NEHEMIA 8:9 - KITAB NU TUMPU ALLA LELE MA'IMAI'

⁹ Nohongo Atulan anu binasa'mo aijo' mian da'isan tinongkolibosonmo, lantas i humangmo sahingga i gubernur Nehemia ka' i Imam Ezra anu pande hondo i Atulan aijo', ka' aha mian nu Lewi haha aijo' anu nontutuhakonmo Atulan aijo', nompoto'imo hi mian da'isan iwi-iwi' sumo uuka na koonyo nu aha, “Sinaa aiya sinaa anu tinantukanmo nu belemiu hi Tumpu Allah, jadi bolimo talalo tongkoliboson ka' humang.

NEHEMIA 8:9 Iomraidhean Croise

2 TOMU-TOMUNDO' 22:11

Nohongo onyi' nu kitab aijo' binea-beakmo i tomundo' na baju'nyo kalana sinusa'mo hondo na kinyonyoanyo.

2 TOMU-TOMUNDO' 22:19

beleyum nompele-pele'mo ka' nangaku sinala'mo hi beleng-Ku. Pinopobuhuk-Kumo na Yerusalem na hukuman ka' mian anu jojoong i kiijo'. Ku potimbalimo na kota' aijo' sa'angu' na kota' anu okabuhuk hondo de otoa, ka' sanggo Yerusalem ku potimbalimo sanggo anu kinutukan. Panyo salatan beleyum nohongomo anu binau pinompobuhuku aijo', beleyum i humangmo ka' nombea-beakmo baju' salaku tanda sinusa'mo hondo na kinyonyoa nu beleyum. I hongong-Kumo na do'a nu beleyum,

2 TAWARIKH 15:3

Pininmo hondo na Israel madi' tinulu-tulutan hi Tumpu Allah anu totu'u, madi'mo ko atulan anu tionyo ahi' o tuluti ka' madi'mo ko to ima-imam anu mompotiju' aha.

2 TAWARIKH 30:22

To mia-mian nu Lewi haha aijo' pande hondo na mongatun mosia na monsombah Tumpu, sahingga i Hizkia nompuji'mo aha. Salatan pinitunsinaamo na kinopinnyo na aha lewa' nongkaan i lamean aijo' ka' mule' nonsombahkonmo koloban bau pontalima kase hi Tumpu, Tumpu Allah mompolee' nu aha,

2 TAWARIKH 34:19

Salatan nohongomo onyi'nyo nu kitab aijo', binea-beakmo i tomundo na baju'nyo kalana sinusa'mo na kinyonyoanyo.

2 TAWARIKH 34:21

“Lako' mamba pokilawa hi Tumpu na aku aiya pa' mosia ka' suele pa' mosia na to mia-mian anu daagi' kiijo' i Yerusalem ka' i Yehuda mongkona isi nu kitab aiya. Tumpu nontambuha'imo kita kalana mompolee'to madi'mo nombau iwi-iwi na palentah anu tuli-tulis i kita aiya.”

2 TAWARIKH 35:3

To mia-mian nu Lewi anu binee'anmo kalaja samata-mata mombau anu nu palentahkon nu Tumpu, ka' anu tinimbalimo to gulu-gulu' nu aha Israel nohumpak palentah sumo uuka hi Yosia, “Po'una' na Peti' palajanjian nu Tumpu anu susi' aijo' i Laigan nu Tumpu anu binaumo i Tomundo Salomo anak i Daud anu momo'ane. Madi'mo daagi' timbali lewa' olali-lalin nu belemiu. Obau apaa na anu nu palentahkon nu Tumpu Allah nu belemiu ka' bansa Israel mian anu pinalesayamo hi Ia.

EZRA 2:63

I gubernur nu da'erah Yehuda madi' mompobee' aha mongkaan kaanon anu osombahkon hi Tumpu Allah, mompoitaje pokinde' hi Tumpu Allah na imam anu opakeakon Urim ka' Tumim pa' mosia na koo-Nyo.

EZRA 7:11

Aiyamo na sulat anu pininmo na nompo'una' binee'mo i Tomundo Artahsasta hi Ezra, imam ka' mule' mian anu pande hondo monsumbu' Atulan,

NEHEMIA 10:1

Mian anu momona nontekengi sulat aijo', aijo'mo i Gubernur Nehemia anak i Hakhalya. Lapas aijo' i Zesekiamo. Ilapas na aha aijo' atina'je ka' mian haha aiya suele nontekengimo:

NEHEMIA 12:26

Aha aijo' tinumuu' daagi' tempo'nyo i Yoyakim anak i Yesua ka' makumpu i Yozadak ka' tempo'nyo i Gubernur Nehemia ka' i Imam Ezra anu pande hondo aijo' i Atulan nu Tumpu.

NEHEMIA 7:65

Gubernur nu aha da'erah Yehuda nontewa'mo aha madi' timbali mongkaan kaanon anu sinombahkonmo hi Tumpu Allah, opakeakon je ahi' Urim ka Tumim nu samian na imam da opokilawa pe'e hi Tumpu Allah.

