ROMA 1:16 - WUKE SUSI WATTI'U AL᷊AL᷊USASSA

¹⁶ I ya'u mangngimanna atonna Watti'u Al᷊al᷊uassa udde, ana waugu Watti'a udde atatohassu Ruata ipanal᷊amatta anambon taumata apan mangngimanna; paarorone taumatan Yahudi, wuṛṛu walahanna waine lai.

ROMA 1:16 Iomraidhean Croise

DARALO 110:2

Wuassu Sion Mawu sarun manggewalla araratuannu; pamarentate manga seennu!

DARALO 119:46

Titanu sarun ta'u iapasingkatta su manga ratu, wuṛṛu sarun tawe maasomba asasili.

YESAYA 53:1

Walahanna udde sinumimbakka, “Isai mangimanna apa apan buatte niaringiṛṛanni yami? Ete sisai buatte niapal᷊iatta'a taṛṛino Mawu?

YEREMIA 23:29

Wisara-U naal᷊ihidda putungnga, wuṛṛu ere darupa apan maaṛṛimunsa'a watu!

MARKUS 8:38

Amungkangngu sangkatou taumata massili mangnga'u si Ya'u wuṛṛu al᷊aṛṛa'U su tempo mal᷊awangnga wuṛṛu lal᷊eo indi, Ana'u Taumata lai massili manga'u taumata udde, su tempo i Tou rumanta apia ringannu taṛṛinon Iamangnge, tatantalongannu manga mala'ekatta apan susi.”

LUKAS 9:26

Amungkangngu taumata massili manga'u si Ya'u wuṛṛu al᷊ara'u, Ana'u Taumata lai massili manga'u taumata udde su tempo i Tou rumanta apia ringannu taṛṛino-Ne, wuṛṛu ringannu taṛṛinon Iamangnga wuṛṛu taṛṛino mala'ekatta apan susi!

YOHANES 7:35

See manga tembonannu Yahudi uawawisarate sangkatou ringannu waine, “Taumata indi inai suapa na'oman sara i ite tawe maasomba si Tou? Apa i Tou inai ringannu manga taumatan Yahudi apan uatana'a su wanua marau su wallattu taumatan Yunani, wuṛṛu mangngaṛṛa'a taumatan Yunani?

WATTI'U MANGA RASUL 3:26

Ana waugu udde Ruata namile Allang-Nge, see nandolokki Tou nirumanta ringanni yamiu paarorone, tadea'u i Tou mangal᷊amatta si yamiu. Olangnge i Tou mangal᷊amatta eteudde na'ola'a manga tuṛṛangnga sarangkanambone nawal᷊u wuassu ola'u wiakki yamiu apan lal᷊eo.”

ROMA 10:17

Ana waugu udde manga taumata mangngimante ana waugu i mangitou naaringikke watti'a, wuṛṛu watti'a niaringiṛṛana ana waugu pia taumata apan namasingkata su ola'i Kristus.

ROMA 15:19

wuṛṛu manga al᷊aṛṛindu'a wuṛṛu manga inolaanna apan wahewalla; sarangkanambone udde wuassu taṛṛinon Ghaṛṛahon Ruata. Watti'u Al᷊al᷊uassa su ola'u Mawu Yesus suete ta'u niapaasingkatta su anambon taumata, nanattaka wuassu Yerusalem na'oman sara watukku Ilirikum.

ROMA 15:29

Amungkangngu i ya'u rumanta ringannu, sulal᷊ummete i ya'u rumanta mangapiddu manambo al᷊amatta wuassi Kristus si yamiu.

ROMA 2:9

Suapan taumata apan maapulu ma'ola'a al᷊al᷊eo sarun masansara wuṛṛu matataṛṛangnga; paarorone taumatan Yahudi, wuṛṛu lai manga walahanna waine.

ROMA 4:11

I tou nisunatta murine, wuṛṛu sunatti tou tumba'u maola'a sambau tatiala manungku Ruata buatte nanengkamma si tou maola'a taumata apan maal᷊uassa naungngu Ruata. I tou tinarimmattu Ruata su tempo i tou taambe tinumuṛṛutta atorannu sunatta. Wuṛṛu Abraham naola'a iamangngu manga taumata apan mangngimanna Ruata, wuṛṛu ana waugu i tou suete tinarimmattu Ruata maola'a sangkatou taumata apan maal᷊uassa naung-Nge, salaiwe i mangitou tawe tumuṛṛutta atorannu sunatta.

1 KORINTUS 15:2

Amungkangngu i yamiu uaagassa atonna su watti'a apan iwabbatti'u udde, ne Watti'u Al᷊al᷊uassa udde manal᷊amatta si yamiu; tabene'e amungkangngu i yamiu mangngimanna ringannu tawe pasasunna.

1 KORINTUS 2:2

Ana waugu i ya'u buatte naddiandi, manungku su al᷊o'engngu allo i ya'u ta'e ringanni yamiu, i ya'u tawe bisarane apa-apa, tumba'u su ola'i Yesus Kristus; ahewal᷊anne manungku i Tou buatte nate su alu arussa.

1 KORINTUS 2:4

Watti'a apan ta'u niapaasingkata si yamiu tawe ta'u niwatti'a ringannu al᷊awo'u wisara apan ipammono'a tumuṛṛutta apanden taumata. I ya'u mabbatti'a udde ringannu lal᷊anna apan mappatiala manungku Ghaṛṛahon Duata uataṛṛino.

