NEHEMIA 9:8 - WUKE SUSI WATTI'U AL᷊AL᷊USASSA

⁸ Niasangkal᷊an-Nu i tou satia Si'o wuṛṛu matuṛṛutta. Ana see niolang-Ngu ringanni tou paaire apan matohassa. Leta'u Kanaan, Het wuṛṛu Amori, leta'u Feris, Yebus wuṛṛu Girgasi, sarangkanambone udde I'o mangonggolla si tou; maola'a tampa tatanaannu anambon papapulunne. Wua'udde I'o nanipussu, paaire udde si tou, ana waugu I'o matul᷊idda wuṛṛu satia.

NEHEMIA 9:8 Iomraidhean Croise

PANDARIADDI 12:7

Mawu naipasilon batangan-Ne si Abram wuṛṛu nabbisara si tou, “Ete indi wanua apan Ta'u ionggolla su papapulunnu.” Ana see i Abram napararisikku sambau mezbah hunan Mawu apan buatte naipabilon batangan-Ne si tou.

PANDARIADDI 15:6

I Abram nangimante Mawu, wuṛṛu ana waugu udde Mawu nanengkamma lai si tou maola'a taumata apan ma'al᷊uassa naung-Nge.

PANDARIADDI 22:12

“Imbaṛṛangnga mamate ana'a udde ara'e olaannu ereapa i tou,” unnu Mawu sulal᷊ummu mala'ekata udde. “Orassa indi i Ya'u masingkatta manungku i'o maadatta wuṛṛu matuṛṛutta si Ya'u, ana waugu i'o tawe nanol᷊a'a manantillu anangngu tinggassa udde si Ya'u.”

2 SAMUEL 22:31

Inolaannu Ruata nasuungnga, paairen Mawu wotongnge apangimananna! I Tou naal᷊ihidda allungnga su sarangkanambone apan uasirungnga si Tou.

1 TAWARIKH 1:14

I Kanaan udde lai al᷊amonan taumatan Yebusi, Amori, Girgasi,

1 TAWARIKH 16:16

Pa'aire udde niolang-Nge ringanni Abraham, wua'udde ringanni Ishak,

EZRA 9:15

Mawu, Ruatan Israel! I'o matul᷊idda, salaiwe aroddi I'o namalan kami wiakka. I yami tawe su tampane sumaruanna aṛṛa'uan-Nu.”

NEHEMIA 9:33

Manara-Nu matul᷊idda, niṛṛuuman-Nu i yami apan marosa; I'o sidutu satia salaiwe i yami napenen sangkulla.

DARALO 116:5

Mawu udde marangngu wuṛṛu matul᷊idda; Ruatan kite napenen aakkanna.

SASABANGNGA 3:17

Wuṛṛu i Ya'u buatte nakkawessa mangapiddi mangitou sumabangnga wuassu Mesir, su tampa i mangitou a'allangana, wuṛṛu manguntuddi mangitou su sambau wanua apan ala wuṛṛu masuwukka, wanuan balahannu Kanaan, balahannu i Het, i Amori, i Feris, Hewi wuṛṛu i Yebus.

SASABANGNGA 3:8

Ana waugu udde i Ya'u sumossokke mamallossi mangitou wuassu liman taumata Mesir wuṛṛu mangapiddi mangitou sumabangnga wuassu wanua udde mattuddan sambau wanua apan mal᷊alangnga. Letangnge ala wuṛṛu masuwukka, wuṛṛu orassa indi wawanuannu balahannu Kanaan, balahannu i Het, i Amori, i Feris, i Hewi wuṛṛu i Yebus.

YEHEZKIEL 33:24

“Ei taumata apan mattate, manga taumata apan uatana'a su winalal᷊annu manga soa su leta'u Israel mabbisara, ‘i Abraham naasomba ahewallu leta'a indi, sumbal᷊i i tou tumba'u sangkatou. I ite indi manambo reenganne, nariaddi leta'a indi mabbal᷊i pussa'ang kite.’ ”

REENGANNA 13:29

Taumatan Amalek uatana'a su wageangngu timukku wanua udde; taumatan Het, Yebus wuṛṛu Amori uatana'a su wageangngu wuidda; arawe taumatan Kanaan uatana'a su wageangngu al᷊o'engngu tahal᷊oangnga wuṛṛu su al᷊o'engngu Sal᷊ukku Yordan.”

REENGANNA 23:19

Ruata tawe ere taumata apan hampa sumassilla wuṛṛu apulune mangngawusu. Amungkangngu Ruata maddiandi i Tou sarun mangatonna! Napawe i Tou mabbisara, udde sarun matipussa!

