MIKHA 3:11 - KITAB NU TUMPU ALLA LELE MA'IMAI'

¹¹ Anu balakuasa i kota' lewa'mo nompalentah da mohumpak doi ponsogo', to ima-imam lewa' mompogulu'atulan nu Tumpu da mohumpak gaji, ka' to nabi-nabi momoita pokinde' hi Tumpu da mohumpak doi – lantas aha iwi-iwi' monsangka Tumpu daagi' monsangaja'i mae aha. Aha notatae, “Tumpu saja' daagi' aiya hi kita; kita madi' nukona mae nu balaa'.”

MIKHA 3:11 Iomraidhean Croise

AMSAL 17:23

Mian kopian anu tageo' nakinyonyoanyo montalima doi bau ponsogo' anu opohowini; ka'madi' mompojalan ka'adilan.

YESAYA 1:23

To pola-polaya' nu belemiu la lewa' motomuhuk ka' lewa' mombulingakon obee' hi mian; aha mongka'ima'i mongala palasen, ka' doi anu pontamboi nu mian. Aha madi' mongka'oho' montinjohi anu madi'mo ko tuumanyo ka' tinanyo iulusan nu aha mian kopian; ka' mule' madi' mongka oho' kabalatan nu tobalu-balu.

YESAYA 48:2

Maumo sumo aijo' na beleyum mongakui totu-totu'u, tukooyum, beleyum mian anu jojoong ikota' anu susi'; ka' memang ahi' beleyum montaha'imanimo Tumpu Israel anu osa-osanggohi Tumpu Anu Daka na Kuasanyo.

YESAYA 5:23

Panyo ola kalana mohumpakmo doi anu abu pontamboi, sahingga belemiu mompobebasmo anu kokasala'annyo ka' mombanta mian anu madi' kokasala'annyo da madi' pokonai ka'adilan.

YESAYA 56:11

Aha susumo ahi' dedeng anu majoko' anu madi' toho' mobosu. To pola-polaya' haha aijo' madi' mangalati'. Toto samian mombau apaa na anu nu kai' ma'i nu aha ka' molio posi ka'untungan nu aha.

YEREMIA 23:17

Kona hi to mia-mian anu madi' ka'oho' mompotombihing potataeng-Ku, aha saja' montaloakon, ‘Belemiu salamatmo.’ Ka' hi toto samian anu panggaga hondo aha montaloakon, ‘Beleyum madi' mule' mohumpak balaa'.’ ”

YEREMIA 26:7

Iwi-iwi' na anu ku poto'i Laigan nu Tumpu aijo' ihongomo nu to ima-imam, to nabi-nabi tiba aha mian da'isan.

YEREMIA 5:12

Mian anu palesayamo hi Tumpu nontaloakonmo han anu madi' totu'u hi Tumpu. Aha nontaloakon, “Ah, Ia madi' mule' mombau apa-apaa. Kita madi' mule' nu kona nu balaa' ka' madi' mule' monta'up pahampatean kabai kasusa'an i anu okaan.

YEREMIA 6:13

Aha iwi-iwi', anu tu'amo tiba anu daagi' anak, molio ka untungan tiba jalan anu madi' hodi'. Paka laus mule' nabi tiba imam suele nongakalimo miam.

YEREMIA 7:4

Boli palesaya hi aha anu saja' mongakali nonotataemo, ‘Kita madi'mo ko anu mompoposia, kalana aiya Laigan nu Tumpu. Totu-totu'u aiya Laigan nu Tumpu!’

YEREMIA 8:10

Kalana aijo' ale' nu aha Ku bee'mo hi tumpu nu tano' sangga'at, ka' mule' bengkele' nu aha Ku bee'mo hi mian sangga'at. Aha iwi-iwi' tu'anyo tiba anak molio ka untungan tiba jalan anu tageo'. Pakalaus mule' nabi tiba imam suele ahi' mongakali mian.

YEHEZKIEL 22:12

Daagi' mule' ko anu tinimbalimo mian topo patei sola-sola' obayan, mian anu talalo ahi' molio kantungan ka' saja' mongkelo aha mian anu bubuu' sangko bansanyo. Aha iwi-iwi' nongkolilimimo mae Aku. Aku, Tumpu Anu Matangkas na Kuasanyo notataemo.

YEHEZKIEL 22:27

To pama-pamalentahnyo sumomo ahi' serigala anu nombente-bentekmo kaanonnyo. Aha sola'mo nompatei mian ola kalana da molio ka untungan.

YEHEZKIEL 34:2

“O manusia anu madi' tumuu' batu, pisala'i na to tomu-tomundo' nu aha Israel, ka' poto'i apaa na anu tinaloakon-Kumo nu Aku Tumpu Anu Matangkas na Kuasanyo hi aha, ‘Silakamo na belemiu o to pola-polaya' nu Israel. Belemiu ola mompotutugakon posi kapentingan nu belemiu misa' da bau kapentingan nu domba nu belemiu haha atina.

HOSEA 4:18

Salatan aha malangu'mo kalana monginumo manjoo' na anggur, sanangmo na kinyonyoa nu aha masala'. Aha lebe mongka'ima'i o alu ka' madi' mongka'ima'i oholomati.

HOSEA 4:8

Belemiu kinayamo kalana dosa' nu mian-Ku, anu palesayamo, kalana aijo' belemiu mongka'ima'i da aha saja' baladosa'.

