Lukas 8:13 - O GIKIMOI AWI JAJI ma BUKU

¹³ O gisisi ma binuka itutura o tona datetetoka ioho duma damalaika, gena imatero bato o nyawa yoise o habari daloloha de yadehe de manga sininga isosanangi. Duma koloko ma ngutu ilukukuwa, so ona yopiricaya itekawa. So de ma ngale o habari daloloha so yasisangisara, de gila-gila ona ma Jou wipalako so imakiliho de ikafirika.

Lukas 8:13 Iomraidhean Croise

Markus 6:20

Ma Kolano Herodes wosulo o buika o Yohanes iwijaga iwisidodiahi, sababu iwinako o Yohanes una magena awi sininga iloa de ibanari, de lo una magena o Gikimoi Awi sosulo so wisubaka. De o Herodes lo o Yohanes awi bicara gena wodupa woise, ngaroko wisigamamuka.

Lukas 8:12

O gisisi itutura o ngekoku gena imatero bato o nyawa yoiseka o Gikimoi Awi demo, duma o Iblis wahino de wakoora to ona manga sininga ma rabano so isisaka, la upa yopiricaya de upa lo yosisalamati.

Lukas 8:14

O gisisi ma binuka itutura o tona datototopoku so o totopo yalalo so isoneka, gena imatero bato o nyawa o habari daloloha magena yoiseka. Duma manga sininga ihawateri ma ngale manga oho duniaka ma rabaka, de yodupa yokaya, de lo yodupa o sanangi ma rabaka igoge. Komagena o Gikimoi Awi demo yosingou kawa, de o manara daloloha lo yodupa kawa.

Yohanes 15:2

De Una wototoro magena kanaga Ngohika, nakoso o anggur ma hutu de ma uma gena isopowa, Una done asa walora o uma magena. De nakoso kanaga ma umaka la igogou de ma sopo, ma uma magena done asa Una wodebi ma ngale ma sopo foloisi idala.

Yohanes 15:6

De nakoso o nyawa la kanaga yomakitingaka dede Ngohi, de yogogewa o rimoi ma rabaka dede Ngohi, ona magena manga sopo ihiwa de ona magegena maro o uma yaotoka, de yaumo so asa damalai. O uma maro komagena yatolomu so o ukuka yaumo de yatupuka.

Yohanes 5:35

O Yohanes una magena aku powisitero maro o poci moi, sababu una awi demo gena inisidumu nginika ma ngeko idodooha la aku nisalamati, maro o poci patupu so isora. De ngaroko ngini niadupa, ma orasi ka ma cunu de o nita unano magena inidisiwa nginika so asa ninalika.

1 Korintus 13:2

De ngaroko ngohi lo kanaga o Gikimoi Awi demo aku tosingangasu, de sininga ma kanako o Gikimoino gena dangodu tamakeka sidago lo o bi moi-moi kiaka o nyawa yananakowa gena dangodu ka tanako, de lo ai piricaya daputuru sidago lo o tala moi aku tosulo imasituluru, duma ai dodara o nyawaka gena he ihiwa, de to ngohi ai oho gena asa ma faida ka ihiwa.

1 Korintus 15:2

De ma ngale o habari daloloha magegena so ngini aku nia dorouno nisisalamati, hitilahi ngini nimasigocoho daputuru o demo kiaka ngohi tinisihohabari nginika. Upa sidago to ngini nia piricaya gena ma faida ihiwa.

Galatia 3:1

Ilaha! Totemo, ngaroko, idodooha ngini o Galatia ma nyawa, o Yesus Kristus o sangahadika wodupa wosone gena tinidoto daboloka, duma nia sininga ma rabaka asa itiai waasi so ka isalasi. Cedeke! Nagala kanaga o nyawa gena to ngini nia siningaka igogou isigamamuka.

Galatia 3:4

Ce! Komagena ma faida ihiwa. Tanu upa nimaaka komagena. Ngaroko o nyawa nisisangisara ilamo de nia piricaya daputurusi, duma nagala ngini nisihoda waasi, ena gena ka cawali o Gikimoi Awi Gurumi ma buturu.

Efesus 3:17

Nako komagena, de ma ngale ngini nia piricaya so ma Kristus gena kanaga wogoge nia sininga ma rabaka. De ngohi lo togolo la tanu ngini nia oho ma gola gena o dodara, maro o gota moi o tonaku isibelo so ma ngutu isupu de ioho daputuru. So o dodara nia siningaka lo tanu imasingutu la ifoloisi daputuru, maro o tahu moi isigoko ma sosode dapoputuruka.

