Rasul 15:8 - O GIKIMOI AWI JAJI ma BUKU

⁸ De o Gikimoi asa wanako o nyawa yangodu manga sininga moi-moi, de Awi Gurumi Datetebi wahike o nyawa o Yahudika yasowo imatero maro wonahike ngone o Yahudika, de komagena wonasingangasu ngoneka ona lo wadupa.

Rasul 15:8 Iomraidhean Croise

Yohanes 21:17

De kanaga ma para saangeka Una wotemo kali, “Simon, o Yohanes ma ngopa, ngona gena igogou Ngohi noisiningasi?” De kanaga ma para saangeka to Una Awi sano komagenali, so o Petrus awi sininga ipeleso so wagogou-gogou wotemo, “Iya, Jou, komagena. Ngona masirete lo o bi moi-moi dangodu kanaga ka nanako, so ka nanako igogou ngohi manena tonisosiningasi Ngonaka.” So o Yesus asa wotemo kali, “Nako komagena, de ngona bilasu najaga de nasiputuru daloha o nyawa to Ngohi Ai duba-duba ona magena.

Yohanes 5:37

De lo Ai Baba Una Ngohi woisuloka so tahino, Una masirete lo o bi moi-moi ma ngale Ngohi gena wosingangasu daboloka. Duma ma ngale Ngohi woisusuloka la tahino gena ngini manena nipiricayawa, so ngini lo ma moi waasi Ai Baba Awi ili niise de Awi jamani lo niakelelowa, eko Awi demo ma ngale lo nia sininga ma rabaku gena iwosawa.

Rasul 1:24

De ma orasi magena ona isumbayang itemo, “Ya Jou, igogou Ngona nanako o bi nyawa yangodu manga sininga, so migolo nomisidumu ngomika o nyawa yasinoto, ona manena naguuna Ngona masirete nowihiri daboloka,

Rasul 10:47

“Hika nianano, igogou o bi nyawa ona magena o Gurumi Datetebi manga siningaku wowosaka, imatero bato de ngone. So nako daloha, hino la ngone paosi ona magena dede o ake bai!”

Rasul 14:3

So kagena o Paulus de o Barnabas yogoge yateka, de yobarani idoto ma ngale o Jou Yesus. De o Jou Awi kuasa wahike la ona aku yaaka o nonako ifoloisi ihahairani, la komagena wasinako to ona manga dodoto ma ngale to Una Awi dodara magena igogou.

Rasul 15:28

Ngomi miasulo ona sababu o Gurumi Datetebi wositatapuka, so komagena ngomi lo minisulo o bobita moi-moi upa niaaka so cawali kamanena bato:

Rasul 2:4

De o Gurumi Datetebi Awi kuasa wowosa ona yangoduku, de manga sininga ma rabaka wopareta so de o kuasa magena ona isolano isibicara de o bi bahasa ma somoa.

Rasul 4:31

Ma orasi isumbayang dabolo o riho imatotolomuka magena ihiti. De o Gurumi Datetebi Awi kuasa daasu-asu iwosa ona yangoduku, so wopareta sidago o habari daloloha o Gikimoino isihabari de manga modo lo ihiwa.

Ibrani 2:4

De o Gikimoi masirete o demo ona isingongangasuka gena wosiputuru, sababu waaka o nonako moi-moi ihahairani la Awi kuasa wosikelelo, de lo mote to Una Awi dupa masirete o Gurumi Datetebi o cocatu moi-moi magena wositoku onaka.

Ibrani 4:13

O dodadi moi lo ihiwa la kanaga o Gikimoika imamingihu, duma dangodu-ngodu magena aku wakelelo, maro Awi simaka kanaga ipelengaka. Una magenaka ngone bilasu nanga gogoho posinako itiai.

Gogelelo 2:23

Igogou, Ngohi asa tatooma o nyawa ona magena nakoso to muna ami dodoto gena yamote de yacoho. Komagena so o bi gogobu yangodu gena asa yanako igogou-gogou Ngohi manena gena o nyawa ngini ningodu nia sininga ma raba tatailako, de tanako ma ngale nia loha de nia dorou ma sopo done tafanggali de o loha eko lo de o dorou.