AMOS 5:14

Mompagala mombau anu ma'ima' ka' boli mombau anu ma'idek da belemiu timbali tumuu'. Sahingga Tumpu Anu Daka' na Kuasanyo totu-totu'u jojoong hi belemiu susumo anu tinaloakonmo nu belemiu.

AMOS 9:10

Mian-Ku anu palesayamo panyo binaladosa'mo, motatae, ‘Tumpu madi' mompojohok kita nutuda'i nu balaa'.’ Panyo aha totu-totu'unyo osilakaimo i uno nu pahampatean.”

MIKHA 3:5

Bansaku ingakalanmo nu to nabi-nabi anu lewa'mo nongkila-kilakon, mohumpakmo anu ma'ima' na mian anu lewa' mombee'i doi, panyo mongka'ideki ka' madi'mo mompalahatikan mian anu madi' mombee'i apa-apaa. Aha to nabi-nabi anu susumo aijo' Tumpu notatae,

MIKHA 7:3

Iwi-iwi' aijo' pande hondo na mombau palabuatan anu ma'idek. Mian anu ko pangkatnyo tiba mian kopian momoita doi bau ponsogo' ka' to tu'a-tu'anyo mompakisakon pongka'oho' nu aha, sumo aijo' na aha nombau kasangaja'an hingga-hinggat.

ZEFANYA 3:3

To mia-mian daka' anu i kota' aijo' sumomo singa anu lewa' molohu'. To mia-mian kopiannyo sumomo to seri-serigala anu no'ohopmo, aha talalomo hondo nangoa sahingga sangkolong pe'e na buku madi'mo ko tuha'nyo anu okaan dodop.

ZEFANYA 3:4

To nabi-nabinyo mule' me tulu-tulumo na anu olakukan ka' madi'mo opalesaya nu mian, to ima-imam nohumimi'imo apaa na anu osombahkonmo hi Tumpu ka' mule' monggeo-geo'akonmo atulan nu Tumpu da boda-boda baumo posi ka' untungan nu aha.

MALEAKHI 1:10

Tumpu Anu Daka' na Kuasanyo notataemo, “Lebe ma'ima' tumban nu Laigan-Ku otumbanmo kalana palasuma ahi' na belemiu mompomoak apu i mezbah-Ku. Madi'mo Ku ka'ima'i na belemiu ka' mule' madi'mo mongka'oho' mongala palasombahan nu belemiu.

MALEAKHI 2:9

Sahingga Aku suele mompotimbalimo belemiu madi' nu pajuli nu mian Israel kalana belemiu madi'mo nontuluti pongka'oho'-Ku ka' mule' kalana belemiu mombeda-bedakon mian tempo'nyo nompogulu' mian anu palesayamo hi belengku.”

NOMBILANGMO 16:15

I Musa notambuha'mo hondo ka' notataemo hi Tumpu, “Tumpu, boli mongala palasombahan nu aha. Madi' toho' aku mompolugi' mau pe'e samian anu aijo' hi aha; ka' sa'angu' pe'e na keledai ma'isa toho' ingalangku aijo' hi aha.”

NOMBILANGMO 22:7

Sahingga nambamo na to pola-polaya nu aha mian Moab ka' Midian aijo' nomboa pontamboi hi Bileam da mongka'oho' na ia mongkutuki aha mian nu Israel. Salatan tinokamo hi Bileam pinotokamo nu aha na potuunon i Tomundo Balak.

MATIUS 3:9

Boli montaha'imani komiu timbali molapas lengkat i hukuman ka' motatae kalana i Abraham mompolee' miu. Tutugi, batu-batu pe'e aiya, Tumpu timbali mombau lee' i Abraham!

1 TIMOTIUS 3:3

boli mian anu saja' malangu, kabai anu mongka'ima'i mahantuda'. Sumo aitu mule' ia tionyo ahi' boli buhingison ka' mongka'ima'i baladame. Ia madi' timbali mompopodaka' doi.

TITUS 1:11

Mian anu susumo haha aijo' tionyo ogintumi na nganga'nyo, kalana aha mompotasibu manjoo' na auwan kalana to panga-pangajalan anu madi' ko gunanyo. Aha mombau sumo aijo' ola kalana mongka'oho' molio kauntungan anu madi' pantas!

1 PETRUS 5:2

da belemiu molaya' tompukan nu domba anu pinalesayakonmo nu Tumpu hi belemiu. Oposanang na kinyonyoa de molaya' aha susumo anu nukahanda'i nu Tumpu, ka' boli maboat na kinyonyoa. Boli mule' belemiu mokalaja kahanda' da mohumpak dale', panyo kalana komiu totu-totu'u mongka'oho' mongkalesang.

YUDAS 1:11

Silaka na aha! Kalana aha nombatukimo jalan anu tinuluanmo i Kain. Da mohumpak doi, aha nontuamo butong nu aha i uno nu kasala'an, pokakana sumo i Bileam. Ka' aha mule' pinateanmo kalana notomuhukmo susumo i Korah.

1 SAMUEL 8:3

Panyo aha madi'mo nontiho kalakuan nu tuuma nu aha, panyo ola molio posi kauntungan nu aha. Aha mongala doi bau pontamboi palakala, ka' mongulus palakala nu mian madi' adin.