NEHEMIA 9:1 - KITAB NU TUMPU ALLA LELE MA'IMAI'

^1-2 Itanggan kino uampulu'nyomo ka' opat bitu'onmo ai-aijo' mian da'isan nu aha Israel sinihukmo. Aha binapuasa'mo salaku tanda aha nompele-pele'mo i dosa' nu aha. Aha madi'mo naninggalo' tiba to mia-mian sangga'at anu isalipu'an mae. Salaku bau pontoan taalu' aha sinusa'mo, aha nompusokmo kalung ka' nongkakambuhakonmo abu' nu tano' aita' i ubak nu aha. Lapas aijo' aha tinuminjomo ka' nongakuimo dosa' nu aha iwi-iwi' tiba dosa' nu mompolee' nu aha.

NEHEMIA 9:1 Iomraidhean Croise

2 SAMUEL 1:2

Dodododopnyo tinokamo na olitau samian anu lengkat mae i binakemah'an i Saul. Salaku tanda sinusa'mo kalana ko anumo sinilaka baju'nyo binea-beaknyomo ka' pino una'annyomo tano' aita i ubaknyo. Ia nambamo hi Daud ka' toka tinolodadupu i ahopnyo nonsombah ia.

2 TAWARIKH 20:3

I Yosafat nabuhukmo lantas ia binalado'amo nompoita pokinde' hi Tumpu. Lapas aijo' pinalentahkonnyomo da iwi-iwi' na mian da'isan bapuasa'.

2 TAWARIKH 7:10

ka' dodo-dodopnyo, i tanggal bitu'on anu ko popitu'nyomo pinokaumo i Salomo na mian haha aijo' da minsusule'mo. Aha i lame'mo hondo kalana iwi-iwi' apaa na anu ma'ima' binaumo nu Tumpu hi bansa Israel mian anu pinalesayamo hi Ia, hi Daud ka' hi Salomo.

EZRA 8:21

Lantas i sohipi' nu Kaunyo Ahawa aijo' pinoto'ingkumo tukoongku iwi-iwi' tionyo ahi' bapuasa' ka' mangaku kasala'an hi Tumpu Allah. Kami binalado'amo da kami nujagai nu Tumpu hau-haunyo lumajang aijo', ka' montoa mae kami, to ana-anak mami ka' apa-apaa na anu mami.

EZRA 8:23

Sahingga binapuasa'mo na kami ka' binalado'amo hi Tumpu Allah mongkakaase da nutoa mae na kami sahingga nu bee mae na anu pinoita nu do'a.

NEHEMIA 8:2

Lantas binoamo i Ezra na kitab aijo' i ahop nu mian anu sinilimu'mo, aijo'mo to momo'ane, to boboune ka' to ana-anak anu tu'amo ka' anu sinsumbu'mo.

ESTER 4:16

“Posihuk na mian nu Yahudi iwi-iwi' anu itina' i Susan mondo'akon mae aku. Bolimo mongkaan ka' monginum, kopinnyo tolun sinaa ka' tolumpahu. Aku ka' to lalangkoyang anu mompalakai aku suele bapuasa'mo. Lapas aijo' aku mangadapmo hi tomundo, maumo han aijo' mompaha sala'mo tiba atulannyo. De memang aku silakamo kalana aijo', bakasmo da aku silakamo!”

ESTER 4:3

Ka' suele i songko-songko na propinsi, to mia-mian nu Yahudi sinusa'mo ka' lewa'mo i humang salatan ihongomo nu aha na anu binebakonmo i tomundo. Aha binapuasa'mo lewa'mo i humang ka' notusa'mo, ka' mule' manjoo'na aha nompusokmo hude kalung ka' lewa'mo nale' i abu'.

AYUB 2:12

Panyo daagi' mae jo'o-jo'on na aha nontoa, kinoboli' madi'mo sinumbu' nu aha na ia. Aha singkapmo i humang ka' nolokihis ka' binea-beakmo nu aha na baju' nu aha ka' nonsagakonmo abu' nokiita' i langa ka' aita' i ubak nu aha.

YESAYA 22:12

Tempo'nyo aijo' Tumpu Anu Matangkas na Kuasanyo ka' mule' Anu Daka' na Kuasanyo mompokaumo belemiu humang ka' montando'i, mongkismo ubak ka' mule' mompusokmo hude kalung.

YOËL 2:12

Tumpu notatae, “Panyo uuka aiya pinsusule'mo mae hi beleng-Ku ka' totu-totu'unyomo ahi' na kinyonyoa, ka' bapuasa'mo, tumando' ka' humangmo.

IMAMAT 23:39

De noko padakmo, otampu'uni i tanggan sampulu' ka' olima' bitu'on ko popitu'nyo, komiu tionyo ahi' molameanmo kopinnyo pitun sinaa. Sinaa momonanyo ka' ko ialunnyo atina'mo na sinaa anu samata-mata bau pilawean.

YOSUA 7:6

I Yosua ka' to pola-polaya' nu aha mian Israel sinusa'mo hondo na kinyonyoa sahingga binea-beakmo nu aha na baju' nu aha ka' sinansinaa tinoka sampe nalom na aha tinolodadupu i ahop nu Peti' Palajanjian nu Tumpu ka' nongkakambuhakonmo abu' i ubak nu aha salaku tanda sinusa'mo hondo na kinyonyoa.

ANU PINOTO'I HI YOHANES 11:3

Aku monsaije ua'aha na sakising-Ku anu mompusok baju' monsusa'akon anu silakamo, ka' aha mompoto'ije lele nu Tumpu Allah kopinnyo 1.260 na sinaa.”

TO MIA-MIAN KOPIAN 20:26

Jadi, po'ule' mule' namba na aha mian nu Israel i Betel ka' i humang hi Tumpu. Ikiijo' mae aha binapuasa'mo sampe i nalom ka' nonsombahkon koloban pompodame ka' koloban anu opotunu bau bagi nu Tumpu.

1 SAMUEL 4:12

Samian na tulunan mae nu bansa Benyamin anu nahampate nopadeka'mo namba i Silo ka' sinaamo aijo' na ia tinoka ikiijo'. Salaku tanda ko anumo sinilaka binea-beaknyomo na baju'nyo ka' pino anuannyomo tano' na ubaknyo.

1 SAMUEL 7:6

Lantas aha sinihukmo iwi-iwi' kiijo' i Mizpa. Aha nontauk uee ka' mule' binubusakon salaku palasombahan hi Tumpu, ka' mule aha binapuasa'mo sinansinaa isinaamo aijo'. Aha notatae, “Kami binaladosa'mo hi Tumpu.” (Kiijo' i Mizpa i Samuel lewa'mo nongulus iwi-iwi' na palakala po ualian nu aha mian Israel.)