20 Panyo Tumpu notatae hi ia, ‘O anu ponga'! Pihi uuka mule' beleyum matemo, lantas ihemo ahi' na mohumpak iwi-iwi' kakaya'an anu ilimu'umo bau kapentingan nu butongum?’
Lantas i Haman nolabi-labimo na notatae hi aha ka' nontakabunakonmo kakaya'annyo, konjoo'nyo nu to ana-anaknyo to momo'ane, pangkatnyo anu daka', anu binee' i tomundo, ka' mule' pangkatnyo anu matangkas aijo' anu molingkudui anu ko pangkatnyo sangga'at.
Talalo ahi' sasaingoni' na tinantukan nu Belento na umunku! De hi Belento kopinnyo nu kantumuu'anku madi' ko alati'nyo. Memang, manusia ola susumo opuhakon nu sawo nu manusia,
Ihe na kinayamo kalana mongala bunganyo ka' talalo ahi' mongkekedi da ka'untungan, manjoo' kakaya'annyo aijo' saidi mae manabu' hi mian anu kokalibosan ka' hi mian anu kasiasi.
Sumomo ahi' tomonsi' mongokobi anu misa' nggalau'nyo, sumo aijo'mo na mian anu tageo' na kinyonyoanyo nohumpak halata'nyo. Toka ipohintonga'anmo nu umunnyo mingkotmo na halata'nyo aijo' iwi-iwi'. Ipupuusnyomo nu kantumuu'annyo, onyata'je taalu' ia mian anu ponga' ahi' hondo.
De mian motatae, “Iwi-iwi' aman ka' madi' ko anu mombau hengge',” sahingga aitumo na tempo'nyo anu madi' osumbu-sumbu' nu aha, nutokaimo nu bala, ka' madi' ko samian pe'e na anu moko popalai. Han aijo' toka madi' osumbu-sumbu', sumo mongoa'i sakit monganak kona hi samian na boune anu mompohampemo.
Hi to mia-mian anu kaya i dunia aiya tionyo ahi' nupoita nu beleyum da aha boli kobubuun, ka' boli montaha'imani to paka-pakakas anu madi' tataap – sumo hannyo nu kakaya'an. Aha tionyo montaha'imani Tumpu anu nombee'imo molabi-labi iwi-iwi na apaa hi kita, da olasainto.
Kalana madi' ko sa'angu'nyo pe'e na anu binoantomo i uno nu dunia aiya, ka' madi' ko sa'angu'nyo pe'e suele na anu opoko ala oboanto mosabat mompata'i dunia aiya!
Apaa na anu timbali i kantumuu'an nu belemiu dodop, posi komiu pe'e madi' monsumbu'! Komiu ola sumo tibuk ola sasaingoni' na kantoan, lapas mae lanyapmo.