HOSEA 13:2 - WUKE SUSI WATTI'U AL᷊AL᷊USASSA

² Naddatingngu orassa indi manga taumatan Efraim udde ta'e sidutu ma'ola'a rosa; i mangitou mallanginnu manga paal᷊uanna sal᷊a'a tadea'u subbanna – paal᷊uanna apan niṛṛiinnu ṛingirannu taumata wuṛṛu nilanginnu liman taumata. I mangitou nabbisaram, “Pangongollen sasamba su manga paal᷊uanna indi!” Maaherangnga, taumata mangngari'a paal᷊uanna ana'u sapi!

HOSEA 13:2 Iomraidhean Croise

1 MARARATU 19:18

Arawe 7.000 su atoune su Israel sarun Ta'u iapasal᷊amatta, eteudde manga taumata apan sidutu matuṛṛutta si Ya'u wuṛṛu tawe saran paassa niumal᷊intudda massuba paal᷊uanni Baal ara'e nangari'a.”

2 TAWARIKH 28:13

I mangitou nabbisara, “Imbaṛṛangnga mangapiddu manga taumata niatawanna udde inawarendi! I ite narosate su saruannu Mawu, wuṛṛu manga rosan kite tumaniten manambo tadea'u ipakkuumanni ite. Orassa indi yamiu tumba'u na'ola'a sambau inolaanna apan tumba'u maatamba pasasal᷊an kite.”

2 TAWARIKH 33:23

Arawe uapapaṛṛalan iamangnge, Amon tawe sinumallungngu watanganne, wuṛṛu tawe nabbal᷊i'a ringannu Mawu; ewe'e i tou maddosanna wuassu iamangnge.

DARALO 2:12

al᷊intuddate susaruan-Ne ringannu mangngindo, arie ma'oman sara Mawu mabbal᷊i masa'u wuṛṛu i yamiu pateanna ringannu mal᷊ihakka, ana waugu asasa'u-Ne ṛumenggamma ringannu sangkaṛṛondappa. Lal᷊umanna'a su taumata apan uatullindumma su Mawu!

YESAYA 1:5

Anio i yamiu sidutu mangke mannompolla? I yamiu mappulu iṛṛuumanna lembon awakkatanne lai? Puanu napeneten manga pinsulla, naungnga wuṛṛu ṛingirannu maradda'a.

YESAYA 30:1

Mawu nabbisara, “Nasilakate manga piaṛṛa'u Yehuda, ana waugu i mangitou lullawangnga si Ya'u. I mangitou tinumuṛṛutta manga ṛiinna apan bal᷊ine ṛiing-Ku. I mangitou nabartanda pa'aire apan lumawangnga apulu-U. Ne rosa mangitou pasi ombote.

YESAYA 44:11

Atonna, anambon taumata apan massubba paal᷊uanna sarun masili. Taumata apan nallanginnu paal᷊uanna udde taumata ere i ite. Doloṛṛa'e i mangitou dumarisikka suadio'a; i mangitou sarun matta'utta wuṛṛu masili.

YESAYA 45:20

Mawu nabbisara, “Paasemodde wuṛṛu rantate suadio'a, i yamiu sarangkanambone apan nal᷊iu wuassu manga walahanna! Woddowe eteapa manga taumata apan mangngopassa paal᷊uanna alu, ara'e u'al᷊iomanna su manga monganna apan tawe maapanal᷊amatta.

YESAYA 46:6

Taumata mammu'a dompetta wuṛṛu napasabbangu wul᷊awanne, ana see nanimbangu sal᷊a'ane su timbanganna. I tou nanewa pande ma'ola'a wul᷊awanna niapaola'a paal᷊uanna sassubbanna, wua'udde i tou massubba paal᷊uanna niolangnge.

YESAYA 46:8

Naungete wuṛṛu ṛingira'e, ei manga taumata mapontol᷊osanna!

YEREMIA 10:4

Wua'udde paal᷊uanna sassubbanna udde niloggaṛṛannu wul᷊awanna wuṛṛu sal᷊a'a, ana see nitohassu pa'u ana see tawe manawo.

YEREMIA 10:8

Longonna wuṛṛu woddo mangitou sarangkanambone ana waugu mongannu tumba'u alu sangkabuwu, tawe maapangaṛṛa'a apa apan pia gunane.

YEREMIA 8:5

Arawe anio i yamiu, uma-U, sidutu sussempalla wuṛṛu mannantang-Ku? I yamiu uaagassa matohassa su manga paal᷊uannu, wuṛṛu maddiri mabbelengnga ringang-Ku!

