FILIPI 2:2 - KITAB NU TUMPU ALLA LELE MA'IMAI'

² Jadi, soba da komiu totu-totu'u momposanang kinyonyoangku tiba jalan anu sumo aiya: Tumuu'mo mosa'angu' nu kalibosan anu pokakana tiba pikilan ka' tanga'an anu pokakana.

FILIPI 2:2 Iomraidhean Croise

MAZMUR 122:8

Kona hi to utu-utus ka' to sanga-sangalungku aku motatae, “O' amalakon da beleyum mohumpak kantumuuan ma'ima'!”

YOHANES 3:29

Boting boune tumpunyo boting mo'ane. Bela' nu boting mo'ane aijo' ola tuminjo monsangalui ka' mohongo, ka' ia sanang de mohongo potatae nu boting mo'ane. Sumo aitumo na aku. Uuka aku sanang hondo.

SISIKON NU TO RASUL-RASUL 1:14

iwi-iwi' saja' mosangaja' na kinyonyoa silimu' da balado'a. Aha balado'a tiba to bouboune, singkona i Maria tina i Yesus ka' tiba to utu-utus i Yesus.

SISIKON NU TO RASUL-RASUL 2:1

Salatan tinokamo i sinaa nu Pentakosta, iwi-iwi' mian anu palesaya nosa'angu'mo i sa'angu' na tampat.

SISIKON NU TO RASUL-RASUL 2:46

Toka sansina-sinaa aha saja' silimu' i Laigan nu Tumpu ka' lame' na aha mongkaan hingga-hinggat, ka' aha madi' mombuulakon to lai-laigan nu aha.

SISIKON NU TO RASUL-RASUL 5:12

Kalana pakalaja'an nu to rasul-rasul ka' hahan anu ma'isa toho' tinimbali i totonga' nu mian da'isan. Iwi-iwi' na mian anu pinalesayamo sinihuk i Lambing i Salomo i Laigan nu Tumpu.

ROMA 12:16

Tumuu' mompaha kano-kanonongi samian tiba samian. Boli montige-tige na kinyonyoa, panyo obau na butongum susumo mian anu madi' molabi na kantumuu'annyo. Boli mongoa'i butong lebe pande, padahan madi' pande.

1 KORINTUS 1:10

To Utu-utus! Tiba sanggo nu Tumpunto i Yesus Kristus, kupoita da komiu iwi-iwi' mompaha hongo-hongo; da boli ko anu mahantuda' itina' hi komiu. Tionyo ahi' komiu mosa'angu', oposa'angu' na kinyonyoa, ka' oposa'angu' na pikilan.

2 KORINTUS 13:11

Ahennyo, to Utu-utus, sabole-bole ahi' komiu lame', ka' bala usaha da timbali ganap. Ala na pokinde'ku iwi-iwi'. Sabole-bole ahi' komiu momposa'angu' kinyonyoa ka' mompaha hongo-hongo. Tumpu Allah Anu talalo Mongkalibosi ka' saja' mompodame, aijo' na saja' monjagai komiu.

2 KORINTUS 2:3

Mokonyo aijo' tinulisku na sulat itina' toka hi komiu. Aku madi' mongka'oho' mamba montoa komiu, lantas opolibosmo miu, mae padahan komiu ahi' na anu sabenannyo mompolame' aku. Kalana ku palesaya de aku lame', makia' komiu utus iwi-iwi' suele lame' ahi'.

2 KORINTUS 7:7

Kinyonyoa kami sinanangmo misa' ola kalana i Titus tinokamo, panyo mule' kalana ia nonsisikmo mosia na kinyonyoanyo sinanangmo kalana komiu. Ia nompoto'imo hi kami tukoonyo komiu mongindi hondo da singkabot tiba aku; saba' komiu nompele-pele'mo i anu binau miu u'utu mae ka' uuka aiya mongka'oho'mo mompototu'u aku. Han aijo' nompaka posanangmo aku mule'.

FILIPI 1:4

Ka' de aku mondo'akonmo komiu Utus iwi-iwi', sanang na kinyonyoangku balado'a.

FILIPI 2:20

Ola sami-samiannyo i Timotius na mian anu pokakana na kinyonyoa tiba aku, ka' totu-totu'u mompopikilakon ka'ima'an miu.

FILIPI 4:2

To Utu-utus boune i Euodia ka' i Sintike! Ku poita sabole-bole da komiu anu nosa'angu'mo na kinyonyoa sumo to mia-mian anu sa'a-sa'angu'mo na kapalesaya'an.

KOLOSE 2:5

Kalana mau mule' aku to majo'onan tiba komiu, panyo o'anggapmo ahi', au'aitu aku sumo-sumomo daagi' itina' hi komiu. Ka' aku i lame'mo na montoa komiu nosa'angu'mo na kinyonyoa ka' nahosonmo na pinalesaya hi Kristus.

2 TESALONIKA 2:13

To Utu-utus anu nukalibosi nu Tumpu! Kami tionyo saja' mompoita talima kase hi Tumpu kalana komiu, kalana lengkat pe'e imoonanyo Tumpu nompile'imo komiu da o posalamat. Han aijo' jinadimo kalana Roh nu Tumpu na nokalaja hi komiu, da komiu timbalimo mian anu palesayamo hi Tumpu anu susi', ka' kalana komiu, pinalesayamo i lele anu totu'u lengkat mae hi Tumpu Allah.

2 TIMOTIUS 1:4

Ku inau' na kasusa'an nu kinyonyoaum. Mokonyo aijo' ku kahanda'i hondo singkabot tiba beleyum da aku timbali hondo-hondo lame'.

FILEMON 1:20

Mokonyo aijo', i uno nu sanggo nu Tumpu soba tulungi mae na aku, polame'akon mae na kinyonyoangku salaku anu moto utus hi Kristus.

2 YOHANES 1:4

Aku lame' hondo na nonsumbu' taalu' daagi' ko to ana-anak nu kita Pontina'on anu tumuu' mombatuki pangajalan nu Tumpu, susumo anu pinalentahkonmo nu Tumpu Tuuma hi kita.

3 YOHANES 1:4

Anu moko ala mompotimbali aku da lebe lame', aijo'mo samata-mata ola de aku mohongomo to ana-anakku i uno nu kantumuu'annyo montulutimo pangajalan nu Tumpu.