Rasul 26:16 - O GIKIMOI AWI JAJI ma BUKU

¹⁶ Ngaroko o Gikimoika ani manara komagena, duma nomomi, sababu Ngohi todupa tomasimane ngonaka ma ngale tonisitatapu ngona asa Ai manara naaka de lo asa nosihabari o nyawa yangoduka, maro o kia ngohi tomasimane ngonaka o orasi manena de lo maro o kia o orasi ma simaka Ngohi asa tonisingangasu ngonaka.

Rasul 26:16 Iomraidhean Croise

Lukas 1:2

O kia naga yalelefoka, gena imatero maro o jarita kanaga inadedemo ngoneka, gena igogou ka ma nonomasi o kia naga idadadi magena dangodu o nyawa de manga lako masirete yosikeleloka, so o Jou Awi demo gena yosihabarika.

Rasul 1:17

O Yudas una magena to ngone nanga dodiao moi, sababu una lo iwihirika la wonamote pomanara dede ngone.”

Rasul 1:25

so bilasu o Yudas witagali la waaka o rasul ma manara magena. Sababu o manara magena o Yudas wodongosaka, so ma ngale magegena asa ma fanggali wamake, ena gena o sangisara ikokakali ma rihoka.”

Rasul 20:24

Ngaroko komagena, ngohi bilasu totagi o Yerusalemka, sababu ngohi tamaloka bai tooho bai tosone dadoohawa, hitilahi ngohi ai manara bilasu taaka ma bati tosibolo, de nakoso maro o gogitina moi so tomagogora sidago lo ma bati taado. Ena gena, aku o Jou Yesus Awi manara taaka so tosingangasu o habari ma ngale Una, la de o Gikimoi Awi dodara so o bi nyawa aku wasisalamati, so o manara magena asa tosibolo, maro o kia bato woisulo bilasu ngohi taaka.

Rasul 21:19

So mimatekesikomore daboloka, de o Paulus wosingangasu o manara moi-moi o Gikimoi wiriwo la una waaka o Yahudika ma nyawa yasowo manga sidongirabaka.

Rasul 22:10

So kagena de ngohi tosano kali totemo, ‘Ya, Jou, o kia bilasu ngohi taaka.’ De o Jou Yesus wosango ngohika wotemo, ‘Nomomi! De notagi o Damsyik ma kotaka nowosa. Kagena asa isingangasu o moi-moi dangodu o Gikimoi wositatapuka bilasu ngona naaka.’

Rasul 23:11

So o putu magena de o Jou Yesus wahino womaokoye o Paulus awi dateka, de wotemo, “Ai ngopa, ani sininga naputuru de upa lo nimodo, sababu o kia ngona nosingangasu dabolo o Yerusalemka ma ngale Ngohi, komagena lo igogou asa ngona nosingangasu kali o Romaka.”

Rasul 26:15

De ngohi tosango totemo, ‘Ya, Jou! So Ngona naguuna.’ So kagena de o Jou wotemo, ‘Ngohi manena o Yesus, kiaka ngona noisasangisara gena.

Rasul 6:4

De ngomi manena o orasi isigeto-geto ka misumbayang de ka o habari daloloha misihabari bato.”

Roma 1:5

De kanaga lo ma gola gena to Una magena Awi manara, so aku pamake o Gikimoi Awi laha de wonasitatapu ngone podadi Awi sosulo, la to Una Awi habari daloloha magena posihabari o nyawaka. La ma ngale ma Kristus wihoromati gena, upa ka cawali o Yahudika ma nyawa, duma o bi bangsa dangodu manga sidongirabaka o bi nyawa aku Una iwipiricaya sidago lo iwisigise.

Roma 15:16

la ma ngale o Yesus Kristus Awi manara taaka o Yahudika ma nyawa yasowo manga sidongirabaka. De kanaga Una magena ngohi woisitatapuka, la o Gikimoi Awi habari daloloha asa tosihabari onaka ma ngale ona aku iwipiricaya ma Kristuska, sidago o Gikimoi Awi Gurumi asa manga dorou wasisa de ona gena wadehe daloha. Maro idodomaka o bi nyawa manga suba gena aku o Gikimoi wadehe daloha.

