SASABANGNGA 24:3 - WUKE SUSI WATTI'U AL᷊AL᷊USASSA

³ Ana see i Musa inaite wuṛṛu namasingkatta su walahanna udde anambon parenta wuṛṛu atorannu Mawu. I mangitou sarangkanambone sinumimbakka sangkaṛṛindo'a, “Yami ma'apulu tumuṛṛutta anambon parenta apan niwisaran Mawu.”

SASABANGNGA 24:3 Iomraidhean Croise

2 TAWARIKH 15:14

Ringannu tingikka ma'ikkatta i mangitou nassalu su Mawu manungku i mangitou sarun mangaggassa paaire udde. Wua'udde i mangitou ringante pasi pangintul᷊i wuṛṛu nattiuppa trompeta.

2 TAWARIKH 15:15

Tumana'u Yehuda sarangkanambone lulluassa ana waugu i mangitou buatte na'ola'a paaire udde ringannu ahewallu naungnge. I mangitou mal᷊uassa maddalo Mawu, wuṛṛu Mawu lai mal᷊uassa manengkamma si mangitou. I tou nangonggolu atatammudda su leta'i mangitou.

DARALO 50:5

Wisara-Ne, “Ammul᷊a'e anambon al᷊aṛṛana-U, apan buatte nabaiddu paaire si Ya'u, wuṛṛu ringannu nanohassu sasamba apan niṛata.”

SASABANGNGA 19:8

I mangitou sarangkanambone sinumimbakka ringannu naṛṛindo'a, “Yami mappulu tumuṛṛutta al᷊awo'a apan nirolokku Mawu,” wuṛṛu sasimbakka udde nippasingkatti Musa su Mawu. Ana see unnu Mawu si Musa, “I Ya'u sarun rumanta ringannu aoosanu winabbawa apan maappala; manga taumata sarun maddaringikka si Ya'u mabbisara si'o, wuṛṛu manattakka orassa udde i mangitou sarun sidutu mangngimanna si'o.

SASABANGNGA 24:2

Tumba'u i'o sassane wotongnge rumanta mangundani-U. Ingana'a waine tawe wotongnge rumanta marani-rani, ewe'e tumanangnge lai tawe wotongnge suma'a wowone indi.”

SASABANGNGA 24:7

Wua'udde i tou nanganu wuken pa'aire apan wawoṛṛetannu manga titan Mawu, wuṛṛu niwasan tou ringannu tingikka ma'ikkata su walahanna udde. Unni mangitou, “Yami ma'apulu tumuṛṛutta Mawu wuṛṛu mapaamattu al᷊awo'u parenta-Ne.”

YEREMIA 11:4

Pa'aire udde buatte Ta'u niola'a ringannu al᷊amona mangitou sutempo i mangitou Ta'u niapidda sinumabbangnga wuassu Mesir, wanua apan ere naraka si mangitou. I Ya'u nandolokki mangitou matuṛṛutta si Ya'u wuṛṛu ma'ola'a al᷊awo'a apan Ta'u iparenta si mangitou. Orassa indi buatte Ta'u niwal᷊o lai su taumatan Yehuda wuṛṛu tumana'u Yerusalem manungku napawe i mangitou matuṛṛutta si Ya'u, i mangitou sarun maola'a uma-U wuṛṛu i Ya'u Ruata mangitou.

HAGAI 2:5

Sutempo i yamiu sinumabbangnga wuassu Mesir, i Ya'u buatte naddiandi manungku sidutu sarun mallu'adda si yamiu. Wuṛṛu orassa indi lai i Ya'u ta'e ual᷊u'adda si yamiu. Nariaddi i yamiu ariete suminggawangnga.

MALEAKHI 2:10

Wal᷊inewe i ite sarangkanambone uatahuanna Iamangnga apan uasul᷊ungnga? Wal᷊inewe i ite sarangkanambone niola'u Ruata apan uasul᷊ungnga? Amungkangngu aroddi, anio i ite uawawahia paaire wuṛṛu ringannu aroddi namahia paaire apan niola'u Ruata ringannu al᷊amonang kite?

TAHIUL᷊E 11:1

“Pandangngute Mawu Ruatanu, wuṛṛu paatuṛṛutte al᷊awo'u parenta-Ne.

TAHIUL᷊E 4:1

Ana see i Musa nabbisara su walahanna udde, “Paatuṛṛute anambon tita apan ta'u niaṛṛa'a si yamiu, tadea'u i yamiu wotongnge mabbiakka ma'oman sara mamanua su leta'a apan nionggolu Mawu Ruatan al᷊amonanu si yamiu.

TAHIUL᷊E 4:45

Olangnge udde niola'a napawe i mangitou sinumabbangke wuassu Mesir wuṛṛu uatana'e su wawal᷊anne samba'an da'i, Sal᷊ukku Yordan, uasasaruannu soan Bet-Peor. Wageangngu leta'a udde lanna'u paparentanni Sihon, ratun taumatan Amori, apan dorone uaparenta su soan Hesybon. I Musa wuṛṛu walahannu Israel namaddon tou su tempo i mangitou sinumabbangnga wuassu Mesir.

TAHIUL᷊E 4:5

Anambon tita udde ta'u niaṛṛa'a si yamiu ere buatte nirolokku Mawu Ruatanu. Tuṛṛute sarangkanambone udde su wanua apan sarun suttanna wuṛṛu atanaanna udde.

TAHIUL᷊E 5:1

I Musa nangammulu anambon balahanna Israel, ana see nabbisara si mangitou, “Manga tuṛṛangnga, paddaringikke manga tita apan ta'u ionggola allo indi. Urumete manga tita udde, wuṛṛu paatuṛṛutte ringannu maadunna.

TAHIUL᷊E 5:31

Arawe i'o Musa, pabelengke wuṛṛu atana'e isindi suadio'a ringang-Ku; i'o sarun Ta'u onggol᷊annu tita wuṛṛu parenta-U. Tantiroa'a si mangitou, tadea'u i mangitou tuttuṛṛutta su wanua apan Ta'u ionggola si mangitou.’

TAHIUL᷊E 6:1

“I Ya'u nirolokku Mawu Ruatanu iapatantiro anambon tita indi si yamiu tadea'u i yamiu ma'ola'a su wanua apan tate mal᷊annu lai atanaanni yamiu.

YOSUA 24:21

Ne manga taumatan Israel udde sinumimbakka, “Tawe! Yami tawe mattaṛṛamawu manga Mawu waine. Yami tumba'u mattaṛṛamawu Mawu sassane!”

YOSUA 24:22

Ana see i Yosua nabbisara, “Ne ete i yamiu sassane maola'a tialane manungku i yamiu buatte nakkawessa manungku tumba'u mattaṛṛamawu su Mawu sassane.” “Atonna,” sasimbakki mangitou, “yammite sassane maola'a tialane.”

YOSUA 24:24

Ana see manga taumata nabbisara si Yosua, “Yami sidutu tumba'u mattaṛṛamawu Mawu, Mawu Ruatan kite. Yami sarun tumuṛutta manga parenta-Ne.”