1 SAMUEL 7:3 - KITAB NU TUMPU ALLA LELE MA'IMAI'

³ Lantas notataemo na i Samuel hi aha mian nu Israel, “De belemiu po ule'mo monsombah Tumpu, ka' totu-totu'u ahi na kinyonyoa nu belemiu monsombah Ia, saba' tionyo ahi' belemiu mongalin iwi-iwi' na pilogot nu aha mian anu lengkat mae i salipu'an tiba patong nu Pilogot Boune Astoret. Bee'mo na butong nu belemiu totu-totu'u hi Tumpu ka' olamo Ia na osombah sahingga belemiu madi'mo opoposia nu aha mian Filistin.”

1 SAMUEL 7:3 Iomraidhean Croise

KAJADIAN 35:2

Lantas pinoto'imo i Yakub hi aha sa'anakan ka' hi iwi-iwi' na mian anu galu-galum tiba ia, “Kita mambamo lengkat i aiya ka' mokiijo'mo i Betel. Ikiijo' mae aku mompotinjomo mezbah ponsomban Tumpu Allah anu nontulungimo mae aku tempo'nyo aku kinasusa'anmo ka' anu nonjagaimo mae aku iyaya na kinalambananku. Jadi alin na patong nu to pilo-pilogot anu lengkat mae i salipu'an anu daagi' hi komiu; bau na adat pompobelesi butong ka' pusok na baju' anu belesi'.”

1 TOMU-TOMUNDO' 11:33

Ku bau na han aijo' kalana i Salomo nohikumo Aku ka' mule' nonsombahmo pilogot haha aijo', aijo'mo: Asytoret pilogot boune nu bansa Sidon, Kamos, pilogot nu bansa Moab, ka' mule' Milkom pilogot nu bansa Amon. I Salomo madi'mo nontuluti pongka'oho'-Ku. Ia madi' susumo tuumanyo i Daud anu tulu-tulutan hondo hi belengku ka' saja' ahi' mombau apaa na anu Ku palentahkon.

1 TOMU-TOMUNDO' 8:48

De ilipu' aijo' aha sanaangmo ka' totu-totu'umo na kinyonyoa nu aha mompala'imo to dosa-dosa' nu aha ka' balado'amo hi Belento mongahopi mae lipu' aiya anu binee'mo nu Belento ka' laigan ponsomban anu binaungkumo ponsomban Belento aiya.

2 TOMU-TOMUNDO' 17:39

Otuluti na Aku Tumpu Allah nu belemiu sahingga Ku lapasakonmo na belemiu da boli nu poposia nu sampo bali' nu belemiu.”

2 TOMU-TOMUNDO' 23:15

Ia mule' nongideimo tampat ponsomban kiijo' i Betel anu binau i Tomundo' Yerobeam anak i Nebot – tomundo' anu nonsaduakonmo mian nu Israel nombaumo dosa'. Lantas i Yosia nombiha'mo mezbah, i tampat ponsombahkonan aijo' ka' pinapuannyomo tiba Patong boune Asyera anu daagi' kiijo'.

1 TAWARIKH 22:19

Jadi tionyo ahi' belemiu palesaya ka' mohongo-hongo Tumpu Allah nu belemiu i uno nu kinyonyoa totu-totu'u ka' i uno nu kantumuu'an nu beleyum. Tampu'unimo na mombau laigan anu bau ponsomban Tumpu, da Peti' Palajanjian-Nyo ka' iwi-iwi' na pakakas sangga'at anu opake samata-mata de monsombahmo Tumpu, opo'una'mo i kiijo'.”

1 TAWARIKH 28:9

Lantas i Daud notataemo hi Salomo, “O anaku, tionyo ahi' Tumpu Allah anu nu sombah nu tuuma nu beleyum na nu akui salaku Tumpu Allah nu beleyum. Beleyum tionyo ahi' montuluti hondo-hondo lengkat i uno nu kinyonyoa nu beleyum totu-totu'u. Kalana nu sumbu'mo nu Tumpu na pikilan ka' tanga'an nu kinyonyoanto. De beleyum molio Ia, nukabot na Ia, panyo de beleyum mompala'i Ia, ia madi'mo mongala beleyum sampe toka sidu-sidutu'.

2 TAWARIKH 19:3

Panyo mau mule' sumo aijo' daagi' ahi' ko anu ma'ima' hi belento Tomundo. Belento Tomundo nongalinimo iwi-iwi' na Patong Pilogot boune Asyera, anu nu sombah nu mian da'isan ka' belento Tomundo mule' nombaumo sa'angu' na usaha da tumuu' mombatuki pongka'oho' nu Tumpu Allah.”

