Rasul 2:4 - O GIKIMOI AWI JAJI ma BUKU

⁴ De o Gurumi Datetebi Awi kuasa wowosa ona yangoduku, de manga sininga ma rabaka wopareta so de o kuasa magena ona isolano isibicara de o bi bahasa ma somoa.

Rasul 2:4 Iomraidhean Croise

Matius 10:19

So nakoso ngini nitago la ningaho o bobaretaka, upa lo nimodo ma ngale o kia bilasu ngini nisango. Sababu ma orasi magena de o kia naga itiai la nidedemo gena o Gikimoi masirete asa winihike.

Markus 16:17

La o nyawa yopipiricaya ona magena tahike Ai kuasa la o nonako ihahairani aku yaaka. Komagena lo de to Ngohi Ai ronga aku o toka yodusu, de ona lo asa isibicara o bi bahasa ma somoa,

Lukas 1:15

Sababu una done asa wodadi o nyawa wilalamo moi o Jou Awi simaka. Una womasimahawa o anggur eko o dalu woudo, de ka wisibuo kusi una gena o Gurumi Datetebi ma kuasa daasu-asu wiparetaka.

Lukas 1:41

De komagena ami salam gena ongo Elisabet moise, de to muna ami ngopa ami roheka magena imahiti, de o Gurumi Datetebi Awi kuasa daasu-asu asa iwosa munaku de wopareta.

Lukas 1:67

O Yohanes ma baba, o Zakharia, una magenaku o Gurumi Datetebi Awi kuasa daasu-asu iwosa de wipareta, so o Gikimoi Awi demo wosingangasu gena wotemo,

Lukas 12:12

Sababu o orasi magena de o Gurumi Datetebi asa winisingangasu nginika, o kia bilasu ngini nitemo.”

Lukas 21:15

Sababu Ngohi masirete asa o demo ma buturu de lo o cawaro gena tinihike itiai nginika, sidago nia saturu moi lo yaakuwa o kia naga nitetemo gena yasango eko isiholu.

Lukas 4:1

Daboloku, o Yesus o Yordan ma Seleraka so he womajobo de o Gurumi Datetebi ma kuasa daasu-asu wipareta so wingaho o tona ibobeleuka.

Yohanes 14:26

Duma kanaga Ai Baba Awi Dagali moili magena done asa winidoto nginika. Awi Dagali o Gurumi Datetebi gena Ai Babaka togolo so Una wosulo la done asa wahino nginika, ma ngale o bi moi-moi dangodu ngini niamomanara gena winidoto, de lo o bi moi-moi tinidodedemoka gena dangodu winisisininga kali.

Yohanes 20:22

De kagena de Una asa wasiwuwu onaka, de wotemo, “O Gurumi Datetebi manena hika ngini niadehe daloha to ngini nia sininga ma rabaka.

Rasul 1:5

Sababu dede o ake gena o Yohanes winisiosi, duma o wange muruo nagasi done to ngini nia siningaku asa wowosa o Gurumi Datetebi.”

Rasul 1:8

Duma bilasu ngini nianako ma orasika done asa o Gurumi Datetebi wouti de wowosa nginiku de o Gikimoi winihike o kuasa, la ngini nidadi Ai saksi ma ngale Ngohi o Yerusalemka, o Yudea ma daera ma sigilolika, de o Samaria ma daeraka de sidago lo o dunia ma pupuku ihaka.”

Rasul 10:46

Sababu ona iise o bi nyawa ona magena aku isibicara o bi bahasa irupa-rupa o Gurumi Datetebino de o Gikimoi wigiliri de wisilamo. Kagena de o Petrus wotemo,

Rasul 10:47

“Hika nianano, igogou o bi nyawa ona magena o Gurumi Datetebi manga siningaku wowosaka, imatero bato de ngone. So nako daloha, hino la ngone paosi ona magena dede o ake bai!”

Rasul 11:15

So ma orasi ngohi tosolano tobicara, we, o Gurumi Datetebi manga siningaku wowosa imatero idodoma idadadi ma nonoma ngoneka.

Rasul 13:52

De o bi nyawa ipipiricaya kadoka o Antiokhiaka orasi isigeto-geto yanali de manga more ifoloi, de o Gurumi Datetebi Awi kuasa daasu-asu manga sininga yapareta.

