Rasul 16:23 - O GIKIMOI AWI JAJI ma BUKU

²³ So yangangapo yasiri-siri daboloka, de gila-gila ona yasinoto yasingosa o buika, de o bobareta yasulo o bui ma jojaga manga saheka la yajaga yasidodiahi.

Rasul 16:23 Iomraidhean Croise

Matius 26:48

Ma nonomasi una gena o nonako moi wahikeka, wotemo komanena, “O nyawa naguuna ngohi towihahame gena, Una magena dabolo. Una niwitago!”

Lukas 21:12

Duma dangodu magena idadi waasi, de ngini asa nitago, de nisangisara, de lo ningaho o bi puji ma tahuka de o bi buika. De lo ngini asa ningaho o kolanoka eko o bobaretaka ma sababu ngini to Ngohi Ai nyawa nimomote.

Rasul 12:18

So daginitano o bi prajurit iruwahe de ikalala, sababu yogamamu dadoohaso o Petrus o bui ma tahuka he wihiwaka.

Rasul 12:4

Iwitago dabolo de o Petrus o bui ma tahuka iwisingosaka, so kagena o prajurit o bolu iha yasulo iwijaga imateketotagali, so o bolu moi o prajurit yaruruha. Sababu awi edekati o Paskah ma Rarame dabolo de o Petrus iwingaho o hakimka, la o nyawa yadadala manga simaka kagena awi demo wahiri, nakoso isala de asa isulo iwitooma.

Rasul 16:27

Kagena de o bui ma jojaga manga sahe womomi, de wakelelo o bui ma ngora ipelenga dangoduka, so awi sininga ma rabaka wotemo nagala o bi nyawa yapopilikuka gena iloda yangoduka, so awi sumarangi walia la tanu womatooma.

Rasul 16:36

So o bui ma sahe wosingangasu o Pauluska wotemo, “Baba-baba, o Roma ma bobareta isulo ngohika la tinisisupu. So nitagi niliho bato, de nimapopongo de upa lo nitoosa.”

Rasul 5:18

So o bi rasul ona magena yatagoka de buika yasingosaka.

Rasul 5:23

“O baba-baba, ngomi miakelelo o bui ma ngora iperesuka de yakucika, de yojajaga lo kagena o ngoraka yojagaka, duma ma orasi ngomi o ngora magena miapelenga, kadoka o bui ma rabaka o rasul ka moi lo miwimakewa bai!”

Rasul 8:3

Duma o Saulus una magena awi edekati waaka ma ngale o gogobu wasisa, so wotagi o tahu wageto, o nyawa ipipiricaya yanau eko lo o ngopedeka walilia la o bui ma tahuka wasingosa.

Rasul 9:2

de o surati kuasa womagolo ma meta o bi puji ma tahu ma bi sahe o Damsyik ma kotaka, la tanu wisimaha kagena wahika de wamake o bi nyawa ona magena o Jou Yesus iwipipiricaya, bai yanau de lo o ngopedeka, gena aku watago de wangaho o Yerusalemka.

2 Korintus 11:23

Ona gena ma Kristus Awi nyawa wileleleani? (We! Ai demo gena maro o nyawa witotogosa moi.) Ngohi igogou ma Kristus Awi nyawa ileleleani ifoloi daloha de ona yangodu bai! Ngohi tomanara ifoloi. Ngohi isingosa o bui ma rabaka isidadu-dadu. Ngohi ingangapo foloi de lo mamoi-mamoi he dangade tosone bai!

2 Korintus 6:5

Ngomi gena o nyawa mingangapoka, de o buika miumoka, de lo o nyawa yadala iroruwahe gena ngomi imisikangamoka. Ngomi mimanara datubuso, sidago lo mamoi-mamoi miaakuwa mimaidu eko lo miodo.

Efesus 3:1

O Yahudika ma nyawa de o Yahudika ma nyawa yasowo ona magena o Gikimoi wasirimoi daboloka, komagena so ngohi, Paulus, ma ngale ngini gena togolo Unaka. Ngohi kanaga ibuika, sababu ma ngale o Yesus Kristus ngaroko ngini o Yahudika ma nyawa nisowo gena tinisihabarika.

Efesus 4:1

Mutuwade, ai dodiao nipipiricaya, kiaka kanena ngohi ibuika ma ngale taaka o Jou Awi manara gena, tinibaja de togolo nginika la tanu ngini o kia naga moi-moi niaaka bilasu imatero maro o nyawa o Jou wahihirika yaaka.

2 Timotius 2:9

Ngaroko o habari daloloha tosingangasu o nyawaka so ngohi asa isangisara maro o nyawa itotooma moi sidago irate de o buika isingosa, duma igogou o Gikimoi Awi habari gena akuwa yarate so asa isihabari kali.

Filemon 1:9

duma tosininga ngona gena o Gikimoi Awi nyawa nadodara. So ka ngonali ngohi asa tonibaja de tonigolo. Mutuwade ngohi manena o Yesus Kristus Awi dagali moi so ibuika ma ngale Una towileleani,

Gogelelo 1:9

Ngohi manena o Yohanes to ngini nia dodiao moi o Yesus wipipiricayaka. So maro ngini komagena lo ngohi o Gikimoi Awi pareta todamaha so ngaroko ngohi isisangisara, duma o sangisara gena ngohi tamoku. Komagena so o Gikimoi Awi demo de lo ma ngale Una gena o Yesus wosingangasu itotiai, de magena ngohi lo tosihabarika so asa iumo o Patmos ma guraka.

Gogelelo 2:10

He! Niisesi. Ngaroko, ngini upa he nimodoli. Sababu igogou-gogou sutusi de o Iblis asa yaaka so ngini nimuruo naga o bui ma rabaka nisingosa la inibaja ma ngale Ngohi upa he nipiricaya. Komagena de asa nisangisara, duma ma deka cawali o wange mogiowo. La ngaroko kagena de ona yodupa nitooma, tanu ngini asa niapiricaya daputuru Ngohika. Nako niaaka komagena, de ma fanggali asa taaka nginika so ngini dede Ngohi asa nioho ka sidutu ikakali. Komagena so ngaroko kanaga ngini nisangisara ifoloi, tanu upa he nimodoli.