FILIPI 2:1 - PERJANJIAN AMPAI KABAR BETIK

¹ Keti kuat, mani keti besatu jama Almasih. Rik keti tehibur mani Almasih mengasihimu! Keti dibimbing Ruh-Ni Allah, rik keti juga saling mengasihi rik kesian peperda keti.

FILIPI 2:1 Iomraidhean Croise

LUKAS 2:25

Waktu seno di Yerusalem wat jelma gelarni Simeon. Ia jelma betik, sai merabai jama Allah rik lagi nunggu waktuni Allah nyelamatko bangsa Israel. Ruh Allah wat jama ia,

YOHANES 14:18

Keti mak haga Kutinggalko tenggalan injuk yatim piatu. Nyak haga muloh jama niku.

YOHANES 14:27

Sejahtera Kutinggalko jama keti. Sejahtera-Ku tenggalan sai Kukeniko jama niku. Sai Kukeniko ano lain injuk sai dikeniko dunia jama niku. Dang gelisah, dang rabai.

YOHANES 17:13

Tano Nyak ratong jama Bapa. Sunyinni inji Kucawako sementara Nyak pagun di dunia; in tian jama sepenuhni ngerasako kegembiraan-Ku.

KISAH RASUL-RASUL 2:46

Unggal rani tian terus bekumpul di Lamban Ibadah; rik mengan jama-jama, jama riang rik rendah hati di lamban-lamban tian.

KISAH RASUL-RASUL 4:32

Sunyinni jelma sai percaya udi hurik sehati rik sejiwa. Mak sai jelma pun jak tian nganggap bahwa api sai dimilikini yakdo kedauni tenggalan. Sunyinni sai wat jama tian, tian pakai jama-jama.

ROMA 5:5

Harapan sai injuk reji mak haga ngecewako ram, mani hati ram radu diisi ulih-Ni Allah jama kasih-Ni. Allah ngelakuko ano liwat Ruh-Ni, sai radu dikeniko jama ram.

ROMA 8:26

Injuk reno juga Ruh-Ni Allah ratong nulung ram kik ram lemoh. Mani ram mak pandai injuk repa seharusni ram bedua; Ruh udi tenggalan ngehadap Allah untuk ngilu bagi ram jama mirak rik tiram nihan sehingga mak dapok diucakko.

1 KORINTUS 12:13

Injuk reno juga ram sunyin, baik jelma Yahudi maupun jelma lain Yahudi, jelma-jelma sai ngebantu maupun jelma-jelma bebas; ram sunyin radu dibaptis ulih-Ni Ruh sai gegoh udi, in ram dijadiko sai di badan Almasih ano. Ram sunyinni juga ngalami Ruh sai sai ano sepenuhni.

1 KORINTUS 15:31

Puari-puari! Unggal rani nyak tahan menderita mani nyak bangga atas hurikmu mani keti radu percaya jama Isa Almasih, Tuhan ram.

1 KORINTUS 3:16

Pandai mak Puari bahwa keti anodo Lamban Ibadah? Rik bahwa Ruh-Ni Allah tinggal di delom keti?

2 KORINTUS 2:14

Kidang syukor jama Allah! Ia selalu mimpin sekam untuk nutuk di delom barisan kemenangan Almasih mani sekam hurik besatu jama Ia. Allah makai sekam in kabar mengenai Almasih tesebar injuk himbau herum sai semerbak mik dipa-dipa.

GALATIA 4:6

Mani ketido anak-anak-Ni Allah, Allah ngayun Ruh Anak-Ni kuruk mik delom hati Puari rik di hatiku, yakdo Ruh sai beseru, “Bapa, ya Bapaku.”

GALATIA 5:22

Sebalikni, kik jelma-jelma dipimpin Ruh-Ni Allah, hasilni yakdo: Tian saling mengasihi, tian riang, tian ngedok ketenangan hati, tian sabar rik betik budi, tian mebetik tehadap ulun bareh, tian setia,

EFESUS 4:4

Angkah wat sai badan rik sai Ruh. Reno juga keti diurau untuk sai harapan sai gegoh.

FILIPI 1:8

Allah pandai bahwa nyak temon tiram nihan jama niku jama perasaan kasih mesra jak Isa Almasih tenggalan.

FILIPI 3:3

Padahal ramdo jelma-jelma sai radu nerima sunat sai sejati, lain tian. Ram nyumbah jama Allah jama bimbingan Ruh-Ni Allah tenggalan, rik ram besyukor mani ram hurik besatu jama Isa Almasih. Ram mak begantung jama upacara-upacara sai besifat laher.

KOLOSE 2:2

Sunyinni inji kulakuko in hati tian jadi kuat rik tian saling mengasihi sehingga tian kuat besatu. Jama injuk reno tian temon-temon mengerti rik yakin rik kenal jama rahasia-Ni Allah, yakdo Almasih tenggalan.

KOLOSE 3:12

Puari anodo umat-Ni Allah. Allah mengasihi keti rik milih keti untuk jadi kedau-Ni sai khusus. Udido sebabni keti harus nunjukko rasa kesian, keti harus betik hati, rendah hati, lemoh lembut, rik tahan menderita.

IBRANI 6:18

Rua hal ano mak dapok berubah: Allah mak mungkin bebuhung tentang janji rik sumpah-Ni. Ulihni seno, ram sai radu belindung jama Allah, dikeni durongan kuat untuk nyating teguh jama harapan sai tebentang di hadap ram.

1 YOHANES 3:24

Sunyin jelma sai taat jama perintah-perintah-Ni Allah, hurik besatu jama Allah rik Allah besatu jama tian. Rik ram pandai bahwa Allah hurik besatu jama ram, mani Ia radu ngeniko Ruh-Ni jama ram.

1 YOHANES 4:12

Mak sai jelma pun sai pernah ngeliak Allah, kidang kik ram saling mengasihi, Allah besatu jama ram rik kasih-Ni jadi sempurna delom diri ram.

1 YOHANES 4:16

Ram tenggalan pandai rik percaya jama kasih-Ni Allah jama ram. Allah udi kasih. Jelma sai hurikni dikuasai ulih kasih, ulun udi besatu jama Allah, rik Allah besatu jama ia.