PILOTIMUA̒TA 7:3 - KITABI HABARI MOPIOHE

³ Bo Wau̒ mamo powali hilaa li olongia baa̒ngiyolo. Tio diila tamo mandungi olemu, eleponu Wau̒ mopowoluo mai baala dadaata to Masiri.

PILOTIMUA̒TA 7:3 Iomraidhean Croise

NEHEMIA 9:10

Toli olongia lo Masiri hepilohutu mai lo Eeya susuu-aliyaalo upolu-polutuo̒, wau olo to pogawee wau ulipu lo lipulio, sababu otaawa lo Eeya woloolo mola umati lo Eeya hepiloo̒ ngongotio. Lapatao̒ lomasahuru lomola tanggulo Eeya tunggula to dulahe botie.

JABURU 135:9

Mola teeto Eeya helohutu dadaata moo̒linggolabu wau tuoto u mohukuumani mao̒ olongia wau ngoa̒amila pogaweelio.

JABURU 78:12

To talu loluuhuru limongolio, Allahu Taa̒ala helohutu moo̒linggolabu tolipu lo Masiri, todatahu lo Joan.

PILOTIMUA̒TA 11:10

Tei Musa wolei Haruna helohutu mao̒ ngoa̒amila u moo̒linggolabe boito totalu li olongia, bo Eeya helohutu olio baa̒ngiyolo, tilinggula tio diila mohuto mongohi taulo Isirai̒lu mololaa mao̒ lipulio.

PILOTIMUA̒TA 11:9

Eeya lotahuda odelei Musa, “Ti olongia diila tamo mandungi loi̒yamu, alihu Wau̒ mowali mohutu lebe dadaata mao̒ u moo̒linggolabe to ngoilanggubu lo Masiri.”

PILOTIMUA̒TA 14:4

Wau̒ mamohutu mao̒ olio baa̒ngiyolo tilinggula tio mohilapita olimongoli. Bo Wau̒ mamopo biloheo̒ okokawasaa-U̒ toli olongia lo Masiri wau suludadulio, wau mao̒taawa mao̒ limongolio deu̒ Wau̒lo Eeya.” Lapatao̒ taulo Isirai̒lu helohutu mao̒ debo odelo upilo malentao̒ lo Eeya ode limongolio.

PILOTIMUA̒TA 3:20

Bo Wau̒ mamomake okokawasaa-U̒, wau mohukuumani Masiri wolo baala ulaba-labaalo, u podunggaa-U̒ mola teto. Lapatao̒ uito, tio mamo poluasi mao̒ olimongoli monao̒.

PILOTIMUA̒TA 4:21

Eeya lotahuda mai odelei Musa, “Wau̒ malongohi mai kawasa to olemu u mohutu totoonulalo moo̒linggolabe. Oditolio de wonu yio̒ malo hualinga mola ode Masiri, pohutua mao̒ totoonulalo u moo̒linggolabe boito totalu li olongia lo Masiri. Bo Wau̒ mamohutu olio baa̒ngiyolo, tilinggula tio diila mohuto mongohi bangusa boito monao̒.

PILOTIMUA̒TA 4:29

Lapatao̒ tei Musa wolei Haruna lonao̒ mola ode Masiri wau helo ngambu mao̒ ngoa̒amila tau̒wa lo Isirai̒lu.

PILOTIMUA̒TA 4:7

Lapatao̒ Eeya lotahuda mao̒, “Muli potuwota mola uluu̒mu ode delomo boo̒mu.” Tei Musa lohutu mao̒ odito, wau tou̒ tio luli lopolualai, uluu̒ boito maloluli.

PILOTIMUA̒TA 7:13

Eleponu odito ti olongia debo baa̒ngiyolo wau diila mohuto momandungi loi̒ya lei Musa wolei Haruna, debo odelo u matilahuda lo Eeya.

PILOTIMUA̒TA 9:16

Bo timongoli hiluliya-U̒ mao̒ tumu-tumulo, alihu Wau̒ mowali mopo bilohei okokawasaa-U̒ to olemu, tilinggula tanggulu-U̒ mowali polu-polutuo̒ to ngoilanggubu dunia.