2 TAWARIKH 20:33

Panyo tampat ponsomban pilogot madi' ingideannyo. Mian da'isan suele ma'isa buke-buke' na kinyonyoa nu aha monsombah Tumpu nu mompolee' mae nu aha.

2 TAWARIKH 30:19

“O Tumpu, Tumpu Allah anu nusombah nu mompolee' mami, otaha'imani mami na kanonongan nu kinyonyoa nu Belento mongampuni aha anu hau-haunyo monsombah belento totu-totu'u na kinyonyoanyo, maumo aha ma'isa nomposusi' butong nu aha.”

AMSAL 16:1

Manusia timbali mombau sa'angu' na tanga'an panyo Tumpu Allah na mombee'i kaputusan.

YESAYA 55:7

Tionyo ahi' mian anu ma'idek na gau'nyo mombabali'i kantumuu'annyo, ka' mombali'i pikilannyo. Sahanyo ahi' ia minsusule' mae hi Tumpu, da mohumpak pangasihan-Nyo. Tionyo ahi' ia po ule' mae toka hi Tumpunto, kalana Tumpu mongampuni nu kinyonyoa anu ma'ima.

YEREMIA 24:7

Aku mosu'an, misa' monggautakon aha. Aku mombee'i hi aha da ko kahanda' mangalati', taalu' Akumo ahi' aijo' na Tumpu. Sahingga aha timbalimo mian anu palesayamo hi beleng-Ku, ka' Aku timbalimo Tumpu Allah nu aha, kalana po' ule'mo mae na aha montuluti Aku buke-buke' na kinyonyoa nu aha.

YEREMIA 36:3

Ugaat mian nu Yehuda belentimo na mombau palabuatan anu ma'idek de aha mohongomo iwi-iwi' na balaa' anu Ku pokona hi aha. Sahingga ku ampunimo na dosa' tiba palabuatan nu aha ma'i-ma'idek aijo'.”

YEREMIA 4:1

Tumpu notatae, “O mian Israel, de belemiu mongka'oho' mae minsusule' hi beleng-Ku. Alin pe'e mae na pilogot anu Ku ka'ideki aijo', ka' tulu-tulutanmo ahi' hi beleng-Ku.

YEHEZKIEL 14:6

Poto'i mule' ahi' hi aha mian nu Israel taalu' Aku, Tumpu Anu Matangkas na Kuasanyo mompoto'i hi aha, ‘Balatobatmo bolimo daagi' mombau dosa' nu belemiu ka' mule' pala'imo na pilogot nu belemiu haha atina anu mompobubun mae.’

YEHEZKIEL 18:31

Bolimo daagi' mombau iwi-iwi' na palabuatan ma'idek anu sola'mo binau nu belemiu, ka' sahanyo kinyonyoa tiba pikilan nu beleyum timbalimo ahi bu'ou. Kadaka' belemiu tionyo ahi' silaka?

HOSEA 14:1

Samaria tionyo ahi' ohukumo kalana notomuhukmo madi'mo nohongo-hongo Aku. Mian da'isan nu aha saidi' mae mohopu'mo i uno nu pahampatean; to ana-anak anu daagi bungamea osilakaimo ka' to bou-boune anu hau-haunyo poboa obiha'mo na kompong nu aha.”

MATIUS 15:8

‘Sumo uuka na koonyo nu Tumpu: To mia-mian haha aijo' ola ahi' monsombah Aku nu potatae, panyo kinyonyoa nu aha majo'on lengkat hi beleng-Ku.

MATIUS 4:10

I Yesus nontaami, “Lako' na oko anu Monggoda! I uno nu Kitab nu Tumpu tinulis: O sombah na Tumpu, Tumpuum, ka' ola Ia na hongo na palentah-Nyo!”

MATIUS 6:24

“Madi' ko samian pe'e timbali mokalaja hi ohua' na tuan. Kalana ia lebe mongkalibosi samian molingkudui anu sangga'at. Kabai ia lebe mohongo-hongo hi tuan samian molingkudui sangga'at. Sumo aitu suele na komiu. Komiu madi' timbali mokalaja bau kapentingan nu Tumpu ka' bau kapentingan suele i halata'.

LUKAS 4:8

I Yesus nontaami, “I uno nu Kitab nu Tumpu tinulis, ‘O sombah na Tumpuum ka' o hongo na palentah-Nyo.’ ”

YOHANES 4:24

Kalana Tumpu aijo' Roh, ka' ola kalana kuasa nu Roh nu Tumpu, to mia-mian moko ala monsombah Tuuma susumo daagi' ko Ianyo.”