Rasul 13:9

So kagena de o Saulus, una iwisironga lo o Paulus, o Gurumi Datetebi Awi kuasa unaka, so winano o gogomahateka,

Rasul 15:8

De o Gikimoi asa wanako o nyawa yangodu manga sininga moi-moi, de Awi Gurumi Datetebi wahike o nyawa o Yahudika yasowo imatero maro wonahike ngone o Yahudika, de komagena wonasingangasu ngoneka ona lo wadupa.

Rasul 19:6

De lo o Paulus awi gia wahado onaku la o Gurumi Datetebi wowosa onaku de waparetaka, sidago ona aku o Gikimoi Awi habari isibicara de o bi bahasa irupa-rupa Awi Gurumino.

Rasul 2:11

o Yahudika ma nyawa de lo o Yahudika ma nyawa yasowo duma o Yahudika manga agama pamoteka, de asa ma binukali o Kreta de o Arab ma nyawa. Ngaroko komagena, duma ngone inangodu poise ona aku ibicara de moi-moi to ngone nanga doku ma demo, de ona inasingangasu ngoneka ma ngale o Gikimoi Awi manara ilalamo-lamo moi waakaka bai!”

Rasul 2:3

Dabolo de yakelelo o kia naga koloko o uku ma sora ilade-lade de ihaja so itangi de igoge moi-moi ona magenaku.

Rasul 4:31

Ma orasi isumbayang dabolo o riho imatotolomuka magena ihiti. De o Gurumi Datetebi Awi kuasa daasu-asu iwosa ona yangoduku, so wopareta sidago o habari daloloha o Gikimoino isihabari de manga modo lo ihiwa.

Rasul 4:8

O Petrus de o Gurumi Datetebi Awi kuasa daasu-asu wipareta, de wosango wotemo, “Baba-baba, o Mahkamah Agama ningodu de lo o Israelka manga roriri.

Rasul 6:3

So, ai dodiao nipipiricaya, nakoso daloha, de hika niahiri o nyawa yatumudingi to ngini nia sidongirabano nianako icocawaro de o Gurumi Datetebi Awi kuasa daasu-asu manga sininga wapareta, de asa ngomi ona magenaka miahike o oho ma roriwo ma manara.

Rasul 6:5

O bi rasul manga duga de manga sidailako magena ona yangodu isimote daloha. So kagena de ona o nyawa yatumudingi yahiri, ena gena moi awi ronga o Stefanus, una magena awi piricaya daputuru de lo awi sininga daasu-asu o Gurumi Datetebi wapareta, komagena lo yahihirika o Filipus, o Prokhorus, o Nikanor, o Timon, o Parmenas de lo o Nikolaus, una magena awi sihino o Antiokhia ma kotano de una o Yahudika ma nyawa wisowo duma idodomasi o Yahudika manga agama asa wamoteka.

Rasul 6:8

O Stefanus una magena o Gikimoi Awi laha de Awi kuasa iwisidumuka, sidago una o nonako ihahairani ifoloisi ilamo waaka o Yahudi ma kawasa manga simaka.

Rasul 7:55

Duma de o Gurumi Datetebi Awi kuasa o Stefanus womamataga o sorogaye, de una wakelelo o Gikimoi Awi mulia isiru-siru ma rabaka de o Yesus womaokoye Awi girinaka.

Rasul 8:17

So dabolo o Petrus de lo o Yohanes manga gia yahado ona magenaku, de o Gurumi Datetebi wowosa to ona manga siningaku.

Rasul 9:17

Mutuwade o Ananias wotagi de wowosa o tahu magenaka. So kagena de awi gia wahado o Saulusku, de wotemo, “Ai nongoru Saulus, o Jou Yesus nowikokelelo o ngeko ma soaka ma orasi ngona nokahino nonena gena, Una masirete woisulo ngohi tahino ngonaka la nomasigelelo kali de o Gurumi Datetebi Awi kuasa iuti ngonaku.”

Roma 15:13

Ngohi togolo o Gikimoi, Una waaaka so ngini niwingongano, Una magegena lo winisiputuru, so nakoso niwipiricaya gena aku nia siningaka foloisi danali de lo isanangi. La de o Gurumi Datetebi ma buturu ngini niangongano o Gikimoika gena foloisi idogo-dogo.

