NEHEMIA 8:7 - KITAB NU TUMPU ALLA LELE MA'IMAI'

⁷ Lapas aijo' aha po'ule'mo tinuminjo aijo' i kinatinjoan nu aha toto samian, lantas aha mian nu Lewi anu i kiijo' nontutuhakonmo Atulan aijo' hi aha. Mian nu Lewi haha aijo' atina'mo: i Yesua, i Bani, i Serebya, i Yamin, i Akub, i Sabetai, i Hodia, i Maaseya, i Kelita, i Azarya, i Yozabad, i Hanan tiba i Pelaya.

NEHEMIA 8:7 Iomraidhean Croise

1 TOMU-TOMUNDO' 8:14

Noko lapas binalado'a i Tomundo' Salomo nongahopimo mian da'isan iwi-iwi' anu hau-haunyo tinjo-tinjo i kiijo', lantas nompoitakonmo balakat hi Tumpu Allah toka hi aha.

2 TAWARIKH 30:22

To mia-mian nu Lewi haha aijo' pande hondo na mongatun mosia na monsombah Tumpu, sahingga i Hizkia nompuji'mo aha. Salatan pinitunsinaamo na kinopinnyo na aha lewa' nongkaan i lamean aijo' ka' mule' nonsombahkonmo koloban bau pontalima kase hi Tumpu, Tumpu Allah mompolee' nu aha,

2 TAWARIKH 35:3

To mia-mian nu Lewi anu binee'anmo kalaja samata-mata mombau anu nu palentahkon nu Tumpu, ka' anu tinimbalimo to gulu-gulu' nu aha Israel nohumpak palentah sumo uuka hi Yosia, “Po'una' na Peti' palajanjian nu Tumpu anu susi' aijo' i Laigan nu Tumpu anu binaumo i Tomundo Salomo anak i Daud anu momo'ane. Madi'mo daagi' timbali lewa' olali-lalin nu belemiu. Obau apaa na anu nu palentahkon nu Tumpu Allah nu belemiu ka' bansa Israel mian anu pinalesayamo hi Ia.

EZRA 8:18

Kalana kanonongan nu Tumpu Allah, aha nonsaimo mae hi kami i Serabya, mian nu Lewi anu pande hondo aha sa'anakan mae i Mahli, Hingga-hinggat tiba ia suele tinoka mae ahi' na to ana-anaknyo ka' to utu-utusnyo, konjoo'nyo 18 na mian.

NEHEMIA 10:2

To ima-imam i Seraya, i Azarya, i Yeremia, i Pasyhur, i Amarya, i Malkia, i Hatus, i Sebanya, i Malukh, i Harim, i Meremot, i Obaja, i Daniel, i Gineton, i Barukh, i Mesulam, i Abia, i Miyamin, i Maazya, i Bilgai tiba i Semaya.

NEHEMIA 11:19

To mia-mian anu monjagai sabatan daka': I Akub, i Talmon tiba to sanga-sangalu nu aha. Iwi-iwi' konjoo'nyo 172 na mian.

NEHEMIA 12:33

To ima-imam lumajang montuntuni aijo' aha, ka' mompuhi tolompet: I Azarya, i Ezra, i Mesulam, i Yehuda, i Benyamin, i Semarya tiba i Yeremia. Ka' aha mule' suele binatukan i Zakharia anak i Yonatan ka' makumpunyo i Semaya. Daagi' ko pa' aha sangkuka na mompolee' mae nu aha aijo'mo: i Matanya, i Mikha, i Zakur, atina'mo aha mae sa'anakan i Asaf.

NEHEMIA 3:17

To pia-piangkuka na bahagiannyo na pagan mesen te tusanannyo anu binaumo nu to ima-imam Lewi, aha tinulis sumo uuka na nombagi: I Rehum anak i Bani I Hasabya, anu mompalentah mintonga' na distrik Kehila. Bahagian pagan mesen anu posi Distriknyo. I Binui anak i Yenadad, anu mompalentah mintonga' na Distrik Kehila. I Ester anak i Yesua, anu mompalentah Mizpa: pagan mesen i Sikunyo nu jalan mompaha ahop tiba gudang anu pompo una'an toongon anu bau pahampate. I Burukh anak i Zabai: pagan mesen lengkat mae i sikunyo nu jalan toka-toka i sabatan nu laigan i Elyasib toka-toka i pusnyomo nu laigan aijo'.

NEHEMIA 8:12

Sahingga ninsusule'mo iwi-iwi' na mian da'isan da aha mongkaanmo ka' monginumo ka' mombagi-bagimo anu o kaan hi mian sangga'at. Aha i lame'mo kalana nongalati'mo apaa na alatinyo nu anu binasa'mo ka' anu i hongomo nu aha aijo'.

NEHEMIA 8:4

I Ezra tinuminjo i mimban te kau' na binau anu binaumo da bau katinjoan i Ezra aha mogombu aijo'. Mian anu tinuminjo i sasu koanannyo aitumo aha: i Matica, i Sema, i Anaya, i Uria, i Hilkia, tiba i Maaseya; ka' anu i sasu kowinyo aijo'mo: i Pedaya, i Misael, i Malkia, i Hasum, i Hasbadana, i Zakharia tiba i Mesulam.

NEHEMIA 8:6

I Ezra notataemo, “O puji' na Tumpu, Tumpu Allah anu talasanggo!” Iwi-iwi' na mian da'isan nohangkatmo tangka-tangkas lima nu aha ka' nontaami, “Totu-totu'u na kinyonyoangku, totu-totu'u na kinyonyoangku!” Lantas aha tinolodadupumo nonsombah Tumpu Allah.

NEHEMIA 8:8

Aha nompoto'imo alati'nyo nu Atulan nu Tumpu Allah aijo' toto sa'angu' na bahagiannyo ka' nompojelas mule' poso'nyo sahingga mian da'isan nangalati'mo apaa na anu binasa'mo aijo'.

NEHEMIA 9:3

Kila-kila tinotolu' na jam na kinopinnyo na kitab Atulan nu Tumpu Allah nu aha binasa'akon hi aha, ka' tinotolu' na jam na kinopinnyo suele na aha nongakui dosa' nu aha iwi-iwi'. Lapas aijo' aha tinolodadupumo nonsombah Tumpu, Tumpu Allah nu aha.

NEHEMIA 9:4

Ikiijo' daagi' ko mimban kau' katinjoan nu to mia-mian Lewi ka' tinuminjomo na i Yesua aijo', tiba i Bani, i Kadmiel, i Sebanya, i Buni, i Zerebya, i Bani tiba i Kenani. Aha binalado'amo daka-daka' hi Tumpu Allah nu aha.

IMAMAT 10:11

Iwi-iwi' na atulan anu Ku bee' hi belemiu anu nupotoka i Musa, tionyo ahi' belemiu moko ala mongajanakon hi bansa Israel.”

MALEAKHI 2:7

Memang ahi' kahalusan nu to ima-imam na mompogulu' han anu totu'u apaa na anu Ku kahanda'i, Tumpu Anu Matangkas na Kuasanyo. Hi ahamo ahi' na tampat nu mian da'isan mompokilawa apaa na anu Ku ka'ima'i kalana ahamo ahi' aijo' na anu pinalentang-Kumo da mompoto'i.

PO'ULE' INGULIT 33:10

Aha nompotinganmo mian anu pinalesayamo hi Belento da sabole-bole montuluti iwi-iwi' na palentah nu Belento ka' nonsombahkonmo koloban i mezbah nu Belento.