Kolose 1:23

Ngini asa nitebika, hitilahi o dodoto itotiai gena ngini niapiricaya daputuru sidago lo nia piricaya gena nisitatapu igogou. Upa sidago nia ngongano o dodoto itotiai inisihohabarika gena ngini niodongosa. O dodoto itotiai magena isihabari dabolo o nyawa yadadala o dunia ma dokuka, de ma ngale o dodoto magena ngohi manena Paulus lo ai manara tosihohabari moi.

Kolose 2:7

Ena gena, maro ngini inidoto daboloka so komagena tanu ngini Una niwipiricaya daputuru, maro o gota moi ma ngutu kanaga o tonaku isibelo de iwosa, so nia piricaya lo ma buturu gena tanu ifoloisi idogo. De kanaga moili bilasu lo nia sukuru ifoloi niatide o Baba Gikimoika.

1 Tesalonika 3:5

Ngone pomakitingaka de ngohi he tapoha kawa, so towisulo la o Timotius wakahika nginika ma ngale ai edekati gena bilasu tanako nakoso igogou ngini o Yesus niwipiricaya daputurusi. Sababu ngohi tohawateri upa sidago o Iblis ngini inibaja daboloka so o Yesuska niwipiricaya kawa, so to ngomi mia manara datotubuso gena ma faida de ma sopo lo ihiwa.

1 Timotius 1:19

Ani kudoti ma rabaka gena bilasu nopiricaya daputuru o dodoto itotiaika de naaka bato o kia ngona nanako igogou magena itiai. Kanaga o nyawa yamuruo naga iholu yaaka o kia bato ona yanako igogou magena itiai, de ka yopiricaya o dodoto ikokulaika. So komagena manga piricaya itotiai isisaka, maro o deru ilalamo moi o teoku dalutu so isisaka.

Ibrani 10:39

Duma ngone manena gena inasowo o nyawa la kanaga imakokiliho de ipiricaya kawa, gena done ona yasangisara. Duma ngone o nyawa la kanaga o Gikimoi powipiricaya, gena asa pooho ka sidutu ikakali.

Yakobus 2:26

So komagena ngone lo nakoso o Jou Yesus powipiricayaka duma o loha moi-moi paakawa, ngone nanga piricaya gena asa ma faida lo ihiwa. Maro o nyawa moi la awi rohe isoneka so awi buturu ihiwaka, de o manara kia naga moi lo waaku kawa waaka.

2 Petrus 2:20

Komagena ngaroko ona idodomaka nanga Jou Yesus Kristus igogou iwinakoka so o dunia ma bi nyawa manga dorouno Una wapalakoka, duma ona magegena o dorou gena he yapiliku kali sidago lo o dorou magena ka yaparetasi. Komagena so ma ngale ona magena o dorou yapopiliku, kodo, ma duuruka gena kanaga foloisi datubuso onaka dede idodomaka, ma orasi ona nanga Jou Yesus Kristus iwipiricaya waasi.

2 Petrus 2:22

Kanaga o ade-ade moi gena itemo, “O kaso ngaroko imangunaka, duma ma nguna magena yodupa yaodo kali, de lo o titi ngaroko imaosika, duma yodupa itagi o pepekeku so imagawa kali.” O ade-ade magena igogou imaketero de o guru ona magena, sababu idodoma o dorou yododongosaka de yogiliho kali.

1 Yohanes 2:19

O nyawa ma Kristus wihoholu gena, ngaroko idomaka dede ngone pomatekekomote, duma ona magena de ngone la o gogobu ka ka moi gena hiwa, sidago ona itagi so ngone inatinga de inadongosaka. Nakoso ona de ngone la igogou o gogobu ka ka moi, de ona bilasu igoge dede ngone. Duma ona gena ngone inadongosaka, la ma ngale o nyawa yangodu aku yanako ona magena o nyawa moi lo upa imasicapu dede ngone o gogobu moi.

Yudas 1:12

Ma orasi ngini o gogobu nia dolomu ma odo ma rabaka la o Jou Yesus Awi sone nisosininga, de ona magena ibarani yorarame de ikalala poli, sidago lo ma ngale ona magena ngini lo nimade de nia ronga ma dorou yogaka. De ona yoodo ilamo poli, ka manga rohe masirete yojaga. Kanaga ona manga manara ma sopo ihiwa, maro o bi lobi dataroka duma o paro isisaika so imuurawa. De lo ona maro o gota isosopowa, de ma ngutu lo imasidarapuka so idadi datololeka.