'a manga hambaranni Asyera, wuṛṛu ṛimunsa'a manga paal᷊uanna sassubbanni mangitou, na'oman sara manga monganna udde tate subbanna lai su tampa udde.

TAHIUL᷊E 12:3 Iomraidhean Croise

1 MARARATU 14:15

Mawu sarun makkuumannu Israel ma'oman sara umio'a ere nammalo sulal᷊ummu ua'e. Mawu sarun manawutta tumana'u Israel wuassu wanua apan mapia indi apan nionggollu Mawu su al᷊amonan mangitou. I tou sarun manal᷊iawukki mangitou watukku samba'an Sal᷊ukku Efrat, ana waugu i mangitou napaasopan asasa'u-Ne ringannu na'ola'a manga paal᷊uanni monganna Asyera.

1 MARARATU 15:13

Iupungnge wawine, i Maakha, niapaaddone wuassu manarane Inangngu ratu, ana waugu i tou buatte na'ola'a paaluanna sassubbanna apan masandaga hunan Asyera, mongannu asasuwukka. I Asa napaṛṛa'a paal᷊uanna udde wuṛṛu nisoṛṛobba su Wawal᷊annu Kidron.

2 MARARATU 11:18

Wua'udde tumanangnge tinumal᷊anga wuṛṛu nanggohakku kuilli Baal. Mezbah see lai manga paal᷊uanne niṛṛimunsa'a, wuṛṛu i Matan imammi Baal nipate su saruannu manga mezbah-mezbah udde. I Yoyada nangatokku mandariaga iapariaga Wal᷊en Mawu,

2 MARARATU 18:4

I tou nanggohakku manga tampa pasasubbanna monganna, wuṛṛu napaaṛṛaan manga palene see lai nanggohakku manga paal᷊uannu Mongannu Asyera. I tou lai nakkimunsa'a atoanna witu'a niola'i Musa apan isassago Nehustan. Ana waugu naddatingngu tempo udde, taumatan Israel ta'e mannutunga amania ipangaddata atoanna witu'a udde.

2 MARARATU 23:14

Manga pale monganna wuṛṛu paal᷊uannu monganni Asyera niapaaṛṛa'a, ana see leta'a pina'olaanna manga pale wuṛṛu manga paal᷊uanna udde niomboanni Yosia ringannu manga duṛṛin taumata.

2 TAWARIKH 14:2

Asa naal᷊uassa naungngu Mawu Ruatane ringannu na'ola'a atatul᷊idda wuṛṛu apapia.

2 TAWARIKH 14:3

I tou nanggohakku manga mezbah walahanna waine wuṛṛu manga tampa passubbanna paal᷊uanna. Manga wal᷊en monganna niṛṛimunsa'a, wuṛṛu manga diṛṛin paal᷊uannu Monganni Asyera niṛṛaane.

2 TAWARIKH 19:3

Salaiwe aroddi piaddu lai apapia si Tuangnga. i Tuangnga buatte nandammen anambon paal᷊uannu Monganni Asyera apan sassubbannu tumana'u soa wuṛṛu i Tuangnga buatte nattinsahadda mabbiakka tumuṛṛuttu apulun Duata.”

2 TAWARIKH 31:1

Napawe ramea nuddusse, tumanangnge sarangkanambone inaite su al᷊awo'u soa su Yehuda, ana see nanggohakku manga pale pasasubbanna, naṛṛa'an manga paal᷊uanna apan niaparisikka hunan Mongannu Asyera, wuṛṛu nanggohakku manga mezbah see lai manga tampa passubbanna paal᷊uanna. I mangitou na'ola'a aroddi lai su manga tampa waine su Yehuda, see su wageangngu leta'i Benyamin, Efraim, wuṛṛu Manasye. Wua'udde i mangitou sarangkanambone napul᷊ete su wanuane sambau-sambau.

2 TAWARIKH 34:3

Napawe 8 tonna i Yosia naola'a ratu, su uukka ta'e dario'a, i Yosia nanattakke mattaṛṛamawu Ruata apan sassubbanni Ratu Daud iupungnge. Appattu tonna wua'udde i tou nanattakke nanggohakku manga tampa passubbanna paal᷊uanna, manga paal᷊uannu Monganni Asyera, wuṛṛu manga paal᷊uanna waine.

DARALO 16:4

Wala'ewe taumata apan massubba manga monganna aatambanna asasusane. I ya'u maddiri mangonggolu sasamba su manga monganna, ewe'e lai maddiri managon aranni mangitou.

