ROMA 7:6 - WUKE SUSI WATTI'U AL᷊AL᷊USASSA

⁶ Arawe orassa indi i ite tate lai aiitannu titan agama Yahudi. I ite natete wuassu tita apan dorone uaparenta si ite. I ite tate lai tumuṛṛutta ere tatuṛṛuta apan dorone, tuttuṛṛutta tita apan uawoṛṛetta. Orasa indi i ite tumuṛṛutte ringannu ta tuṛṛutta wakku apan nipantingiddu Ghaṛṛahon Duata si ite.

ROMA 7:6 Iomraidhean Croise

YEHEZKIEL 11:19

I mangitou sarun Ta'u onggol᷊annu naungnga apan bakku wuṛṛu pallal᷊agu apan bakku. Naungngi mangitou apan aatikke ere watu sarun Ta'u anuanna wuṛṛu Ta'u hantiannu naungnga apan matuṛṛutta si Ya'u.

YEHEZKIEL 36:26

Ne i yamiu Ta'u onggol᷊annu naungnga apan bakku wuṛṛu ṛingiṛṛanna apan bakku. Naungngu apan maatikka ere watu udde sarun Ta'u hantiannu naungnga apan matuṛṛutta.

ROMA 1:9

I ya'u sidutu uanaungnga si yamiu amungkangngu i ya'u umal᷊iomanna. Ruata matatialane manungku apa apan iwabbatti'u udde atonna. Tumba'u i Tou Ruata apan sassubbangku ringannu ahewallu naungku ringannu namasingkattu Watti'u Al᷊al᷊uassa su ola'u Anang-Nge.

ROMA 12:2

Imbaṛṛangnga mattanno apulun dunia indi. Wala'e Ruata mandiaddi ririnu maola'a wakku, tadea'u i yamiu pia awawal᷊u. Ringannu aroddi yamiu wotongnge maasingkata apulun Duata – eteudde apa apan mapia wuṛṛu apan maal᷊uassa naung-Nge wuṛṛu apan nasuungnga.

ROMA 6:11

I yamiu ṛinone maṛṛangngon ririnu lai mate ana waugu rosa, arawe mabbiakka sulal᷊ummu paa'aukka apan matohassa ringannu Ruata sulal᷊ummu Yesus Kristus.

ROMA 6:19

Ana waugu pasasunnanu aroddi al᷊omene, i ya'u mappaattu manga ola'u patataṛṛuallangnga tadea'u i yamiu wotongnge maasunna. Dorone i yamiu mannantillu ririnu maola'a allangngu manga inolaanna apan maarantina wuṛṛu apan lal᷊eo su pandumanna apan lal᷊eo. Aroddi lai orassa indi, ṛinone i yamiu manantillu ahewallu watanganni yamiu maola'a allangngu apulu Ruata su pandumannu Ruata sassane.

ROMA 6:2

Tawe! Rosa tate lai uataṛṛino si ite, nariaddi, ṛatadde i ite sidutu mabbiakka ringannu ma'ola'a rosa?

ROMA 6:22

Arawe orassa indi yamiu buatte niapaal᷊iu wuassu rosa, wuṛṛu naola'e allangngu Ruata. Auntungannu eteudde manungku i'o mabbiakka tumba'u hunane su Ruata wuṛṛu su olangnge udde sarun mandantan wiakka tutune wuṛṛu saran mal᷊annu-l᷊annu.

ROMA 6:4

Ringannu sasaṛṛani udde i ite nilabingnga su sambau ringanni Kristus wuṛṛu nate suadio'a ringanni Tou, tadea'u su ereapa Kristus niapaawiakka wuassu papate, wuassu taṛṛinon Iamangnga apan mawantuga, aroddi lai i ite wotongnge maapendama wiakka apan wakku.

ROMA 7:1

Manga tuṛṛangku! Tuṛṛangnga sarangkanambone naasingkatte tita udde. Nariaddi yamiu masingkata manungku taṛṛinon tita su sangkatou taumata tumba'u mariaddi amungkangngu taumata udde ta'e wiakka.

ROMA 7:2

Sangkatou wawine apan piate awingnge, tul᷊addane, tuttuṛṛutta titan awingnge amungkangngu awingnge ta'e wiakka. Amungkangngu awingnge natete, i tou nal᷊iute wuassu titan awingnge udde.

ROMA 7:4

Aroddi lai yamiu, manga tuṛṛangku. Su titan agama Yahudi yamiu natete, ana waugu i yamiu buatte niapaaukka ringannu wadangngi Kristus wuṛṛu naola'a pussa'a-Ne apan suete niapaawiakka apia wuassu papate. I Tou niapaawiakka wuassu papate tadea'u i ite maola'a pia gunane su lantakku hatin Duata su al᷊o'engngu pabbiaṛṛani ite.

2 KORINTUS 3:6

Ete i Tou apan na'ola'a si yami mappammanara su sambau paaire apan wakku; paaire apan uaantimma Ghaṛṛahon Duata, wal᷊ine su tita apan uawoṛṛetta. Ana waugu apan uawoṛṛetta udde mangngapiddu papate, arawe Ghaṛṛahon Ruata udde mangngonggolu wiakka.

2 KORINTUS 5:17

Taumata apan buatte naaukka ringanni Kristus, maola'a taumata wakku atonna-tonna. Apan tabbe nal᷊iute – sarangkanambone naola'e wakku.

GALATIA 3:13

Arawe Kristus namallosi ite wuassu awawontogu titan agama. I Tou na'ola'a udde ringannu namalan watangan-Ne awontohanna ana waugu i ite. Ana waugu sulal᷊ummu Wuke Susi uawoṛṛetta, “Niawontohante taumata apan nate niele su alu pangangeleanna.”

GALATIA 6:15

Nisunatta ara'e tawe nisunatta udde tawe maola'a hatto. Apianne eteudde maola'a taumata wakku.

EFESUS 4:24

Ṛinone i yamiu mabbiakka ere taumata wakku apan niola'a uatuṛṛutu apulu naungngu Ruata; eteudde ringannu pallal᷊agu apan atonna, matul᷊idda wuṛṛu susi.

FILIPI 3:3

Sumbal᷊i ete i ite manga taumata apan suete nanarimmattu sunatta apan tutune, wal᷊inewe i mangitou. I ite massubba Ruata ringannu aehettu Ghaṛṛahon Duata sassane, wuṛṛu i ite maadiangkamanna ana waugu i ite mabbiakka su sambau ringanni Kristus Yesus. I ite tawe uatundeeta su manga inolaanna apan a'olaannu taumata.

KOLOSE 3:10

I yamiu orassa indi suete nionggol᷊annu wiakka wakku. I yamiu taumatate wakku, apan sidutu lallimbakuannu mandiriaddine eteudde Ruata, tumuṛṛuttu pahudde sassane. Pandumanne eteudde tadea'u i yamiu maaillal᷊a Ruata ringannu mapia-pia.