Lukas 24:44 - O GIKIMOI AWI JAJI ma BUKU

⁴⁴ Dabolo de Una wotemo onaka, “Manena o kia naga tinisingangasu nginika, ma orasi idomaka de Ngohi kanaga dede nginisi. O bi moi-moi ma ngale Ngohi, kiaka o Jou Awi bobita o Musa de lo o bi nabi ma somoa isilelefo ma Buku ma rabaka de lo o Mazmur ma Bukuka gena, dangodu bilasu isiganapu.”

Lukas 24:44 Iomraidhean Croise

Dodadi 14:18

Kanaga o Salem (de isironga lo o Yerusalem) ma kolano moi awi ronga o Melkisedek de gila-gila una de lo o Sodom manga kolano yotagi o Abram wisibubusu o Syawe ma pidoka, gena ma ngale lo o Lembah Raja. O Melkisedek una magena lo o Gikimoi Wilalamo Awi imam moi so o roti de o anggur wigaho o Abramka, ma ngale to una awi ino de awi udo.

Dodadi 22:18

Sababu ngona noisigise Ngohika, so ma ngale ngona, de ani ngopa, de lo ani danoku so o bi bangsa dangodu o duniaka done asa Ai laha yamake.’ ”

Dodadi 3:15

Komagena Ngohi tinisikadanggutu ngona de o ngopedeka muna manena, ngona de muna nia ngopa de lo nia danoku. So to ngona ani ngopa de ani dano asa manga sahe yapiropu de to muna ami ngopa de ami dano asa manga tutuweneka yatudu.”

Dodadi 49:10

Ngona ani ngopa de ani dano done o nyawa yapareta, ipareta imatoguwa sidago o nyawa moi ngo wahino. Una magena wihiri de wisulo wahino wopareta so o bi doku yangodu lo wisigise ka ka una bai.

Matius 1:22

O bi moi-moi dangodu magena bilasu idadi de imaaka la isiganapuka, imatero maro o kia idomaka o Gikimoi Awi demo ma nabi Yesaya wosilefo daboloka, ena gena,

Matius 16:21

Ma solano o orasi magena de o Yesus Awi muri-murika womadedemo wositotiaika, ena gena wotemo onaka, “Ngohi manena bilasu totagi o Yerusalemka. De done o Yahudika manga roriri, o imamka ma bi sahe, de o bi guru agama ona Ngohi iholu, so ona asa isangisara dasiri ma bati itooma de isosone. Ngaroko iaka komagena, duma o wange saangeka de Ngohi tooho kali.”

Matius 26:54

Duma nakoso ona Ngohi itatago magena ngone palawangi, de o kia naga idomaka o Gikimoi Awi Jaji ma Buku ma rabaka isilelefo gena asa isiganapuwa, kiaka itetemo o bi moi-moi dangodu magena o orasi manena bilasu idadi de imaaka Ngohika.”

Matius 26:56

Duma igogou bilasu komagena, sidago idadi de imaaka maro o kia idomaka o bi nabi-nabi isilelefo o Gikimoi Awi Jaji ma Buku ma rabaka.” Kagena de Awi muri-muri yamodo so yoloda de Una widongosaka.

Markus 9:31

sababu to Una Awi muri-muri wadotosi. De una wotemo gena komanena, “Ngohi o Nyawa ma Duhutu manena done asa isidoa Ai saturu manga gia ma sohaka, so Ngohi asa itooma, duma o wange saangeka de asa Ngohi tooho kali.”

Lukas 21:22

Sababu o orasi magena o Gikimoi Awi saturu wasangisara, ena gena ma orasi yaadoka, la o bi moi-moi isilelefo to Una Awi Jaji ma Buku ma rabaka dangodu asa isiganapu.

Lukas 22:37

Sababu kanaga isilelefo o Gikimoi Awi Jaji ma Buku ma rabaka itemo, ‘Asa o Salamati ma Kolano wieto maro o nyawa ma dorou moi.’ De o kia naga isilelefo gena bilasu idadi Ngohika, sababu o kia naga ma ngale Ngohi manena isingangasu idomaka isilelefo o Gikimoi Awi Jaji ma Buku ma rabaka, magena o orasi manena he idadi.”

Lukas 24:46

So Una wotemo onaka, “O Gikimoi Awi Jaji ma Buku ma rabaka isilefo itemo, Ngohi o Salamati ma Kolano manena bilasu isususa de isangisara sidago itooma, dabolo de o wange saangeka asa tooho kali.

Lukas 9:22

De lo wotemo, “Ngohi manena, o Nyawa ma Duhutu, done o Yahudika manga roriri, o imamka ma bi sahe, de o bi guru agama ona Ngohi iholu, so ona asa isangisara dasiri ma bati itooma de isosone. Ngaroko iaka komagena, duma o wange saangeka de Ngohi tooho kali.”

