IBRANI 2:14 - WUKE SUSI WATTI'U AL᷊AL᷊USASSA

¹⁴ Ana waugu manga taumata apan nisaggon i Tou ana'a udde, eteudde sangkatou taumata apan wotonge mate, ne Mawu Yesus sassane naola'a uasul᷊ungngi mangitou wuṛṛu mabbiakka sulal᷊ummu ola'u taumata. I Tou na'ola'a aroddi, tadea'u ringannu papate-Ne i Tou wotongnge maṛṛimunsa'a Setanna apan uataṛṛino papate.

IBRANI 2:14 Iomraidhean Croise

PANDARIADDI 3:15

I'o wuṛṛu wawine udde sarun matatiakka, papapulunne wuṛṛu papapulunnu sidutu uasaseetta. Papapulunne sarun maṛṛimunsa'a puanu, wuṛṛu i'o sarun mangi'i paalli mangitou.”

YESAYA 25:8

Mawu Apan Lembontaṛṛino sarun makkimunsa'a papate saran mal᷊annu-l᷊annu! I Tou sarun mamedda allo mata wuassu al᷊awo'u hatin taumata, wuṛṛu mapaaraun asasusa apan papasannanannu uman-Ne su ahewallu runia. Mawu buatte nabbisara, wuṛṛu olangnge udde sarun mariaddi.

YESAYA 53:12

Ringannu naungnga mal᷊uassa i tou nanantillu wiakke wuṛṛu nasutta su reengannu taumata lal᷊eo. I tou namasanna rosa taumata nambo wuṛṛu niumal᷊iomana tadea'u i mangitou ampunganna. Ne i tou Ta'u nionggol᷊annu taumata manambo maola'a hadiane, wuṛṛu i tou naasomba wageangnge suadio'a ringannu manga taumata apan matul᷊idda.”

YESAYA 7:14

Orassa indi, Mawu sassane sarun mangonggollu tatiala si yamiu: Sangkatou maṛṛuala apan pia illoṛṛo sarun manungkangngu sangkatou ana'a esakka apan aranne isaggo Imanuel.

HOSEA 13:14

Walahanna indi sarun tawe Ta'u iapasal᷊amatta wuassu taṛṛinon runian taumata nate. Ei papate, paasabbarea'e raddangngu! Amata'e manaranu apan maaṛṛimunsa'a udde! I Ya'u sarun umakkannu walahanna indi apia.

MATIUS 16:17

“Auntunganna si'o Simon ana'i Yona!” unnu Mawu Yesus, “Ana waugu wal᷊inewe taumata apan namasingkattu olangnge udde si'o, arawe Iamangku su surga.

MATIUS 25:41

See Ratu udde sarun mabbisara su manga taumata su samba'an aiṛṛiNe, ‘Roote wua isindi, manga taumata lal᷊eo! Suttate sulal᷊ummu putungnga apan tawe iapadumma, apan suete nissaddia su Setanna wuṛṛu su manga ralol᷊oṛṛanne!

YOHANES 1:14

Ṛengetanna naola'e taumata, I Tou uatana'a su wallatti ite, wuṛṛu i ite suete naasilo awawantu-Ge. Awawantuga udde suete sinengkammi Tou Ana'u Iamangnga tinggassa. Sulal᷊ummi Tou i ite naasilo Ruata wuṛṛu darangngu-Ne si ite.

YOHANES 12:24

Mangke atonna wisara-U indi: Amungkangngu gandumma sambatu tawe iasi'a su leta'a wuṛṛu mate, i tou ta'e matatana'a sambatu. Arawe amungkangngu watun gandumma udde mate, wakkute udde i tou mabua manambo.

ROMA 14:9

Kristus natete wuṛṛu nabbiakke apia. Ana waugu udde i Tou naola'a Mawu manga taumata wiakka wuṛṛu lai manga taumata apan natete.

ROMA 8:3

Apa apan tawe ia'ola'u titan agama, ana waugu i ite taumata lome, udde buatte niola'u Ruata. Ruata napaaraun rosa wuassu pallal᷊agun taumata ringannu nandolokku anang-Nge sassane, apan nirumanta ere sangkatou taumata apan marosa, ana waugu manubussa rosa.

1 KORINTUS 1:28

Ruata namile apa apan aellehanna mawawo, asiangnga, wuṛṛu lai sassunannu runia indi tawe gunane, tadea'u Ruata maṛṛimunsa'a apa apan aellehannu runia indi apianne.

1 KORINTUS 15:50

Pandumangku, manga tuṛṛangnga, eteudde: wadangnga apan niola'a wuassu ṛaṛṛa wuṛṛu ṛemessa, tawe maasutta su Runia Wakkun Duata; wuṛṛu wadangnga apan wotongnge mate tawe mattatana'a sarangkal᷊o'engnge.

GALATIA 4:4

Arawe napawe su temponete, Ruata mandolokku Anang-Nge su Runia. Anang-Nge udde niasungkanga wuassu sangkatou wawine wuṛṛu mabbiakka su al᷊ungngu parentan titan agama.