1 KORINTUS 9:12

Amungkangngu manga taumata wotongnge mangantimma indi wuassi yamiu, wal᷊inewe yami lai lembon pia taṛṛino wuassi mangitou? Arawe i ya'u taambe nappaattu taṛṛino udde. Arawe i ya'u lembo maapulu maningkul᷊u sarangkanambone udde, wuassu i ya'u mapaal᷊aputu manga inolaanna apan mannal᷊are manara mamasingkatu Watti'u Al᷊al᷊uassa su ola'i Kristus.

1 KORINTUS 9:18

Amungkangngu aroddi, apa bawaekke si ya'u? Indi bawaekke: manungku i ya'u wotongnge mamasingkatu Watti'u Al᷊al᷊uassa udde ringannu tawe mamakkata saran sangkatou iapasumbala si ya'u, ana waugu i ya'u maddiri madorongnga bawaekke su ola'u i ya'u mabbatti'u Watti'u Al᷊al᷊uassa udde.

2 KORINTUS 2:12

Su tempo i ya'u na'omate su Troas ringannu pandumanna mabbatti'u Watti'u Al᷊al᷊uassa su ola'i Kristus, Mawu buatte namu'a lal᷊anna si ya'u ipammanara su tampa udde.

2 KORINTUS 4:4

Monganna lal᷊eo apan uaparenta runia indi nakkapingnga ṛingirannu manga taumata apan tawe mangimanna udde. Monganna apan sidutu mannal᷊are si mangitou tadea'u i mangitou tawe maasilo semakka wuassu Watti'u Al᷊al᷊uassa udde, su ola'u awawantugi Kristus, apan naola'a lihiddu Ruata.

2 KORINTUS 9:13

Wuṛṛu wuassu apapian kamiu udde, manambo taumatan Saṛṛani su Yudea sarun maddalo Ruata ana waugu i mangitou naasilo tatuṛṛuti yamiu su Watti'u Al᷊al᷊uassa su ola'i Kristus apan tatantalonganni yamiu udde. I mangitou lai maddalo Ruata, ana waugu i yamiu naungnge mapia mattahia si mangitou wuṛṛu su anambon taumata waine sarannapa apan pia si yamiu.

GALATIA 1:7

Tumuṛṛuttu atonna tate lai “watti'u al᷊al᷊uassa apan waine”. Tumba'u pia manga taumata apan mammasingkata si yamiu “watti'u al᷊al᷊uassa”, su ola'i Kristus apan niwal᷊elongngi mangitou na'oman sara i yamiu nial᷊iwune.

1 TESALONIKA 2:13

Pia lai sambau hatto waine apan naaola'a si yami sidutu maadiangkamanna su Ruata. Hatto udde eteudde, manungku su tempo i yami mammasingkatu watti'u Ruata si yamiu, i yamiu naddaringikka wuṛṛu nanengkamma watti'a udde wal᷊ine ere watti'a wuassu taumata, arawe watti'a apan atonna-tonna wuassu Ruata. Ete i Tou apan mammanara sulal᷊ummu watangannu apan mangngimanna si Kristus.

1 TIMOTIUS 1:11

Al᷊aṛṛa'a udde niasombanganna sulal᷊ummu Watti'u Al᷊al᷊uassa apan pananal᷊iawukke tinantilla si ya'u, eteudde Watti'u Al᷊al᷊uassa wuassu Ruata apan mawantuga wuṛṛu ṛinone raloanna.

2 TIMOTIUS 1:12

Ana waugu udde i ya'u natataṛṛangu sarangkanambone indi, arawe i ya'u sidutu mangngimanna, ana waugu i ya'u masingkata atonna, isai apan pangimanangku. I ya'u mangantimma manungku apa apan suete nitantilli Tou si ya'u, i Tou lai wotongnge maariaga udde saran Allon Kiamatta.

2 TIMOTIUS 1:16

Arawe lal᷊oṛṛon bal᷊en Onesiforus masokkate malluassa naungku. Doronganna Mawu mapaal᷊iatta'u darangngu-Ne si mangitou. Salaiwe i ya'u sulal᷊ummu tuttupanna, Onesiforus tawe masilin inolaangku udde.

2 TIMOTIUS 1:8

Ana waugu udde arie masili mangonggolu tatiala su ola'u Mawun kite, wuṛṛu arie lai masili su ola'u riri'u, apan niṛṛuumanna ana waugu i Tou. Arawe ṛinone i'o ringannu atatohassa wuassu Ruata, sidutu sulal᷊ummu asasusa lai ana waugu Watti'u Al᷊al᷊uassa udde.

IBRANI 4:12

Wisaran Ruata eteudde wisara apan biakka wuṛṛu matohassa; maṛṛoroanna wuassu hal᷊el᷊e rorone ruam ba'a. Wisara udde uusippa ma'oman sara su wallatu niawa wuṛṛu ghaṛṛaho; ma'oman sara su wallattu manga passi'uanna wuṛṛu duṛṛin liudda, na'oman sara maasingkata al᷊al᷊ummu ṛingiranna wuṛṛu apulu naungngu taumata.

1 PETRUS 4:16

Arawe amungkangu i yamiu uatataṛṛangnga ana waugu i yamiu taumatan Saṛṛani, ariewe masili ana waugu inolaanna udde. Paadiangkamante su Ruata, manungku i yamiu uaapiddu aranni Kristus.