2 Korintus 4:1

So ma ngale ngomi mia manara o habari daloloha misihohabari gena mia sininga upa he daceke, sababu o manara magena o Gikimoi womigalusiri so womihike ngomika.

2 Korintus 5:18

O Gikimoi Awi manara magegena dangodu waaka ngoneka. Una Awi Ngopa wisulo la wosone, so Una dede ngone asa pomarimoika de pomakadameka. De kanaga ngomika o manara womihikeka la mitagi o habari magena misihabari o nyawaka, ma ngale ona lo aku dede Una imarimoika de imakadame kali.

Galatia 1:12

De upa lo nitemo o nyawa moi woidoto ngohika. Hiwa! Duma o Yesus Kristus masirete Una asa o habari daloloha magena woisimane ngohika.

Galatia 2:2

De o nyawa moi lo ngohi isulowa totagi, duma o Gikimoi Una masirete ngohi woisinako, so tanako bilasu ngohi totagi o Yerusalemye. So kagena ngohi dede o gogobu manga bi roriri ona magegena asa mimatolomu o riho moika. De kagena ai manara ma ngale o habari daloloha o Yahudika ma nyawa yasowoka tasihabari so magena ngohi tasingangasu onaka. Upa sidago ai manara idoma taaka daboloka de o orasi manena taaka kali gena, o roriri ona magena yangodu yaholu.

Efesus 3:3

Magena Una Awi ngale, kiaka ma nonomaka de wosikokelelo waasi, gena Una masirete kanaga ngohi woisingangasuka, de kanaga lo ngohi idomaka kanaga ma cunu talefoka.

Kolose 1:23

Ngini asa nitebika, hitilahi o dodoto itotiai gena ngini niapiricaya daputuru sidago lo nia piricaya gena nisitatapu igogou. Upa sidago nia ngongano o dodoto itotiai inisihohabarika gena ngini niodongosa. O dodoto itotiai magena isihabari dabolo o nyawa yadadala o dunia ma dokuka, de ma ngale o dodoto magena ngohi manena Paulus lo ai manara tosihohabari moi.

Kolose 1:25

Ngohi gena o Gikimoi woisitatapuka ma ngale to Una Awi gogobu ma leleleani moi, la ngaroko ngini o Yahudika ma nyawa nisowo lo o Gikimoi Awi dodoto ma ngale ma Kristus gena daasu-asu tinisingangasu nginika.

1 Tesalonika 3:2

la miwisulo o Timotius wotagi wakahika nginika. Una magena mia dodiao o Yesus wipipiricaya de o Gikimoi wileleleani so o habari ma ngale ma Kristus wosihabari. De una miwisulo la wakahika nginika ma ngale nia sininga wosiputuru. So ngini ma Kristus niwipiricaya foloisi daputuru,

1 Timotius 1:12

Ngohi o Paulus tosumbayang to ngone nanga Jou Yesus Kristuska, “Ya, Jou! Ani laha ka ilamo poli.” Una o buturu woihike ngohika sidago o habari daloloha aku tosihabari, sababu Una woipiricaya ngohi, so woitide la o bi nyawa aku taleleani.

1 Timotius 4:6

O bi moi-moi dangodu idomaka ngohi talefoka gena, ngona bilasu nadoto nanga dodiao o Yesus wipipiricayaka. La ma ngale o dodoto itotiai, maro ngone papipiricayaka de ngona namomoteka gena, ngona ani sininga ma rabaka asa foloisi daputuru, so ngona maro o Yesus Kristus Awi roriwo moi asa ona magena aku naleleani daloha.

2 Timotius 4:5

Duma ngona gena, ngaroko o sangisara ma rabaka eko lo o loha ma rabaka, bilasu ani sininga de ani rohe ma nyafusu gena napareta daloha. Bilasu ngona o sangisara namoku, de o habari ma ngale Yesus Kristus gena notagi nosihabari. So ani manara ma rabaka o kia o Gikimoi wonisitatapuka dangodu magena bilasu namanara.