KOLOSE 2:15

Su alu arussa udde Kristus na'ola'a al᷊awo'u ghaṛṛaho apan uaparenta wuṛṛu uataṛṛino naola'a tawe atatohanne. I mangitou naola'a wawialannu awadaalla su tempo Kristus nangapiddi mangitou ere taumatan ṛuumanna sulal᷊ummu amamattu awawantu-Ge.

1 TIMOTIUS 3:16

Taweddu saran sangkatou wotongnge massinaada, aroddi ahewalle addapingu agaman kite: I tou namasilon batanganne sulal᷊ummu lihiddu taumata, wuṛṛu niapaal᷊iatta'u Ghaṛṛahon Duata, see aellehannu manga mala'ekatta. Wattinge niapararingikka su wallatu manga walahanna, wuṛṛu i Tou apangimananna su ahewallu runia wuṛṛu niapaasengkenga su surga.

2 TIMOTIUS 1:10

Wuṛṛu orassa indi, Ruata napaal᷊iatta'u al᷊amanlle si ite ringannu darantan Ratun Punnu Sal᷊amatti ite Kristus Yesus. Mawu Yesus napassuṛṛubawan taṛṛinon papate wuṛṛu nangapiddu wiakka sarangkal᷊o'enge sulal᷊ummu Watti'u Al᷊al᷊uassa udde.

IBRANI 10:10

Yesus Kristus suete tinumuṛṛuta apa apan ipaapulun Ruata wuṛṛu nanantillu watanganne maola'a sassamba. Ringannu sasamba udde, apan niolangnge tumba'u paassa ma'oman sara mal᷊annu-l᷊annu, i ite sarangkanambone niwaresi wuassu rosa.

IBRANI 10:5

Ana waugu udde su tempo i Kristus sinumutta su runia, i Tou nabbisara su Ruata, “I'o tawe ma'apulun aonggola wuṛṛu sasamba; arawe I'o suete nanaddia wadanga, si Ya'u.

IBRANI 2:17

Indi atappasanne manungku i Tou ṛinone maola'a uasul᷊unga ringannu manga tuṛṛa-Nge sulal᷊ummu al᷊awo'a. Wuṛṛu ringannu udde i Tou wotongnge maola'a Imam Wahewa apan matuṛṛuta wuṛṛu marangngu. Ringannu manara-Ne udde rosan taumata wotongnge aampunganna.

IBRANI 2:18

Wuṛṛu ana waugu i Tou sassane suete natataṛṛanga wuṛṛu niwono'anna, i Tou naapattul᷊ungu manga taumata apan niaṛṛiaannu wawono'a, ana waugu i Tou sassane suete niwono'anna wuṛṛu natataṛṛanga.

IBRANI 4:15

Imam Bahewalli ite udde wal᷊inewe imam apan tawe maapendama manga al᷊allomeng kite. Arawe i Tou suete niwono'anna sulal᷊ummu al᷊awo'u inolaanna, ere i ite lai sassane; tumba'u i Tou tawe na'ola'a rosa!

IBRANI 9:15

Ana waugu udde i Kristus naola'a Pal᷊alawenne su sambau paaire apan wakku, tadea'u taumata apan suete niwagoannu Ruata wotongnge manengkamma manga al᷊amatta awasa apan suete pina'iren Ruata. Sarangkanambone udde wotongnge mariaddi ana waugu piateddu nate, eteudde i Kristus; wuṛṛu papate-Ne udde namallosu manga taumata wuassu manga pasasal᷊a apan niola'i mangitou su tempo pa'aire paarorone ta'e ipappa'atta.

1 PETRUS 1:20

Kristus nipilen Duata ro'en runia indi taambe niriaddi. Wuṛṛu su miallo-miallo maddanin panginsueannu tempo indi, Tou nirumanta su runia tadea'u i yamiu iapaasal᷊amatta.

SONDAPPA 1:18

Ete i Ya'u i Tou apan wiakka! I Ya'u natete, arawe pa'elege, i Ya'u wiakka saran mal᷊annu-l᷊annu. I Ya'u uataṛṛino papate, wuṛṛu su wowon runian taumata nate.

SONDAPPA 12:9

Naga apan bahewalla udde niramme su liudde! Ete i tou atoanna timmade udde apan aranne Setanna ara'e Ghaṛṛaho Lal᷊eo, apan nangawusu ahewallu runia. I tou niramme su runia su sambau ringannu manga mala'ekanne.

SONDAPPA 2:10

Arie matta'uttu asasusa apan tate mal᷊annu lai apendamanni yamiu. Paanaunge, Setanna sarun mantaṛṛon sangkawageanganna wuassi yamiu sulal᷊ummu tuttupanna, ana waugu ipamono'a si yamiu. I yamiu sarun matataṛṛanga mapul᷊o allo al᷊annune. Ṛinone i yamiu matuṛṛuta si Ya'u ma'oman sara mate, ne i Ya'u sarun mangonggola si yamiu wiakka tutune wuṛṛu saran mal᷊annu-l᷊annu apan maola'a sambau lal᷊antaku naauntunga.

SONDAPPA 20:2

See i tou nanametta naga udde, atoanna timmade, – eteudde Setanna ara'e Ghaṛṛaho Lal᷊eo udde – wuṛṛu niṛṛapussa saṛṛiwu su tonanne al᷊annune.