NEHEMIA 7:70

Manjoo' na aha to mia-mian da'isan nombee'mo bau pontulungi da boli maboat na mongongkosi bau pompoko'ima'i Laigan nu Tumpu: lengkat mae hi gubernur – 8 kilogram na mosoni' 50 mangko anu opake de monsombahmo Tumpu 350 jubah anu nupusok nu imam lengkat mae hi to kapa-kapala nu aha anu sa'anakan mae: – 168 kilogram na mosoni' 1.250 kilogram na salaka lengkat mae hi to mia-mian sangga'at – 168 kilogram na mosoni' 140 kilogram na salaka 67 jubah anu nupusok nu imam

NEHEMIA 8:2

Lantas binoamo i Ezra na kitab aijo' i ahop nu mian anu sinilimu'mo, aijo'mo to momo'ane, to boboune ka' to ana-anak anu tu'amo ka' anu sinsumbu'mo.

ANU MOMPOLELE POTATAE NU TUMPU 3:4

Tumpu na nontantukan tempo'nyo da humang ka' tempo'nyo kumojo, tempo'nyo da montando'i ka' tempo'nyo monsalelei.

YESAYA 61:3

da mombee'i kabilahian ka' kalame'an hi mian anu sinusa'mo nakinyonyoanyo kalana koanumo sinilaka; da momabli'imo kinyonyoa nu aha sisinusa'mo timbalimo nyanyian bau pompuji'. Aha sumomo kau' anu pinosi su'an nu Tumpu. Aku mombaumo anu ma'ima' ka' totu'u, sahingga Tumpu opopodaka'mo.

HOSEA 4:6

Belemiu to imam-imam, madi' mongadati Aku, sahingga mian-Ku anu palesayamo suele madi'mo mongadati Aku, sahingga aha nohumpakmo balaa'. Belemiu madi'mo montalima to aja-ajalan-Ku. Jadi Aku suele madi'mo montalima belemiu ka' to ana-anak nu belemiu madi'mo Ku talima salaa-Ku to imam-imam-Ku.

MALEAKHI 2:13

Ka' mule' daagi aiya na palabuatan sangga'at nu belemiu. Mezbah nu Tumpu i ngueeanmo nu belemiu nu lolu' nu mata; belemiu ihumangmo ka' tinumando'mo kalana Tumpu madi'mo daagi' nonsitujui nontalima iwi-iwi na koloban nu belemiu.

ROMA 3:20

Kalana madi' ko samian pe'e na moko ala mompaha ima' tiba Tumpu, kalana mian aijo' mombau hahan anu daagi' i uno nu atulan nu agama. Ola ahi' atulan aijo' na mompotiju' hi mian taalu' mian aijo' baladosa'.

ROMA 7:9

Aku u'utu mae tinumuu' misa' pilenje kino atulanmo nu agama. Panyo salatan atulan nu agama tinokamo, dosa' nontampu'unimo kinantoaan,

PO'ULE' INGULIT 12:12

Okalame'i i ahop nu Tumpu Allah nu belemiu, hingga-hinggat tiba to ana-anak nu belemiu, to posa-posaihon nu belemiu ka' to mia-mian nu aha Lewi anu jojoong i iwi-iwi' na kota nu belemiu, kalana mian nu aha Lewi madi' binagian tano' i lipu' nu belemiu.

PO'ULE' INGULIT 12:7

Ikiijo' suele i ahop nu Tumpu Allah nu belemiu, belemiu hingga-hinggat tiba to ana-anak nu belemiu tionyo ahi' mongkaan ka' mongkalame'i usaha miu iwi-iwi' anu kino hasinnyomo kalana binalakatanmo nu Tumpu Allah nu belemiu.

PO'ULE' INGULIT 16:11

I ahop nu Tumpu Allah nu belemiu i tampat anu pinile'an-Nyomo, belemiu tionyo ahi' bilahi hingga-hinggat tiba to ana-anak nu belemiu, to posa-posaihon nu belemiu ka' aha mian nu Lewi, mian anu lengkat mae i salipu'an, anak anu madi'mo ko tuuma ka' tinanyo, ka' to balu-balu anu jojoong i songko-songko na kota nu belemiu.

PO'ULE' INGULIT 26:14

Palasombahan aijo' mau ola sangkiding madi' ko anu kinaanku mau tempo'nyo aku susa' kalana ko anu sinilaka, kabai binoangku i sambiha'nyo nu laigan tempo'nyo aku hau-haunyo nahumimi'mo kabai binee'kumo salaku kaanon hi mian anu sinilakamo. Aku tinulu-tulutanmo hi belento o Tumpu; iwi-iwi' na anu pinalentahkonmo nu belento, binaungkumo.

YAKOBUS 4:9

Tionyo ahi' komiu totu-totu'u na mompele-pele' ka' humaang, ka' montando'i; tionyo ahi' kojoo miu timbali haang ka' lame' miu timbali kasusa'an!