WATTI'U MANGA RASUL 13:22

Napawe Ruata nanossokki tou wuassu aiananne, Ruata nanenegi Daud maola'a ratu mangitou. Wuṛṛu ete indi apan iwabal᷊on Ruata su ola'i Daud, ‘I ya'u suete naasomba si Daud ana'i Isai udde sangkatou apan ma'al᷊uassa naung-Ku. Tumba'u i tou taumata apan mangngamattu apulu-U.’

TAHIUL᷊E 26:3

Roote ringannu imam apan mammanara orassa udde wuṛṛu wal᷊oa'a si tou, ‘I ya'u mamasingkatta Mawu Ruatanu manungku i ya'u na'omate su wanua apan buatte nipa'ire-Ne su iupungngu al᷊amonan kite apan ionggola si ite.’

TAHIUL᷊E 32:4

Mawu mallal᷊u'addu apan matohassa, manara-Ne nasuungnga, wuṛṛu anambon dal᷊anne matul᷊idda. Ruatanu matammuda, tawe pallal᷊inga si Tou, I tou ma'ola'a apapia wuṛṛu mangke suṛṛinone.

TAHIUL᷊E 7:1

“Mawu Ruatanu sarun mangapiddi yamiu watukku wanua apan sarun wanuanni yamiu, wuṛṛu manambo walahanna apan limbuaṛṛanna wua'isudde. Su saruannu matanu i Tou sarun mallimbuakka pitu walahanna apan maggewal᷊anna wuṛṛu mattohasanna wuassi yamiu, eteudde manga taumatan Het, Girgasi, Amori, Kanaan, Feris, Hewi wuṛṛu Yebus.

TITUS 1:2

Al᷊aṛṛa'a udde pinangiananne wuassu antimma manungku i ite sarun manengkamma wiakka tutune wuṛṛu mal᷊annu-l᷊annu. Ruata suete na'iren wiakka udde ro'en panattaṛṛannu runia indi – wuṛṛu tawe mariaddi Ruata mangawusu.

IBRANI 11:17

Ana waugu mangngimanna lai, i Abraham nanantilli Ishak maola'a sambau sasamba su tempo i tou niannamannu Ruata. Ete tumba'u si Abraham Ruata nangonggolu pa'aire-Ne, arawe i Abraham ma'apulu nanantillu anangnge apan man sambau udde.

IBRANI 6:18

Darua inolaanna udde apan tawe wotonge mawal᷊u: Ruata tawe mangawusu su ola'u pa'aire wuṛṛu sasalu-Ne. Ana waugu udde, i ite apan uasirungke ringannu Ruata, nionggol᷊annu sasasa apan matohassa ipangagassa antimma apan uawilatta su saruanni ite.

YOSUA 11:23

Ahewallu wanua udde niaṛṛon Yosua ere buatte nirolokku Mawu si Musa, ana see nionggola su walahannu Israel maola'a pussa'a mangitou. Wanua udde nitahia, wuṛṛu suapan ṛuanganna naasomba sambau wageangnge. Walahannu Israel nangillol᷊ote napapangalo wuṛṛu wanuane lai mal᷊anganna wuṛṛu su al᷊al᷊uassa.

YOSUA 11:3

I tou lai nandolokku taumata inai ringannu taumatan Kanaan su samba'an baṛṛatta wuṛṛu samba'an da'in Yordan, ringannu taumatan Amori, Het, Feris, wuṛṛu taumatan Yebus su wageangngu panenteanna, see lai taumatan Hewi su wawal᷊annu Wowo Hermon su leta'u Mizpa.

YOSUA 23:14

Orassa indi nia'omante tempone i ya'u sarun mate. I yamiu sarangkanambone, sangkatou-sangkatou masingkatta atonna manungku Mawu Ruatanu sueten ngonggolu al᷊awo'u apapia apan buatte nipa'ire-Ne. Al᷊awo'u pa'aire-Ne buatte nitipussa, tawe saran sambau apan tawe niatipussa.

YOSUA 9:1

Watti'a su ola'u manga auntungannu Israel tinumelengke su anambon ratu su samba'an baṛṛata Sal᷊ukku Yordan – su panenteanna, su wawal᷊annu wowone, wuṛṛu su leta'a su al᷊o'engngu apannu Tahal᷊oanga Tangane ma'oman sara araune su Wowon Libanon su samba'an sawannaka; eteudde manga ratun Het, Amori, Kanaan, Feris, Hewi wuṛṛu Yebus.

1 YOHANES 1:9

Arawe amungkangu i ite manga'u al᷊awo'u rosan kite su Ruata, i Tou sarun manipussa paaire-Ne wuṛṛu ma'ola'a atatul᷊idda. I Tou sarun mangampunga manga rosan kite wuṛṛu mangukkasa si ite wuassu al᷊awo'u al᷊al᷊eon kite.