1 KORINTUS 1:5 - WUKE SUSI WATTI'U AL᷊AL᷊USASSA

⁵ Ana waugu i yamiu tatahuananten Kristus, ne pabbiaṛṛanu naalate su al᷊awo'u inolaanna. Asingkannu su ola'u al᷊awo'u inolaanna udde tumanite malal᷊umma, wuṛṛu i yamiu masingkata mangaṛṛa'u apapandenu udde.

1 KORINTUS 1:5 Iomraidhean Croise

WATTI'U MANGA RASUL 2:4

I mangitou sarangkanambone naasomba taṛṛinon Ghaṛṛahon Ruata, wuṛṛu nanattakke mabbisara sulal᷊ummu al᷊awo'u manga wisara waine. I mangitou mabbisara tumuṛṛuttu apa apan ia'onggolu Ghaṛṛaho udde si mangitou iapawisara.

ROMA 11:12

Ana waugu walahannu Yahudi nassal᷊a wuṛṛu maddiri tumuṛṛutta apulun Duata, ne manga walahanna waine nial᷊amatannu Ruata. Nangillembo lai amungkangngu paa'aukku walahannu Yahudi ringannu Ruata maola'a mapia; ne maggewal᷊anna lai al᷊amatta apan sarun ionggolu Ruata!

ROMA 15:14

Manga tuṛṛangku! I ya'u mangngimanna manungku manambo atonna apapia si yamiu. I yamiu lai masingkatu sarangkanambone wuṛṛu wotongnge lai mangaṛṛa'a sandingananna.

ROMA 15:4

Sarangkanambone apan nawoṛṛette sulal᷊ummu Wuke Susi udde ipannantiro si ite. Ana waugu al᷊aṛṛa'a apan nisengkammi ite wuassu Wuke Susi mammal᷊u si ite maola'a masabbare wuṛṛu matohassa na'oman sara i ite wotongnge mangngantimma Ruata.

1 KORINTUS 12:10

Su sangkatou nionggol᷊annu taṛṛino ipa'ola'a al᷊aṛṛindu'a wuṛṛu su waine nionggol᷊annu al᷊amatta ipabbatti'u al᷊awo'u pandumannu Ruata. Wuṛṛu su waine lai Ghaṛṛaho udde nangonggolu apande ipamile suapa al᷊amatta wuassu Ghaṛṛahon Duata wuṛṛu suapa apan wal᷊ine. Piaddu nionggol᷊annu apande ipabbisara ringannu al᷊awo'u sasinaukka apan maaṛṛindu'a, wuṛṛu piaddu lai nionggol᷊annu apande ipanal᷊a'a atappasannu manga sasinaukka udde.

1 KORINTUS 12:8

Su sangkatou taumata, Ghaṛṛaho udde mangngonggolu apande ipabbisara ringannu saṛṛaungnga. Su taumata waine Ghaṛṛaho apan uasul᷊ungnga udde mangngonggolu apande ipanal᷊a'a su ola'u Ruata.

1 KORINTUS 13:2

Salaiwe i ya'u pande mabbatti'u watti'a wuassu Ruata, wuṛṛu maassunna anambon hatto apan malal᷊al᷊umma, wuṛṛu masingkatu manga al᷊awo'a wuṛṛu lembon mangngimanna Ruata na'oman sara wotongnge maaingkatu wowone, arawe i ya'u tawe mandangngu taumata waine, ne i ya'u tawe aregane saran kadio'a!

1 KORINTUS 13:8

Tawe tempone, manungku taumata udde tawe maddarangngu. Orassa indi pia taumata apan masingkata mabbatti'u Watti'a wuassu Ruata, arawe i tou sarun mangillol᷊o mabbatti'u watti'a udde. Orassa indi piaddu masingkata mabbisara sulal᷊ummu al᷊awo'u sasinaukka apan maaṛṛindu'a, arawe i tou sarun mangillol᷊o mabbisara sulal᷊ummu manga sasisaukka udde. Orassa indi pia taumata apan masingkatu anambon inolaanna, arawe sal᷊immurine apa apan aasingkatanni mangitou udde sarun abbul᷊iananna.

1 KORINTUS 14:26

Nariaddi, manga tuṛṛangnga, apa atappasanne sarangkanambone udde? Amungkangngu yamiu maammula massubba Mawu piaddu mangngantari, piaddu mangngaṛṛa'a, piaddu lai mammasingkatu pandumannu Ruata, piaddu mabbisara sulal᷊ummu sasinaukka apan maaṛṛindu'a, wuṛṛu piaddu mannal᷊a'a apa apan iwabbisara udde. Arawe sarangkanambone udde ṛinone olaanna ipangaṛṛa'a wuṛṛu ipangngapia sarangkanambone.