POHUMAYA 21:1

Tutuuwauwa debo odelo Eeya mongaatulu taluhu dutulaa alihu tumolohu modudua̒ kahandaki-Lio, odito olo Eeya modelo pikiilangi li olongia.

YESAYA 51:9

Pobongulo yaa Eeya, tulungiaalo mai mongowatotia, poa̒ahuwalo mai mongowatotia wolo kawasa lo Eeya. Pobongulo debo odelo to jamani muloololio mai tou̒ Eeya lopotoyopu oli Rahab wau lomituo̒ naha lo deheto boito tunggula yilate.

MIKHA 7:15

Pohutuwalo mai u moo̒linggolabu duo̒lo mongowatotia, yaa Eeya, debo odelo u piohutu lo Eeya muloololio mai tou̒ Eeya lodelo mongowatotia yilumualao̒ lonto Masiri.

YAHYA 4:48

Ti Isa lotahuda mao̒ ode pogawee lo pamalenta boito, “Wonu timongoli diila loo̒onto totoonulalo moo̒linggolabe, yi timongoli diila palacaya.”

WUNGGULI LOMONGO RASULU 2:22

Mongo wutato tau-tauwalo Isirai̒lu! Dungohilo wolo uiloi̒ya mai lowatia botie: ti Isa taulo Najaret boito mailohia tuugasi lo Allahu Taa̒ala ode wutato. Uito loi̒laalo daa̒ tou̒ tilolahepalo u moo̒linggolabu wau susuu-aliyaalo upolu-polutuo̒ upilohutu mai lo Allahu Taa̒ala tohuungi mongoli lotimbulude toli Isa boito. U ngoa̒amilalo boito mailotaawa lowutato lohihilao.

WUNGGULI LOMONGO RASULU 7:36

Tei Musa boitolo talodelo bangusa lo Isirai̒lu yilumualai lonto Masiri wolo helohutu u moo̒linggolabe wau susuu-aliyaalo upolu-polutuo̒ to Masiri, to Deheto Meela, wau tohuta datahu u luasi daa̒ wau delita wopato pulu lotaunu mola.

ROMA 15:19

udiludua̒ wolo totoonulalo u moo̒linggolabe wau susuu-aliyaalo upolu-polutuo̒; ngoa̒amilalo boito wolo kawasa lo Rohullah. Habari Mopiohe pasali li Isa Almasi mapilo habari lowatia ngoa̒amilalo ode tau-tauwala, tumulalo mai lonto Yerusalemu demola Ilirikum.

ROMA 9:18

Oditolio, Allahu Taa̒ala modehu hilao ode tahingota-ngotaawa, wonu Allahu Taa̒ala mokahandaki odito. Wau Allahu Taa̒ala olo moo̒sababu ode tahingota-ngotaawa mowali baa̒ngiyolo, wonu Allahu Taa̒ala mokahandaki odito.

TINGULI 4:34

Wolo tingga woluo ila tuwau u buheli mohama mao̒ bangusa tuwau monto babaa-ngusawalo tawoluo tulusi mopowali mao̒ olimongolio umatilio lohihilao, debo odelo u pilohutu lo Eeya Allahu Taa̒ala limongoli ode limongoli to Masiri? Timongoli loo̒onto lohihilao woloolo mola Allahu Taa̒ala wolo olootolo uleidaa̒ lopodungga mai baala wau popaatea, helo kalaja totoonulalo moo̒linggolabe wau helohutu susuu-aliyaalo moo̒tihela hapato.

TINGULI 7:19

Eelai mola babaa-lawaalo ulaba-labaalo u silakusia limongoli lohihilao, totoonulalo moo̒linggolabu, wau olootolo daa̒ u pilomake lo Eeya Allahu Taa̒ala limongoli u lolopato olimongoli. Odito olo Eeya Allahu Taa̒ala limongoli mamo pohutu mao̒ to ngoa̒amila bangusa tao̒ohe limongoli.