EZRA 7:25 - WUKE SUSI WATTI'U AL᷊AL᷊USASSA

²⁵ Tuṛṛangnga Ezra, paata'e asingkatta apan buatte nionggollu Ruata su Tuṛṛangnga, wuṛṛu pamilete manga piaṛṛa'a wuṛṛu manga mallaṛṛuungnga tadea'u mamarenta anambon taumata su propinsi Efrat Waṛṛatta apan mabbiakka tumuṛṛuttu Titan Duatan Tuṛṛangnga. Ṛinone Tuṛṛangnga mangaṛṛa'u Tita udde su anambon taumata apan taambe naasingkatta.

EZRA 7:25 Iomraidhean Croise

PANDARIADDI 41:38

Ana see ratu nabbisara si mangitou, “I ite tawe maasomba taumata waine apan botongnge maasampal᷊iu si Yusuf, ana waugu i tou aehetannu ghaṛṛahon Duata.”

PANDARIADDI 41:39

Ne ratu nabbisara si Yusuf, “Ruata buatte namasingkattu sarangkanambone indi si'o, nariaddi natualage manungku i'o mappandeanna wuṛṛu massingkatanna wuassu al᷊awo'u taumata.

1 MARARATU 3:28

Sutempo walahannu Israel naaringikka putusanni Salomo sulal᷊ummu hatto udde, i mangitou tinumiangnga wuṛṛu mangngaddatta si tou. Ana waugu, nilumiatta'e manungku Ruata buatte nangonggolla si tou asingkatta tadea'u mammanara ringannu atatul᷊idda.

2 MARARATU 17:27

Ana waugu udde ratun Asyur namarenta tadea'u sangkatou imam waussu wallatu manga taumata apan niawawi buatte niwuanga watukku Asyur, iapawelenga apia su Samaria. “Doloṛṛa'a i tou paapul᷊ea'a wuṛṛu paatana'e isudde tadea'u i tou wotongnge mangaṛṛa'a manga taumata udde su ola'u manga titan mongannu wanua indi,” unnu ratu.

1 TAWARIKH 22:12

Wuṛṛu antimanna Mawu Ruatanu mangonggolu asingkatta wuṛṛu pasasunna si'o ipamarenta Israel uasul᷊ungngu manga tita-Ne.

1 TAWARIKH 23:4

Ana see 24.000 su atoune suwallati mangitou niapamanara mallu'adda Wal᷊en Mawu, 6.000 su atoune manarane mangngatokku pamamoṛṛetta wuṛṛu manga hatto pallaruungnga,

EZRA 10:4

Ete i'o apan sarun mapaamatta. I yami sarun massumbala saran kakeewalle si'o. Pammanarate ringannu matohasa ma'oman sara masue.”

EZRA 6:6

Wua'udde i Darius nangirimmu sasimbakka ereindi, “Iwuna'a si Tatnai, gubernure propinsi Efrat Waṛṛatta, wuṛṛu Syetar-Boznai, see manga tenbonanne su Efrat Waṛṛatta. Imbaṛṛangnga manal᷊asa'u manga taumatan Yahudi udde,

EZRA 7:10

I Ezra buatte nanginsue allone su ipanaṛṛassidda Titan Mawu, su mappaamatta see manatiro al᷊awo'u atokke wuṛṛu atoranne su walahannu Israel.

EZRA 7:14

Ana waugu i ya'u wuṛṛu siri pitu mananatiro'u mandolokku Tuṛṛangnga watukku Yerusalem wuṛṛu Yehuda manaṛṛassidda olangnge wuṛṛu ma'ellega tanne Titan Duata apan buatte nitantilla su Tuṛṛangnga, atonna-tonna niapaamatta.

NEHEMIA 9:3

Iraraṛṛangngo al᷊annune tallun ka'orassa, buke Titan Mawu, Ruatan mangitou, niwasa si mangitou wuṛṛu al᷊annune talun ka'orassa manansunna i mangitou nanga'u manga rosan mangitou. Wua'udde i mangitou niumal᷊intudda wuṛṛu nassuba Mawu, Ruatan mangitou.

DARALO 19:7

I Tou mammal᷊intaddu langitta wuassu pentakke saran pondole; taweddu naatal᷊angnga wuassu sal᷊ihamme.

AMSAL 2:6

Tumba'u Mawu apan mangonggollu asingkatta; ete wuassi Tou taumata maasomba apande wuṛṛu pasasunna.

AMSAL 6:23

Manga tatantiron hagurangngu naal᷊ihidda sol᷊o apan masemakka; tataghun mangitou mannantiro si'o su lal᷊annu pabbiaṛṛanna apan mapia.

MALEAKHI 2:7

Atonna manaran manga imam mangngaṛṛa'u apan naṛṛino su ola'i Ya'u, Mawu Apan Atanggaṛṛanne. Ete si mangitou tumanangnge ṛinone maiwal᷊o apa apan ipaapullu-U, ana waugu i mangitou udde daroloṛṛang-Ku.

MATIUS 13:52

See Mawu Yesus nabbisara, “Ana waugu udde manga hurun agama apan suete naola'a lal᷊oṛṛon araratuannu Ruata, udde ere sangkatou tatahuannu wal᷊e apan mappasabangngu darotongnge wakku wuṛṛu tabbe, wuassu pangadoanne.”

MARKUS 6:34

Su tempo Mawu Yesus sinumossokka wuassu saalanna, i Tou naasilo taumata manambo. I Tou inumakkanni mangitou, ana waugu i mangitou naal᷊ihidda domba apan tawe mallal᷊u'adde. Ne i Tou nanattakke mangngaṛṛa'u al᷊awo'u al᷊aṛṛa'a si mangitou.

TAHIUL᷊E 16:18

“Su al᷊awo'u soa apan nionggolu Mawu Ruatanu si yamiu, i yamiu ṛinone mamile manga mallaṛṛuunga wuṛṛu manga mamanarane waine ipakkungngu tumana'u soa ringannu atatul᷊idda.

KOLOSE 1:28

Eteudde Kristus apan iwabbatti'i yami su anambon taumata. I yami mapaanaungnga wuṛṛu mangngaṛṛa'a si mangitou sarangkanambone ringannu al᷊awo'u apande. Tuddan kami eteudde tadea'u suapan taumata wotongnge iapidda ringannu Ruata, ere sangkatou taumata apan nahurangke su pangangimanna, ana waugu suete naaukka ringanni Kristus.

YAKOBUS 1:5

Amungkangu pia sangkatou wuassu wallatti yamiu apan woddo, ṛinone i tou sumal᷊ande su Ruata, ne Ruata sarun mangonggolu apande si tou; ana waugu su al᷊awo'u taumata, Ruata sarun mangonggola ringannu naungnga mal᷊uassa wuṛṛu ringannu apendammu darangngu.