SASABANGNGA 23:13

Daringiṛṛete sarangkanambone apan buatte Ta'u niwisara si'o. Imbaṛṛangnga massubba manga Mawu waine, ewe'e lai managgon aranne lai arie.”

SASABANGNGA 23:24

Imbaṛṛangnga massubba manga paal᷊uanna mallal᷊u'adda si mangitou wuṛṛu imbaṛṛangnga mattanno ola'i mangitou mattaṛṛamawu. Ṛimunsa'e manga paal᷊uanna mallal᷊u'addi mangitou udde wuṛṛu paddite manga diṛṛi watu apan nipaatti mangitou pattaṛṛamawuanna.

SASABANGNGA 34:13

Nariaddi, imbaṛṛangnga ma'ola'a aroddi, arawe paṛṛaa'a manga mezbah mangitou, ṛimunsa'a manga palem paal᷊uanni mangitou wuṛṛu tuwangke manga diṛṛin Asyera, monganni mangitou.

YESAYA 27:9

Arawe manga rosan Israel tumba'u wotongnge ampunganna amungkangngu mezbah manga monganna ihilingnga al᷊ussa naal᷊ihidda apukka. Anambon tampan amania wuṛṛu hambarannu Monganna Asyera ṛinone ṛimunsaanna lai.

YEREMIA 17:2

Manga taumatanu mattaṛṛamawu su manga mezbah wuṛṛu manga diṛṛin paal᷊uanna apan buatte nilanginna hunan Dewi Asyera su anambon aaluanna apan mapaṛṛampunga, su manga puiddu wuidda,

HOSEA 2:17

I Ya'u sarun tate mamalan tou managgon aranni Baal apia, ma'oman sara aranna udde sarun timbul᷊ianannu taumata.

MIKHA 5:14

Sulal᷊ummu asasa'u-U apan wahewallu i Ya'u sarun mabbalissa al᷊al᷊eon anambon walahanna apan maddiri tumuṛṛutta si Ya'u.”

ZAKARIA 13:2

Su allo udde sarun Ta'u pappasanna arannu manga paal᷊uanna wuassu leta'a indi, na'oman sara tate saran sangkatou apan mannaungnga. Anambon taumata apan mangnga'u watanganne nabi sarun Ta'u limbuaṛṛanna suadio'a ringanni mangitou apan niasuttanu ghṛṛaho mallinga.

REENGANNA 33:52

i yamiu ṛinone mallimbuakka anambon tumana'u wanua udde. Ṛimunsa'e anambon paal᷊uanni mangitou wuassu watu wuṛṛu atta'a see lai manga tampa patataṛṛamawuanni mangitou.

TAHIUL᷊E 12:4

Su tempo i yamiu massubba Mawu Ruatanu, ariewe mattanno ola'u manga taumata udde massubba manga monganni mangitou.

TAHIUL᷊E 7:25

Tambuna'e manga paal᷊uanna apan sassubbanni mangitou. Arie umanggangu sal᷊a'a ara'e wul᷊awanna apan ua'ele si tou wuṛṛu imbaṛṛangnga manganu hunanu sassane. Amungkangngu i yamiu lumawangnga parenta udde i yamiu sarun mate, ana waugu Mawu Ruatanu udde maddantinnu pasasubba paal᷊uanna.

TAHIUL᷊E 7:5

Ana waugu udde, hogaṛṛa'e manga mezbah manga walahanna udde, ṛimunsa'a manga diṛṛi watu apan sassunnanni mangitou maṛṛaubba, watanga'a manga waneṛṛan Asyera, wuṛṛu tambuna'e manga paal᷊uanna apan sassubbanni mangitou.

SONDAPPA 13:1

Wua'udde i ya'u naasilo sambau winatangnga nilumapputa wuassu lal᷊ummu tahal᷊oangnga. I tou pia tatandunge mapul᷊o wuṛṛu puane pitu. Suapan tatandunge pia araposan araratuanna, wuṛṛu suapan puane uawoṛṛetta sambau aranna aal᷊uandaga su Ruata.

MAL᷊AṚṚUUNGNGA 2:2

Ana waugu udde i yamiu tawe wotongnge ma'ola'a pa'aire ringannu tumana'u wanua indi. Manga meddan sasamban mangitou ṛinone ihohakki yamiu.’ Arawe i yamiu tawe tinumuṛutta parenta-U. I yamiu na'ola'a al᷊aṛaene!