SONDAPPA 7:17 - WUKE SUSI WATTI'U AL᷊AL᷊USASSA

¹⁷ ana waugu Ana'u Domba apan ua'ianna su pattangngannu adderan araratuanna udde sarun maola'a mallal᷊u'addi mangitou. I Tou sarun mangehetta si mangitou watukku al᷊imatan ua'em pabbawiakka. Wuṛṛu Ruata sarun mamedda al᷊awo'u allo mata wuassu mata mangitou.”

SONDAPPA 7:17 Iomraidhean Croise

DARALO 22:26

Supattangannu ammul᷊annu taumata i ya'u maddalo Si'o, ana waugu sarangkanambone apan buatte niolang-Ngu. Su saruannu taumata apan mangngimanna i ya'u nangonggolu sasamba apan ta'u pina'ire.

DARALO 23:5

I'o nanaddia andeangnga si ya'u su saruannu matan see'u. I'o nanal᷊oho si ya'u naola'a raho apan aaddatanna. I'o nanaru si ya'u ua'e apan mangkatemanga manambo-nambo.

DARALO 28:9

Sal᷊amatewe al᷊aṛṛanang-Ngu, oh Mawu, al᷊amatewe manga taumata pussaa-Nu. Pattingkaola'e ere sangkatou mallal᷊u'adda si mangitou, wuṛṛu riagaite i mangitou saran mal᷊annu-l᷊annu.

YESAYA 12:3

Naal᷊ihidda ua'e masunge ma'al᷊uassa taumata marou, etearoddi lai i yamiu lullala'a ana waugu niapasal᷊amattu Ruata.”

YESAYA 25:6

Su Wuiddu Sion, Mawu Apan Lembontaṛṛino sarun manaddia sal᷊iwangnga su anambon walahanna su runia. I Tou nangimben kanna apan atemanganne wuṛṛu anggore apan buatte nipile.

YESAYA 25:8

Mawu Apan Lembontaṛṛino sarun makkimunsa'a papate saran mal᷊annu-l᷊annu! I Tou sarun mamedda allo mata wuassu al᷊awo'u hatin taumata, wuṛṛu mapaaraun asasusa apan papasannanannu uman-Ne su ahewallu runia. Mawu buatte nabbisara, wuṛṛu olangnge udde sarun mariaddi.

YESAYA 30:19

Ei i yamiu apan uatana'a su Yerusalem, i yamiu tawe sidutu mangke lulluai. Mawu pia aakkanna, wuṛṛu ringannu mal᷊ihakka sumimbakka si yamiu amungkangngu sumal᷊ande maddorongnga tul᷊unganna si Tou.

YESAYA 30:25

Su allo manga tanda batu seennu nipangaloanna wuṛṛu manga taumatane nipate, suapan bowone wuṛṛu wuidda sarun mapa'elekku eṛṛesannu sal᷊ukka.

YESAYA 35:10

Manga taumata apan nipallossu Mawu sarun mapul᷊e; i mangitou sumuttate soan Yerusalem ringannu u'ui, hati mangitou matilangnga ana waugu lal᷊umanna'a awasa. I mangitou sarun lumuassa wuṛṛu lumala'a; asasusa wuṛṛu sasal᷊iomanna mangke nawul᷊ite.

YESAYA 40:11

Naal᷊ihidda sangkatou mallal᷊u'adda winatangnga i Tou napaddul᷊i ammul᷊an-Ne; i Tou sassane nangammulli mangitou. Manga ana'u domba nisal᷊uru-Ne, ringannu masaṛṛionto'a i Tou mangngehetta manga inangngene.

YESAYA 49:9

Taumata apan nitaṛṛo su tattupanna Ta'u iapasabbanga; apan su tampa marandumma Ta'u iapidda su asasemakka. Ewe'e lai wuidda apan lol᷊okka i mangitou tawe atalanne, su al᷊o'engngu lal᷊anna nasaddiate anna.

YESAYA 51:11

Ne manga taumata apan nipallossu Mawu sarun mapul᷊e i mangitou sumuttate su Yerusalem ringannu paggahahio hati mangitou matilangnga ana waugu al᷊al᷊uassa tutune. I mangitou lulluassa wuṛṛu lullala'a, asasusa wuṛṛu sasal᷊iomanna mangke nawul᷊ite.