1 KORINTUS 8:11

Wuṛṛu ana waugu udde, ne pangangimannu naaola'a taumata pangangimanne lome udde umal᷊iwu. Sumbal᷊i Kristus nate hunane su taumata udde lai.

2 KORINTUS 4:6

Ruata mabbisara, “Ṛinone wuassu lal᷊ummu ararandumma sumabangnga asasemakka,” Ruata lai apan napaasabangngu semakka wuassu lal᷊ummu naungngi ite, tadea'u ṛingiṛṛanni ite masemakka ipassunna awawantugu Ruata apan lullansiangnga su hatin Kristus.

2 KORINTUS 6:10

Salaiwe naungngi yami massusa, arawe i yami sidutu lulluassa lai. I yami aellehanna asiangnga, arawe i yami suete napaa'alan taumata nambo. I yami aellehanna tawe darotongnga, arawe su ṛinone i yami uatahuanna sarangkanambone.

2 KORINTUS 8:7

Yamiu apianne wuassu al᷊awo'u taumata; i yamiu apianne su ola'u pangangimanna, su ola'u mapaasabangngu ṛingidda, su ola'u asingkata, sulal᷊ummu al᷊awo'u hati manara, wuṛṛu sulal᷊ummu darangngu si yami. Ana waugu udde, mappianne i yamiu lai apianne sulal᷊ummu manara apan mapia indi.

2 KORINTUS 9:11

Ringannu aroddi yamiu sarun maasuungnga sulal᷊ummu manga hausannu na'oman sara i yamiu sidutu wotongnge mangonggola ringannu naungnga mal᷊uassa. Wuṛṛu manga aonggoli yamiu apan tattahianni yami, ma'aola'a taumata nambo maadiangkamanna su Ruata.

EFESUS 1:17

I ya'u sussal᷊ande tadea'u Ruatan kite Yesus Kristus, Iamangnga apan mawantuga, mangonggolu Ghaṛṛaho-Ne si yamiu. Ghaṛṛaho udde sarun ma'ola'a si yamiu pande, wuṛṛu sarun mapaal᷊iatta'u Ruata si yamiu na'oman sara i yamiu maaillal᷊a si Tou.

EFESUS 2:7

Ruata na'ola'a udde tadea'u su tempo apan addantane, taumata wotongnge maasilo aroddi ahewalle darangngun Ruata. Darangngu udde niapaasilon Duata sulal᷊ummu apapia naung-Nge si ite sulal᷊ummi Kristus Yesus.

EFESUS 3:8

Su wallatu anambon al᷊aṛṛana'u Ruata, ete i ya'u aral᷊eoanne. Arawe Ruata nangonggolu al᷊amatta indi si ya'u: Manara mammasingkatu Watti'u Al᷊al᷊uassa su taumata wal᷊ine Yahudi su ola'u paa'alan Kristus apan tawe masue;

EFESUS 6:19

Wuṛṛu aal᷊iomante lai hunan kamiu, tadea'u su tempo i ya'u mabbisara, Ruata mangonggola si ya'u manga wisara apan naṛṛino. Wuṛṛu tadea'u ya'u ringannu waṛṛani wotongnge mabatti'u addappingu Watti'u Al᷊al᷊uassa udde.

FILIPI 1:9

Ete indi aal᷊iomangku si yamiu: doronganna i yamiu lembon mandangngu Ruata wuṛṛu sansul᷊ungngu taumata wuṛṛu sidutu aatambanna sulal᷊ummu asingkatta apan ṛinone wuṛṛu ṛingiranna apan pande.

KOLOSE 2:3

Ete Kristus apan nani'attu al᷊awo'u apande wuṛṛu asingkattu Ruata apan dorone uawuni.

KOLOSE 3:10

I yamiu orassa indi suete nionggol᷊annu wiakka wakku. I yamiu taumatate wakku, apan sidutu lallimbakuannu mandiriaddine eteudde Ruata, tumuṛṛuttu pahudde sassane. Pandumanne eteudde tadea'u i yamiu maaillal᷊a Ruata ringannu mapia-pia.

YAKOBUS 3:13

Amungkangu su wallatti yamiu pia sangkatou apan pande wuṛṛu pia buddine, ṛinone i tou mapaal᷊iatta'a ringannu mabbiakka mapia, wuṛṛu ringannu ma'ola'a inolaanna apan mapia, apan rarundinganannu awawon naungnga wuṛṛu apapande.

2 PETRUS 3:18

Ṛinone i yamiu lembon maapendamma al᷊amattu Mawu Yesus Kristus, Mawu wuṛṛu Punnu Sal᷊amatti ite, wuṛṛu ṛinone i yamiu lai lembon maaillal᷊a si Tou. Daralo si Tou, orassa indi wuṛṛu ma'oman sara mal᷊annu-l᷊annu! Amin. Tabea wuassi yami, Petrus