MIKHA 4:5 - KITAB NU TUMPU ALLA LELE MA'IMAI'

⁵ Iwi-iwi na bansa i dunia aiya monsombahmo ka' tulu-tulutanmo hi posi pilogot nu aha. Panyo kita na montuluti ahi' Tumpunto ka' monsombah Ia sampe toka sidu-sidutu'.

MIKHA 4:5 Iomraidhean Croise

KAJADIAN 17:1

Salatan umun i Abram siniompulu'mo ka' osio' na taun, Tumpu nanintoamo hi ia ka' notatae, “Akumo na Tumpu Allah Anu Daka' hondo na kuasanyo. Otuluti na Aku ka' saja' obau na pongka'oho'-Ku.

2 TOMU-TOMUNDO' 17:29

Panyo mian haha aijo' anu jojoong i Samaria saja' monsombah to pilo-pilogot nu aha ka' nupo'una' nu aha i kuil nu aha haha aijo'. Toto sa'angu' na tompuk nosi bau pilogotnyo i kota' anu ka jojoongan nu aha.

2 TOMU-TOMUNDO' 17:34

Sampe sinaa uuka aiya, aha daagi' monjalanakon adat kabiasa'an nu aha. Aha madi' monsombah Tumpu ka' madi' ahi' suele montuluti to atu-atulan ka' palentah-Nyo anu binee'-Nyomo hi lee' i Yakub anu sinanggohan-Nyomo Israel.

MAZMUR 20:6

Jadi kami montaligalaimo kalana lame'mo, kalana beleyum inguntungmo na nahampate, ka' nohangkatmo bandela' bau pompuji' Tumpu-nto. O'amalakon da Tumpu mombee' mae iwi-iwi' apaa na anu pinoitamo nu beleyum.

MAZMUR 48:14

Soba palahatikan na pagannyo mesen, soba palesa na bentengnyo, da belemiu timbali monsisikakon hi lee' nu belemiu:

MAZMUR 71:16

Ku puji' na palabuatan nu Belento anu daka' hondo o Tumpu Allah, ku bebakon momoya na ka'adilan nu Belento, ola ka'adilan nu Belento.

YESAYA 2:5

O, lee' mae i Yakub, imbo' kita lumajangmo ijingka nu Tumpu!

YESAYA 26:13

Kami toho'mo kinuasan nu to tuan-tuan sangga'at, panyo ola-olamo ahi' Belento na anu o, akui mami, o, Tumpu mami!

YESAYA 26:8

Kami montulutimo kaputusan nu Belento, o, Tumpu, ka' saja'mo montanda'i Belento; Belentomo na anu opuji ka' mule' anu o, inau'nu kinyonyoa mami.

YEREMIA 32:40

Aku mombaumo palajanjian anu sampe toka sidu-sidutu' hi aha. Aku madi' toho' belenti na mombau palabuatan ma'ima' hi aha. Ku pojadimo na aha da mabuhuk ka' moholomati mae Aku nu kinyonyoa anu totu-totu'u ahi' da aha madi'mo matikojo'on hi Belengku.

ZAKHARIA 10:12

Aku mompohosonmo mian anu palesayamo hi beleng-Ku, aha tulu-tulutanmo ka' monsombahmo Aku. Akumo, na Tumpuu anu notataemo.”

SISIKON NU TO RASUL-RASUL 14:16

Tempo'nyo naipuan mae Tumpu nompojohokmo to bansa-bansa tumuu' mombatuki posi pongka'oho' nu aha.

PO'ULE' INGULIT 27:10

Kalana aijo' otuluti na Tumpu Allah nu belemiu ka' bau iwi-iwi' na palentah-Nyo anu binee'kumo hi belemiu sinaa aiya.”

KOLOSE 2:6

To Utu-utus nontalimamo i Kristus Yesus salaku Tumpu. Mokonyo aijo' tionyo ahi' komiu tumuu' mosa'angu'mo tiba Ia,

KOLOSE 3:17

Apaa na anu obau miu iwi-iwi' kabai otaloakon, aijo' obau ka' otaloakon, samata-mata kalana sanggo nu Tumpu Yesus. Montalima kase ahi' hi Tumpu Tuumanto, kalana apaa na anu binaumo i Yesus hi komiu.

YOSUA 24:15

De belemiu madi'mo palesaya ka' mohongo-hongomo Tumpu poto'i mae nasa-nasa sinaa aiya ihe na anu opalesaya ka' o hongo-hongo nu belemiu; hi to pilo-pilogot sangga'at anu sinombahmo nu mompolee' miu kiijo' mae i Mesopotamia naipuan mae kabai hi to pilo-pilogot mian nu Amori anu lipu' nu aha kinajojoonganmo nu belemiu uuka aiya. Panyo kami – aku tiba kami salaigan – mompalesayamo ka' mohongo-hongomo samata-mata hi Tumpu.”