Lukas 9:44

“Niosininga de nimadiahi to Ngohi Ai demo manena: Ngohi o Nyawa ma Duhutu manena done asa isidoa Ai saturu manga gia ma sohaka.”

Yohanes 3:14

Maro ka idodoma o Musa o tona ibobeleuka de kanaga o didiki moi maro o ngihia gena o tabagano isitulada watide la nagoona yakokelelo gena isonewa, de komagena lo Ngohi o Nyawa ma Duhutu bilasu o sangahadiye isidola.

Yohanes 5:39

Ngini gena o Gikimoi Awi Jaji ma Buku magena nimadoto nikaeli, sababu nitemo Awi demo ma rabano asa o oho ka sidutu ikakali niamake. Ngaroko, Awi demo magegena igogou ma ngale Ngohi manena so asa inisingangasu nginika,

Yohanes 5:46

Duma nakoso ngini gena o Musa niwipiricaya, igogou ngini lo bilasu nipiricaya Ngohi, sababu o bi moi-moi o Musa walelefoka ma ngale Ngohi gena komagena.

Rasul 13:40

Ma sababu magena, so nimasitiari de ai demo niamote de upa niholu, la o kia o bi nabi manga bukuka isilelefo upa sidago nidahe nginika, ena gena,

Rasul 3:18

Duma komagena o Gikimoi wosiganapu maro o kia wasulo idomaka to Una Awi nabi-nabi, la inasingangasu ngoneka, ena gena bilasu o Salamati ma Kolano gena wamake o sangisara.

Rasul 7:37

O Musa una magena lo wotemo o Israel ma nyawaka, ‘Done o Gikimoi asa wihiri to ngini nia sidongirabano de winihike nginika o nabi moi, imatero de ngohi.’

Ibrani 10:1

O Jou Awi bobita o Musa wosilelefoka gena ka imatero de o nonako moi. O bobita ma rabaka o nyawa yanako waasi o bi moi-moi daloloha ma Kristuska gena aku yamake. Duma o bobita ma rabaka gena ona yakelelo ka cawali o bi moi-moi daloloha ma Kristuska gena ka ma gurumi, so ma jamani ma duhutu gena yakelelo waasi. Maro o nyawa moi nakoso una nonena wotagi wokahino de ka cawali awi gurumi awi simaka idoma so pakelelo o tonaka. So o suba kiaka isitatapu o bobita magena ma rabaka, ngaroko o taungu moi de o taungu moili ma simaka ona yahino manga suba-suba ka imakoketero yaaho isisuba o Gikimoika, duma o nyawa manga siningaka o dorou gena yasisa lo yaaka yaaku waasi.

Ibrani 3:5

Nako o Musa gena, waaka wokaeli o Gikimoi Awi tahuka ona magena waleleani, duma una gena ka cawali o leleani moi. Una wasingangasu onaka ma ngale o kia naga done o orasi ma simaka o Gikimoi asa wosikelelo.

Ibrani 7:1

O Melkisedek manena o Salem ma kolano moi de lo o Gikimoi Wikukuruye ma imam moi. Ma orasi o Abraham awi lawangi o bi kolano wasitura daboloku de womabulutu so woliho kali, o Melkisedek una magena kanaga o Abraham wisibubusu de wogolo o Gikimoi Awi laha wisidumu o Abrahamka.

Ibrani 9:8

De o bi bobita komagena o Gurumi Datetebi ngone wonadoto, nakoso o ngihi ma nonoma de maenasi, gena ma ngale o ngeko moi ihiwasi la o nyawa aku o ngihi ma sinotoka, ena gena o Ngihi Foloi Datetebika, kagena aku yowosa ma ngale o Gikimoi iwidate.

1 Petrus 1:11

Kanaga ma Kristus Awi Gurumi manga sininga ma rabaka wasingangasu onaka, Una done asa o sangisara widahe de ma duuruka lo asa o loha widahe ifoloisi idala. So magena muruoka de ma dongoho kiaka ona yodupa yanako, so ona yatailako isidodiahi.

Gogelelo 19:10

So kagena de ngohi asa to una awi simaka tobukuku la ai suba tatide unaka. Duma una wosibicara wotemo ngohika, “Upa! Ngohi gena ka to ngini nia dodiao moi o Gikimoi Awi sosulo, imatero maro ngona de lo ani dodiao ona o habari ma ngale o Yesus Kristus yosihohabari. So tanu ka o Gikimoi Una magenaka asa ngona nosuba. Sababu o bi nabi ona yangodu lo, bai o orasi manena bai o orasi ipapasaka, ma ngale o Yesus Awi dodoto itotiai gena yosingangasu daboloka.”