Rasul 3:25 - O GIKIMOI AWI JAJI ma BUKU

²⁵ De Awi jaji o nabi-nabi isingongangasu magena ma meta nginika, de kiaka nanga ete de nanga topora yodupa yacoho o Gikimoi Awi jaji wotetemo o Abrahamka, ‘ma ngale ngona, de ani ngopa, de lo ani danoku so o bi bangsa dangodu o duniaka done asa Ai laha yamake,’ de o jaji magena lo ma meta nginika.

Rasul 3:25 Iomraidhean Croise

Dodadi 12:3

Nako o nyawa yaaka o loha ngonaka done Ngohi lo Ai laha onaka tasidumu. Nako o nyawa o dorou yaaka ngonaka done Ngohi lo onaka takutuku. Ma ngale ngona so igogou o nyawa o bi doku dangodu yamake Ai laha.”

Dodadi 17:19

Duma o Gikimoi gena unaka wotemo, “Upa komagena. Ani pedeka ongo Sara done asa o ngopa yanau moi mowisibuo de ngona asa nowisironga o Ishak. Ngohi Ai jaji tacoho tagogou dede ani ngopa una magena de lo to una awi ngopa de awi danoku gena ma bati sidutu ikakali, la ma ngale Ngohi manena gena asa todadi to una awi Gikimoi.

Dodadi 18:18

sababu to una awi ngopa de awi dano lo done asa yadala sidago idadi o bangsa ilalamo de yokokuasa. De kanaga lo Ai laha towisidumu ma ngale una so o bi bangsa o dunia ma dokuka aku o loha yamake.

Dodadi 20:7

So o orasi manena dabolo ngona notagi bato o ngopedeka muna magena nomisigiliho ma rokaka. De ma roka una magena o nabi moi, so aku una wonisisumbayang la ngona upa nosone. Sababu nakoso nomisigilihowa unaka de, kodo, ngona de ani nyawa yangodu lo bilasu nisone bai!”

Dodadi 22:18

Sababu ngona noisigise Ngohika, so ma ngale ngona, de ani ngopa, de lo ani danoku so o bi bangsa dangodu o duniaka done asa Ai laha yamake.’ ”

Dodadi 28:14

Ani ngopa, de ani danoku, de lo galaweweku o orasi ma simaka done asa manga dala maro o dowongi o teo ma dateka. So done asa ifero de yodobiau, de lo yapareta o wange ma siwa, o wange ma dumu, o koresara sidago lo o koremiaka. So de ma ngale ngona, de ani ngopa, de ani dano sidago lo ani galaweweku o bi nyawa yangodu o dunia ma dokuka asa o Jou Awi laha wosidumu.

Lukas 1:72

Igogou, nanga ete de nanga topora idodomaka Una wagalusiri, so Awi jaji datebi magena Una wasiganapu.

Rasul 13:26

Ai gianongoru de ai awabira ningodu, o Abraham awi ngopa de awi dano, de o bi gianongoru ma somoasi nidupa niwisusuba o Gikimoika, o Gikimoi Awi salamati ma habari gena inasiado ngoneka.

Rasul 2:39

Sababu o Gikimoi Awi jaji done asa o Gurumi Datetebi wahike gena, ma meta nginika sidago nia ngopa de nia danoku de lo ma meta o bi nyawa yangodu kanaga manga riho ikukuruka, ena gena nagoona bato nanga Jou Gikimoi wodupa waaso so ona yahino Unaka.”

Roma 15:8

Sababu hika nimasininga o kia naga ma Kristus waakaka, magena ma ngale ngone o Yahudika ma nyawa asa wonaleleani la o dodoto itotiai ma ngale o Gikimoi gena wonasikelelo. Ena gena, wosiganapu o Gikimoi Awi jaji ma ngale o Salamati ma Kolano nanga ete de nanga toporaka.

Roma 4:13

Hika ngini idodomaka niosiningali o Gikimoi wojaji o dunia ma bi doku dangoduka gena o Abraham wihike de lo awi ngopa de awi danoku. Upa sababu o Abraham o Gikimoi Awi bobita o Musa walelefo gena wamote, duma una o Gikimoi wipiricaya so o Gikimoi awi sininga waaka itiai Unaka.

Galatia 3:16

So komagena lo ma orasi o Gikimoi wojaji o Abrahamka, de wosingangasu done asa o bi moi-moi idala wahike unaka de lo Una o Abraham awi ngopa de awi dano moiku. Duma ma ngale ona yadala o Gikimoi wotemowa, cawali wotemo, “ani ngopa de ani dano moiku,” gena ka ma ngale o nyawa womatetengo Una magegena ma Kristus.

Galatia 3:29

De sababu ngini ma Kristus niwipiricayaka, so o Gikimoi wotemo ngini maro o Abraham awi ngopa de awi danoku, so o Gikimoi Awi jaji dangodu o Abrahamka gena aku niamake.

Galatia 3:8

De lo idomaka o Gikimoi Awi Bukuka isilefo done o nyawa o Yahudika yasowo, nako Una wipiricayaka, done Una asa to ona manga sininga waaka itiai. De idodoma Una o habari daloloha asa o Abraham wisingangasuka wotemo, “Sababu ma ngale ngona done Ngohi asa o bangsa yangodu o duniaka Ai laha gena tasidumu.”

Gogelelo 14:6

Kagena de ngohi takelelo o malaikat ma somoa moili una magena wososo o ngawa-ngawaku wouti, de waaho o Gikimoi Awi habari daloloha gena isihabari ka sidutu ikakali. Waaho la ma ngale wasihabari o bi nyawa igogoge o duniaka, ona magena o bi bangsa moi-moi, o bi soa moi-moi, de lo o bi bahasa moi-moika.

Gogelelo 5:9

De ona kagena yangodu inyanyi gena o nyanyi damomuane moi itemo, “Ngona notiai o buku o lolo moi nadehe ma segel-segel gena aku naraca. Sababu Ngona gena nitoomaka Ani au ikopola sidago nosone. Ma ngale lo o Gikimoi yangodu Ngona naija o nyawa ona manga sihino o bi bangsa o dunia ma gilolino o bi soa moi-moi lo de lo o bi bahasa moi-moino.

Gogelelo 7:9

Magena daboloka, de ato takelelo kali o nyawa kanaga he ka yadadala poli so, ngaroko, paeto lo paakuwa. Ona gena manga sihino o bi bangsa moi-moi, de o bi soa moi-moi, de lo o bi bahasa moi-moino. De kagena o Duba ma Goho de Awi pareta ma kursi ma simaka ona imaokoye, de o juba daaare imasitibaku de lo o tano ma bi soka yacohono.