Rasul 27:1 - O GIKIMOI AWI JAJI ma BUKU

¹ So ma orasi isitatapu daboloka ma ngale o Paulus de ngomi o deruku mipane la miside mikahika o Romaka gena o Italia ma daeraka, so de mimajobo o Paulus de o nyawa yamuruo naga o bui ma rabaka yasisaraha o Yuliuska, una magena ma Kaisar awi prajurit yaratu moi manga sahe.

Rasul 27:1 Iomraidhean Croise

Dodadi 50:20

Ngini nia edekati gena ma ngale ngohi nisangisara. Duma o Gikimoi Awi edekati gena ngini winisimaha ngohi nisangisara ma ngale nginika done asa o loha waaka. Sababu ngohi dede Awi kuasa ngini de lo o nyawa yadadala tasisalamati la upa yosone, so komagena o loha taaka o nyawa yadadalaka.

Matius 27:54

Ma kapita moi dede awi prajurit-prajurit o Yesus wijojajaga gena o osu de lo o kia naga idadadi magena yakelelo, de ona yamodo imasidotirineku, de yotemo, “We! O nyawa Una manena igogou o Gikimoi ma Ngopa!”

Lukas 23:47

O prajurit-prajurit manga kapita moi o kia naga idadadi magena wakelelo, de una o Gikimoi wigiliri, de wotemo, “We! O nyawa Una manena igogou Awi sala ihiwa!”

Lukas 7:2

De o doku magenaka kanaga o Romaka manga kapita kanaga awi leleani moi foloi wisayangi. O leleani una magena wopanyake so awi siri he datubusoka, so he yadangade wosone.

Rasul 10:1

Kanaga o Kaisarea ma kotaka o nyawa moi awi ronga o Kornelius, una o Yahudika ma nyawa wisowo de o Roma o Italiaka manga prajurit o bolu moino gena yaratu butanga ma kapita.

Rasul 10:22

De ona yasango itemo, “Ma kapita o Kornelius womisulo ngomi so miahino miniaso. Una magena o nyawa awi sininga itotiai moi de o Gikimoika wodupa wisusuba, de lo una o Yahudika ma nyawa yangodu iwihoromati ifoloi. Una magena dabolo o Gikimoi Awi malaikat moi iwisulo la wogolo ngona nahinosi awi tahuno, ma ngale wosigise o kia ngona notetemo unaka.”

Rasul 16:10

So o Paulus o gogelelo magena wamakeka, de gila-gila ngomi mimasidailako la mitagi o Makedoniaka. Sababu miamalo igogou o Gikimoi womisulo so bilasu mitagi o habari daloloha misihabari o bi nyawa o daera magegenaka.

Rasul 18:2

De kagena o kota magenaka una wamake o Yahudika ma nyawa moi o Pontusno, awi ronga o Akwila. Sababu ma Kaisar Klaudius wosulo daboloka o Yahudika ma nyawa bilasu o Roma yodongosa, so una de ma pedeka ongo Priskila o Italiano yakahino so asa imasidiado o Korintuska. De o Paulus wotagi ona yasinoto walega.

Rasul 19:21

Dangodu magena daboloka, de o Gurumi Datetebi iwisingangasu o Pauluska, so o Paulus wasitatapuka asa wotagi kasi o Makedonia ma daeraka de o Akhaya ma daeraka, dabolo de asa woliho wokahino kali o Yerusalemka, so wotemo, “Kadoka la taado daboloka, de ngohi bilasu o Romaka totagi kasi.”

Rasul 21:32

So orasi magena dabolo ma kapita magena wotagi o bi prajurit de manga bi sahe wangoso de ona itagi imagogora yakahino o nyawa yadadala imatotolomuno. De ma orasi o nyawa yadadala wikelelo una dede to una awi prajurit, de ona imatoguka so o Paulus he wingapo kawa.

Rasul 22:26

So o prajurit manga sahe magena woise, de una wotagi de ma kapitaka wodedemo, “Baba, o nyawa una magena o Romano ma nyawa. De dadoohaso ngona nosulo so ona wiaka komagena.”

Rasul 23:11

So o putu magena de o Jou Yesus wahino womaokoye o Paulus awi dateka, de wotemo, “Ai ngopa, ani sininga naputuru de upa lo nimodo, sababu o kia ngona nosingangasu dabolo o Yerusalemka ma ngale Ngohi, komagena lo igogou asa ngona nosingangasu kali o Romaka.”

Rasul 23:17

So kagena de o Paulus wiaso o prajuritka manga sahe moi, de wotemo unaka, “Hika notagi o gohiduuru manena nowitota ma kapitaka, sababu o habari kia naga moi asa wodedemo unaka.”

Rasul 24:23

Dabolo de una wipareta o prajuritka manga sahe moi magena o Paulus iwijaga, duma upa he wibui de wisimaha sidago to una awi dodiao lo aku yahino ma ngale awi oho ma kurangi moi-moi wihike unaka.

Rasul 25:12

So kagena de o Festus de awi mahkamah ma nyawa imatekesikadailako, dabolo de wotemo o Pauluska, “Sababu ngona masirete nagolo la ma Kaisar Roma wonitailako de wonihakim, so o orasi manena asa ngona tonisitota kadoka ma Kaisarka bato.”

Rasul 25:25

Duma ngohi tamakewa una manena o dorou moi lo waaka sidago una bilasu iwitooma. Sababu una masirete wogolo ngohika la towisidingo ma Kaisar Romaka la una asa iwitailako, so komagena ngohi tositatapuka asa una wotagi.

Rasul 27:11

Duma o prajuritka manga sahe magena womaha-mahawa o Paulus awi demo magena, duma o deru wapopareta de o deru woaahoka to ona manga demo foloi womote.

Rasul 27:43

Duma o prajuritka manga sahe magena awi dupa la o Paulus wisisalamati, so una wasimahawa manga edekati magena yaaka. So ka wapareta nagoona aku itobo imatengo, de upa he o ifaka imasigocoho, hika imaumo idoma o teoku ma ngale itobo sadine o dududusa.

Rasul 27:6

So kagena miutiku, de o Yulius o deru moili wosari de wamakeka o Aleksandriano ma deru moi manga edekati itagi iside o Italia ma daeraka. So ngomi mingodu o deru magenaku womisibane la mimajobo miside kali.

Rasul 28:1

So ngomi aku misalamati ma bati o dududusa miaado, de o orasi magena asa mianako o gura magena isironga o Malta.

Rasul 28:16

De ma orasi o Roma ma kotaka mimasidiado, o Paulus gena o prajuritka manga sahe aku wisimaha una wotagi de o prajuritka wijajaga moi so ona igoge imakatahu moi.

Ibrani 13:24

Mia salam misidingo ngini nia bobareta idodoto ona yangoduka de lo kagena o bi nyawa ipipiricaya ona yangoduka. De o bi nyawa ipipiricaya o Italia ma daerano, ona magena kanaga isidingo o salam nginika tanu asa pomakamake.