YESAYA 60:20

Ete si'o pia matannallo apan tawe umattuppa, wuṛṛu wul᷊anna apan tawe mansa'a. Ana waugu i Ya'u Mawu maola'a mananemakka apan tutune si'o tempon lal᷊alonu sarun masue.

YESAYA 65:19

I Ya'u sassane sarun lumuassa ana waugu Yerusalem, wuṛṛu lumala'a ana waugu tumanangnge. Su soa udde tate lai lal᷊uai, wuṛṛu tate lai aintul᷊i ma'iontolla.

YEREMIA 2:13

Uma-U ma'ola'a rosa hatine darua: i mangitou tinumal᷊iudda si Ya'u, al᷊imatang kua'e apan mangngonggollu wiakku taumata; i mangitou nallanginna hunan batanganne tampang kua'e lassutta apan tawe maataṛṛangnga ua'ene.”

YEREMIA 31:9

I mangitou u'amatta ringannu allo mata apan mappinapi, Ta'u niwinalatanna wuṛṛu Ta'u niehetta i mangitou. Ta'u niapidda i mangitou niumamattu tampa apan manambo ua'ene, niummatta su lal᷊anna ratakke su tampa i mangitou tawe matara. Su Israel, i Ya'u maola'a Iamangnga; Efraim uddewe ana-U pahul᷊une.”

YEHEZKIEL 34:23

I Ya'u sarun manenegu sangkatou ratu apan ere allang-Ku Daud, tadea'u maola'a mallal᷊u'addi mangitou, wuṛṛu i tou sarun mappadul᷊i si mangitou.

MIKHA 5:4

wuṛṛu i Tou sarun mangonggollu paddarame. Napawe tantaran Asyur mamangalo wanuan kite manggohakku tanda'a watun kite, i ite sarun mandolokku manga piaṛṛa'i ite apan atohasanne iapapangalo si mangitou. Manga piaṛṛa'i ite sarun mamaddon Asyur ringannu lutangnga, wuṛṛu manal᷊amatta si ite wuassu liman mangitou.

MIKHA 7:14

Oh Mawu, lu'arawe uman-Nu, umatta nipile-Nu. I mangitou uatana'a marau su mahurangnge, su pattangngannu leta'a apan masuwukka. Wala'ewe i mangitou maasomba anna su wadda'u nannal᷊on Basan wuṛṛu su Gilead ere sutempo dorone.

MATIUS 2:6

‘I'o Betlehem, su wanua Yehuda, i'o atonna-tonna wal᷊inewe addio'anne su wallattu al᷊awo'u soa ahunanne su Yehuda. Ana waugu inasabanganne wuassi'o sarun dumanta sangkatou piaṛṛangnge, apan sarun mangehetta al᷊aṛṛana-U Israel.’ ”

MATIUS 5:4

Lal᷊umanna'a su taumata apan massusa naungnge; Ruata sarun malluassa naungngi mangitou!

YOHANES 10:11

Tumba'u i Ya'u mallal᷊u'adda apan mapia. Mallal᷊u'adda mapia mannantillu niawa-Ne ipanal᷊i manga domba-Ne.

YOHANES 10:14

Tumba'u i Ya'u mallal᷊u'adda apan mapia. Ere lai Iamangnga maaillal᷊a si Ya'u, wuṛṛu i Ya'u lai ma'aillal᷊a Iamangnga, aroddi lai Ya'u maaillal᷊a manga domba'u wuṛṛu i mangitou lai maaillal᷊a si Ya'u. I Ya'u mannantillu niawa-U ana waugu i mangitou.

YOHANES 4:10

Mawu Yesus sinumimbakka, “Unnu wisara i'o masingkattu aonggolu Ruata wuṛṛu isai madorongnga ma'inumma ringannu, i'o sassane lai sarun madorongnga si Tou ma'inumma, wuṛṛu i Tou sarun mangonggola si'o ua'e apan wiakka.”

YOHANES 4:11

Wawine udde nabbisara, “Mawu tawe sasia, wuṛṛu paṛṛihi indi tumanite mal᷊al᷊umma. Wuassuapa Mawu maasomba ua'e apan wiakka udde?