HOSEA 10:1

Israel naal᷊ihidda punnu anggore apan wuane nabbelle'a. Lembon aatambanna awawantuge, lembon aatambanna mezbah apan niolangnge. Lembon manambo anna, lembon mapia lai manga palen paal᷊uanna apan sassubbanne.

HOSEA 10:5

Tumana'u soa Samaria sarun mata'utta; i mangitou wuṛṛu manga imam apan mangimbe sapi wul᷊awanna su Babel udde sarun masusa wuṛṛu lumuai ana waugu al᷊awo'u araṛṛansangngu paal᷊uanni mangitou udde nawul᷊ite.

HOSEA 11:2

Arawe lembon Ta'u wabbagoang ana-Ku udde i tou lembon mangnginda-U lai. I tou nangapiddu sasamba wuṛṛu mannambunnu amania hunan Baal wuṛṛu manga mongana waine.

HOSEA 11:6

Pangalo sarun maddisikka maddatingngu sara lal᷊ummu manga soan mangitou, manga ngara mal᷊oangnga sarun ihohakka, wuṛṛu uma-U pateanna. Udde nariaddi ana waugu i mangitou tuttuṛṛuta apulune sassane,

HOSEA 14:3

Pabbelengke ringannu Mawu wuṛṛu apira'e aal᷊iomanna indi maola'a sasambanu si Tou, “Mawu, ampungewe al᷊awo'u rosan kami, wuṛṛu sengkampe aal᷊iomanni yami indi, ne i yami sarun maddalo Si'o ere buatte pina'ireng kami.

HOSEA 2:8

Inangngu taambe saran paassa manga'u manungku ete i Ya'u apan manggolla si tou gandumma, anggore, lanan zaitun, wuṛṛu al᷊awo'u wul᷊awanna sal᷊a'a apan ipappaanne ipassubba Baal udde.

HOSEA 4:17

Umattu Israel niawono'ante paal᷊uanna. Ana waugu udde wala'e i mangitou.

HOSEA 8:4

Uma-U namile ratu ringannu tawe naddorongnga ṛingidda si Ya'u. I mangitou nanenegu piaṛṛa'a tawe niwal᷊o si Ya'u. I mangitou nanganu wul᷊awanna wuṛṛu sal᷊a'an mangitou wua'udde nallanginnu paal᷊uanna sassubbanna apan pangillul᷊eanne naola'a araṛṛimunsa'i mangitou sassane.

HOSEA 8:5

I Ya'u maddantinu sapi wul᷊awanna apan sassubbannu tumana'u soan Samaria. I Ya'u mangke nasa'u atonna si mangitou. Maddatingngu tingngera i mangitou sidutu mandal᷊eo watanganni mangitou ringannu massubba paaluanna?

HOSEA 8:6

Sapi wul᷊awanna apan sassubbanna su Samaria udde lanna'u lima taumatan Israel! Udde wal᷊ine Ruata, wuṛṛu rinone rimunsaanna!

REENGANNA 32:14

Lumawangnga ere manga iamangngu! I yamiu atonna ammul᷊annu manga taumata marosa apan ma'ola'a asasa'un Mawu nangillembo su walahannu Israel!

ROMA 11:4

Apa sasimbakku Ruata si Elia? Ruata sinumimbakka, “I Ya'u buatte nanantangngu pitu ṛiwu su atoune hunane su riri-U sassane. Taambe saran paassa i mangitou nassubba paal᷊uanni Baal.”

ROMA 2:5

Arawe puan kamiu maattika wuṛṛu maddiri mawal᷊u. Ana waugu udde ete i yamiu sassane apan ma'ola'a ṛuumannu aatambanna awakkane su Allon Kiamatta, napawe Ruata mapaal᷊iatta'u asasa'u-Ne ringannu ṛuumanna apan su ṛinone.

2 TIMOTIUS 3:13

arawe manga taumata lal᷊eo wuṛṛu manga taumata taṛṛa l᷊inga sarun mabbal᷊i lembon al᷊eoanne. I mangitou mallinga taumata waine, wutte'e i mangitou sassane nial᷊inganna lai.

1 SAMUEL 10:1

Wua'udde i Samuel nanganu awo'a apan lal᷊oṛṛoannu lanan zaitun, ana see lana udde nilal᷊inni Samuel su puan Saul, ana see i tou nangari'a si Saul lapiddu nabbisara, “Mawu buatte nanenegu maola'a ratun Israel walahan-Ne udde. I'o sarun mamarenta al᷊aṛṛanang-Nge wuṛṛu mangesakki mangitou wuassu manga seetti mangitou. Indi tatialane si'o manungku Mawu buatte namile si'o maola'a ratun al᷊aṛṛanang-Nge;