SASABANGNGA 33:16 - WUKE SUSI WATTI'U AL᷊AL᷊USASSA

¹⁶ Ereapa taumata sarun maasingkatta manungku I'o mal᷊uassa si ya'u wuṛṛu su walahanna indi amungkangngu I'o tawe mantul᷊ungngi yami? Darantan Mawu su pattangnganni yami sarun paṛṛalane si yami wuassu manga walahanna waine su runia.”

SASABANGNGA 33:16 Iomraidhean Croise

2 SAMUEL 7:23

Su ahewallu runia tawe walahanna ere Israel. Israel sambau walahanna apan buatte nipallossu Mawu wuassu patataṛṛuallangnga tadea'u maola'a al᷊aṛṛanang-Ngu sassane. Al᷊awo'u inolaanna apan bahewalla wuṛṛu maatiangnga apan niolang-Ngu si mangitou, na'ola'a aran-Nu tinumelengnga su ahewallu runia. Manga walahanna waine suadio'a ringannu manga monganni mangitou buatte nilimbuaṛṛan-Nu sutempo al᷊aṛṛanang-Ngu inaite mapapangalo.

1 MARARATU 8:53

I'o, oh Mawu Ruata, buatte namile si mangitou wuassu wallattu walahanna tadea'u maola'a uman-Nu sassane, ere buatte niwisara-Nu si mangitou wuassi allang-Ngu Musa, sutempo I'o nangehetta al᷊amonan kami sinumabbangnga wuassu Mesir!”

DARALO 147:20

I Tou tawe na'ola'a aroddi su walahanna waine, i mangitou tawe maaillal᷊a manga tita-Ne. Paddalote Mawu!

SASABANGNGA 34:10

Unnu Mawu si Musa, “Orassa indi i Ya'u ma'ola'a pa'aire ringannu walahannu Israel. Su saruannu matan mangitou i Ya'u sarun ma'ola'a manga al᷊aṛṛindu'a apan taambe saran paassa niola'a su anambon balahanna su runia. Anambon balahanna sarun maasilo manga al᷊aṛṛindu'a apan sarun Ta'u olaanna, ana waugu i Ya'u, Mawu sarun ma'ola'a sambau apan ma'ata'utta si yamiu.

SASABANGNGA 34:9

Wisarane, “Mawu, amungkangngu I'o atonna-tonna ma'apulu'u, i ya'u sumal᷊ande, doronganna Mawu tumantalongnga si yami. Walahanna udde atonna mangke tawe maddaringikka, arawe ampungewe al᷊al᷊eo wuṛṛu rosan kami wuṛṛu sengkamawe yami maola'a al᷊aṛṛanang-Ngu sassane.”

SASABANGNGA 8:22

Arawe i Ya'u sarun ma'ola'a al᷊aṛṛaene su leta'u Gosyen, su tampa al᷊aṛṛana-U uatana'a. Poiaroddi tawe lango, tadea'u i yamiu masingkatta manungku i Ya'u, Mawu apan na'ola'a udde.

IMAMATTA 20:24

Leta'a apan ala wuṛṛu masuwukka udde buatte Ta'u pina'ire si yamiu, nariaddi Ta'u ionggola maola'a pussaanu. Ete i Ya'u Ruatanu apan naṛṛae kamiu wuassu manga walahanna waine.

IMAMATTA 20:26

I yamiu Ta'u iṛae wuassu manga walahanna waine tadea'u mabbal᷊i pussa'a-U. I yamiu ṛinone susi ana waugu ete i Ya'u Mawu, wuṛṛu i Ya'u susi.

REENGANNA 14:14

wuṛṛu i mangitou sarun mabbatti'a manga taumata su wanua indi, apan buatte na'aringikka manungku I'o, Mawu, uarundinganna si yami. I mangitou na'aringikke lai manungku I'o naipasilon batangannu si yami su tempo I'o u'amatta su saruanni yami sulal᷊ummu pal᷊iaṛṛannu winabbawa su tempo allo, wuṛṛu sulal᷊ummu pal᷊iaṛṛannu putungnga su tempo ṛabbi.

REENGANNA 23:9

Wuassu puiddu manga wowone i ya'u ma'asilo si mangitou; wuassu manga wuidda i ya'u ma'ellega si mangitou. Pa'ellega sambau walahanna apan uaṛṛae tawe nasutta su wageangngu walahanna waine.

MATIUS 1:23

“Sangkatou maṛṛuala sarun mangilloṛṛo wuṛṛu mangunsiwen sangkatou ana'a esakka. Ana'a udde sarun isaggo aranne Imanuel.” (Imanuel eteudde wisaran Ibrani atappasanne, “Ruata su sampunna ringanni ite”.)

2 KORINTUS 6:17

Ana waugu udde, tantanga'e manga taumata apan tawe maaillal᷊a Ruata udde, wuṛṛu pattingkaṛṛaeten batangannu wuassi mangitou. Arie paa'aukka ringannu apa apan maarantinna ne i ya'u sarun manengkamma si yamiu.

TAHIUL᷊E 4:34

Apa pia sambau monganna apan baṛṛani mangal᷊appa sambau walahanna wuassu wallatu manga walahanna isudde ana see ma'ola'a si mangitou al᷊aṛṛanang-Nge sassane, ere buatte niola'u Mawu Ruatanu si yamiu su Mesir? I yamiu naasilo sassane ereapa Ruata ringannu atatohassa apan bahewalla nandantan asasilaka wuṛṛu pangalo, nammanara manga al᷊aṛṛindu'a wuṛṛu na'ola'a manga inolaanna apan bahewalla.

TAHIUL᷊E 4:7

Walahanna wahewalla suapa apan pia monganne aroddi aranine amungkangngu pappandumanna ere Mawu Ruatan kite maranin kite? I Tou sinumimbakka suapan tempo i ite sumal᷊ande maiontolla si Tou.