1 Korintus 12:10

De o nyawa moi kali kanaga wasicatu o kuasa, la una eko muna magena aku o nonako ihahairani yaaka. O nyawa moi kali kanaga wasicatu, la una eko muna magena aku o Gikimoi Awi demo yosingangasu. O nyawa moi kali kanaga wasicatu, la una eko muna magena aku o kia naga o Gikimoi Awi Gurumino de o kia naga o gurumi ma somoano gena yahiri itiai. De o nyawa moi kali kanaga wasicatu, la una eko muna magena aku o bi bahasa irupa-rupa o Gikimoi Awi Gurumino isibicara. De lo o nyawa moi kali kanaga wasicatu, la una eko muna magena aku o bi bahasa Awi Gurumino ma ngale gena yodedemo.

1 Korintus 13:1

Hika tosiade-ade. Ngaroko ngohi kanaga o dunia ma nyawa manga bahasa de lo o malaikat manga bahasa irupa-rupa o Gurumi Datetebino gena aku tosibicara, duma ai dodara o nyawaka gena ihiwa, de to ngohi ai demo moi-moi gena dangodu asa ma faida ihiwa. So ai demo moi-moi gena kanaga imatero maro ka o lipa eko o gosoma ma ili idodo-dodo gena ma ngale lo ihiwa.

1 Korintus 13:8

O dodara gena ma bati lo ihiwa de lo magena idadiwa isisa. Ngaroko kanaga o cocatu o Gikimoi Awi demo yosingongangasu, duma magena o orasi ma simaka done asa isisa, sababu Awi demo dangodu gena done wosiganapu. De ngaroko kanaga o cocatu o bi bahasa irupa-rupa yosibobicara, duma magena o orasi ma simaka done asa isisa, sababu done upa he yosibicara. De lo ngaroko kanaga o cocatu sininga ma kanako o Gikimoino, duma magena o orasi ma simaka done asa isisa, sababu o bi moi-moi dangodu done ka panako so upa he o nyawa yadoto.

1 Korintus 14:18

Ngohi ai sukuru kanaga tatide o Gikimoika, sababu o cocatu o bi bahasa irupa-rupa o Gurumi Datetebino gena ngohi asa tamakeka ifoloi dede ngini ningodu.

1 Korintus 14:5

Ngohi tongongano gena kanaga ngini ningodu o bi bahasa irupa-rupa o Gurumi Datetebi noaku nisibicara, duma ifoloisi daloha la ngini asa o Gikimoi Awi demo nisingangasu. Sababu o nyawa la kanaga o Gikimoi Awi demo isingongangasu o nyawaka, magena ma faida foloisi ilamo. Duma o nyawa la kanaga o bi bahasa irupa-rupa o Gurumi Datetebino gena isibobicara, magena ma faida moi lo ihiwa, ka cawali nakoso o bahasa magena aku yodedemo ma ngale o gogobuka la manga piricaya lo isiputuru.

Efesus 5:18

De upa nidalu, sababu o nyafusu ma dorou done isibao. Ka daloha nakoso nginiku la o Gurumi Datetebi ma kuasa daasu-asu gena iwosa de nipareta,

Efesus 6:18

O moi-moi gena niaaka de magena ma rabaka ngini de Awi Gurumi ma buturu bilasu nia sumbayang o Gikimoika gena upa itogu, la salalu nimajaga de nimasidailako ma ngale Awi nyawa yangodu so aku nigolo Unaka.

1 Petrus 1:12

Ona magegenaka o Gikimoi wasingangasu, la Awi demo kiaka ona isingongangasu magena ma meta gena ona kawa, duma ma ngale ngini manenaka gena inileleani. De Awi demo isingongangasu magena, o orasi manena naga asa inisingangasu nginika, ma orasi Awi sosulo-sosulo o habari daloloha isihabari gena, de o Gurumi Datetebi Awi kuasa gena o Gikimoino. Awi laha winisidudumu nginika, magena o bi malaikat lo manga dupa foloi daputuru la tanu yatailako.

2 Petrus 1:21

Sababu o Gikimoi Awi nabi idodoma o demo isingongangasu magena upa o nyawa manga dupa masirete, duma ka Una Awi Gurumi Datetebi ma dupa so yodedemo.