PO'ULE' INGULIT 10:20

O'adati na Tumpu Allah nu belemiu, ka' ola Ia na osombah. Tionyo ahi' belemiu saja' tulu-tulutan hi Ia, ka' basumpa' ola samata-mata hi sanggo-Nyo.

PO'ULE' INGULIT 13:4

Mian anu susumo aijo' hukumannyo tionyo ahi' opatei, kalana kahanda'mo momposangkalinga belemiu da boli montuluti, jalan a nu pinalentahkonmo nu Tumpu Allah nu belemiu hi belemiu. Ia mian anu ma'idek kalana mompokaumo belemiu da motomuhuk hi Tumpu Allah nu belemiu anu nompobebasmo belemiu nompala'imo mae Mesir, tampat nu belemiu binotuanan. Jadi ia tionyo ahi' opatei, da anu ma'idek aijo' madi'mo saja' obau. Panyo belemiu tionyo ahi' mombatuki Tumpu Allah nu belemiu ka' mongadati Ia, otuluti na Ia, ka' obau na palentah-Nyo iwi-iwi'. Sabole-bole saja' otuluti ka' opalesaya na Ia.

PO'ULE' INGULIT 4:29

Lantas belemiu moliomo Tumpu Allah nu belemiu, ka' de o lio miu totu-totu'u na kinyonyoa, tantu o humpak nu belemiu na Ia.

PO'ULE' INGULIT 6:13

O adati na Tumpu, Tumpu Allah nu belemiu, ka' ola Ia na osombah, ka' de belemiu basumpa', aijo' obau ka' ola sanggo-Nyo na sanggo.

YOSUA 13:31

Ka' mule' suele sambagian na da'erah Gilead tiba Asytarot ka' Edrei, aijo'mo ohua' na puso nu kota i da'erah anu nu palentah i Tomundo Og kiijo' i Basan. Songko-songko na da'erah aijo' binee'mo hi sambagian na to utu-utus lee' mae i Makhir, anak i Manasye.

YOSUA 24:14

“Jadi, uuka aiya,” koonyo mule' i Yosua, “o'adati na Tumpu. Opalesaya ka' o hongo-hongo na Ia nu kinyonyoa anu totu-totu'u ka' boli panggaga. Bolimo mompalesaya to pilo-pilogot sangga'at anu sinombah nu mompolee' miu naipuan mae tempo'nyo i Mesopotamia ka' i Mesir. Anu opalesaya ka' o hongo-hongo ola samata-mata Tumpu.

YOSUA 24:23

“Desumo aijo' yo alinmo na to pilo-pilogot nu to bansa-bansa sangga'at anu daagi' itina' hi belemiu na,” koonyo i Yosua, “ka' balajanji'mo saba' belemiu mohongo-hongomo Tumpu, Tumpu Allah nu Israel.”

TO MIA-MIAN KOPIAN 10:16

Lapas aijo' ingalinmo nu aha iwi-iwi' na patong bapilogotan, lantas nonsombahmo Tumpu Allah. Sahingga Tumpu Allah nolibosmo na nontoa aha i uno nu kasansala'an aijo'.

TO MIA-MIAN KOPIAN 10:6

Aha mian nu Israel po'ule' mule' binaladosa' hi Tumpu. Aha madi'mo mongkalinga Tumpu ka' madi'mo daagi' nonsombah Ia. Aha nonsombahmo to pilo-pilogot nu bansa Siria, Sidon, Moab, Amon tiba Filistin.

TO MIA-MIAN KOPIAN 2:11

Lapas aijo' aha mian nu Israel binaladosa'mo hi Tumpu. Aha madi'mo nonsombah Tumpu, Tumpu Allah nu mompolee' nu aha, aijo'mo Tumpu Allah anu nomboamo mae aha nosabat lengkat i Mesir. Aha nontampu'uni nonsombah Baal ka' Asytoret ka' to pilo-pilogot sangga'at anu nusombah nu to bansa-bansa anu montikubi aha. Sahingga tinambuha'anmo nu Tumpu na aha ka' nompojohokmo sampobali' nu aha nontumbuhi ka' nompahuhuimo aha. Aha madi'mo noko ala nongahopi sampobali' nu aha anu aitu mae nontikubi aha.

1 SAMUEL 31:10

Lapas aijo' baju' anu pinusok i Saul nahampate pino una'mo i kuil tampat kajojoongan nu pilogot boune Asytoret ka' bangke'nyo pinopaku'mo i pagan mesen nu kota Bet-Sean.