YOHANES 4:14

“arawe taumata apan ma'inumma ua'e apan Ta'u ionggolla, i tou tawe marou saran mal᷊annu-l᷊annu. Ana waugu ua'e apan sarun Ta'u ionggolla udde maola'a al᷊imatang kua'e sulal᷊ummu wadangnge apan sumabangnga su liudde wuṛṛu mangonggolla si tou wiakka tutune wuṛṛu sara mal᷊annu-l᷊annu.”

WATTI'U MANGA RASUL 20:28

Ṛinone i yamiu uariaga watangannu wuṛṛu riagai lai anambon jamaatta apan suete tinantillu Ghaṛṛahon Ruata si yamiu iapariaga; ana waugu i yamiu suete nitenega maola'a mandariaga jamaatta udde. Ṛinone i yamiu uariaga jamaattu Ruata udde naal᷊ihidda ere mallal᷊u'adda uariaga dombane, ana waugu Ruata suete na'ola'a jamaatta udde pussaa-Ne sassane sulal᷊ummu papaten Anang-Nge sassane.

1 PETRUS 5:2

tadea'u yamiu mallu'adda ammul᷊annu domba apan tinantillu Ruata si yamiu. Lu'arete i mangitou ringannu al᷊al᷊uassu naungnga su ereapa ipaapulun Ruata, wuṛṛu arie ringannu ipabbawata'a. Arie lai ma'ola'a manaranu ana see maasomba auntunganna, ewe'e ana waugu i yamiu atonna-tonna maapulu mangimbe.

SONDAPPA 14:4

I mangitou udde manga taumata apan sidutu na'ukkassa ere maṛṛuala susi, ana waugu tawe uaaukka suadio'a ringannu wawine. I mangitou uatantalongnga Ana'u Domba udde suapan tampa i Tou inai. Wuassu wallatu anambon taumata, tumba'u i mangitou apan suete nipallosa maola'a sasamba apan paarorone su Ruata wuṛṛu su Ana'u Domba.

SONDAPPA 21:22

I ya'u tawe naasilo Wal᷊en Ruata su soa udde, ana waugu Wal᷊en Ruatane eteudde Mawu sassane, Ruata Lembon Taṛṛino, wuṛṛu Ana'u Domba udde.

SONDAPPA 21:23

Soa udde tate mappandumma semakku matannallo ara'e semakku wul᷊anna, ana waugu awawantugu Ruata mananemakke, wuṛṛu eteudde Ana'u Domba sol᷊one.

SONDAPPA 21:4

I tou sarun mamappasa alawo'u allo mata wuassu mata mangitou. Papate sarun tate lai, asasusa, lal᷊uai, ara'e al᷊aṛṛusa'itta tate lai. Manga inolaanna tabbe nawul᷊ite!”

SONDAPPA 21:6

See i Tou nabbisara, “Nasuete! Ete i Ya'u paarorone wuṛṛu pangudusanne; ete i Ya'u Mawu apan wuassu Panattaṛṛanne ma'omam Panginsueanne. Suapan taumata marou, Ta'u iapa'inumma ringannu tawe bawaekke, wuassu al᷊imatan ua'e apan mangngonggolu wiakka.

SONDAPPA 22:1

Mala'ekatta udde namantingida si ya'u sal᷊ukka apan ua'ene mangngonggolu wiakka. Sal᷊ukka udde sussal᷊endapa naal᷊ihidda kristal wuṛṛu mangngelekka wuassu adderan araratuannu Ruata wuṛṛu Ana'u Domba udde,

SONDAPPA 4:11

“O Mawu, O Ruatang kami! Tumba'u I'o sassane apan wotongnge manengkama daralo, addata wuṛṛu taṛṛino. Ana waugu ete I'o apan na'ola'a sarangkanambone, wuṛṛu wuassu apulu-Nu lai sarangkanambone udde suete nariaddi wuṛṛu wiakka.”

SONDAPPA 5:6

Wua'udde i ya'u naasilo sambau Ana'u Domba apan uarisikka supattangngannu adderan araratuanna udde, papal᷊iwutannu sire appata riadianna wuṛṛu anambon piaṛṛange. Ana'u Domba udde aellehanna naal᷊ihida ere suete nipototta. I tou pia pitu tatandu'a wuṛṛu pitu mata; eteudde pitu Ghaṛṛahon Ruata apan suete nirolokka su ahewallu runia.