Wundeegwaarak 19:9 - Ala Wone Peenok Peebi Mbanak

⁹ Yori lagangge mbareegi, at Aliku ALA nen Muta yoge, “An wone nimbirak mbanggwi nogo it aakumi Iterali nen inaruk konembunuk, koone yorage nogo mondok-mondok abet mbako logowak nduk, an ameraakot apit aago enggela'me keya wambi woraagin o,” yinuk, yoge mbareegi, at Muta nen it aakumi Iterali yereegwaarak nogo Aliku ALA yoreegerak.

Wundeegwaarak 19:9 Iomraidhean Croise

1 Endagembogut 8:12

Togop aret age mbareegi, at Talomo nen Aliku ALA yoge, “Kaliku ALA nen ari logonet, An o ndugwi yumaak aago enggela'me wonage minggirak, yereegindak me,

2 Mbinineegwaarak 20:20

Ti'nuk, ko'lu kuubondendok it aakumi karume Tekowa nawok nduk, eeko mbareegwa, at Yotapat nen mi'na'nuk, wone yorage logonet, “Kit aakumi Yekura mendek inom, Yerutalem mendek inom, an wone yokkirage me, kinaruk logonip o. At Aliku kinogoba Ala kiniki oba panggombugwi kiinok, kiniki nu'lek eerogo pinagage, ndi, it aap Ala nen yorage kagak yoraga nen wone yokkirogo nogogwaarak nogo abet aret mbakwi kiinok, eeriyak mbakotak nogo a'me nggelok ari, eeke kaamunggup o,” yinuk, yoragagerak.

2 Mbinineegwaarak 6:1

Togop aret age mbareegi, at Talomo nen Aliku ALA yoge logonet, “Kaliku ALA nen, An o ndugwi yumaak aago enggela'me wonage minggirak o, yinuk, yereegindak me,

Ndawi 97:2

Ndugwi inom, o yumaak aago inom, At enaagan-ambokan wanggerak wonage, At nen obeelom eeppiinet nage, a'me nggelok eeke, Eeke menggerak nogo ti, At wone lengganogo yorage menggim Ti paga panggonak wonage menggerak o.

Ndawi 99:7

Ndugwi logonak enggela'me nen yorage kenok, “Yogop ee'nu ndogop ee'nu,” yorage nagagerak inom, Wone lengganogo yorage nagagerak nogo inom, Ineenggi liirogon pippunuk eeko nogogwaarak o.

Wundeegwaarak 14:31

It aakumi Iterali mendek nen Aliku ALA omaawi paga it Metit mendek eeginabeegerak nogo iigo nogogwaarik, Aliku ALA ayuk wuko logonet, at Aliku ALA inom, ayeloman Muta nogo inom, inoone abet mbareegwaarak.

Wundeegwaarak 19:16

Yorage nagagerik, wonogwe me, nogo mbere yinuk, ko'lu kuubondendok paga o ngguurubu eeke, o yabok eeke, puut nogo paga tit kunogo pege, eeke logonet, trompet oone nggwok lombok pu eeke mbareegi, it aakumi inawooliyana wonogogwaarak nogo abok aret inagabiti nen inaganak wareegerak.

Wundeegwaarak 20:21

Yorage nagagerik, it aakumi Iterali nogo tayorogon taati mi'ndak iigak, at Muta alik aret ameraakot yumak-lumak aago Ala wonage me panggorogon taati aret ari nagagerak.

Wundeegwaarak 34:5

Lagi nage nagagerik wonage me, Aliku ALA nogo ndugwi enggela'me nen Muta wonage me owagam mi'nari wambi wage nagagerik, at Aliku ALA nogo endage kumbatinuk,

Wundeegwaarak 4:31

it aakumi Iterali yo'nggok nogo nen, “Aaninggin-paaninggin ninoba pinanege nogo, Aliku ALA nen enegen niige nagaarik, koonggerak kogo o,” yinuk, iniki abet mbako logonet, inendobanggun yindumbunuk, alut eereegwaarak.

Wundeegwaarak 4:5

Age mbareegi, Aliku ALA nen, “It aakumi Iterali inombomini Abarakam inom, Itak inom, Yakup inom, at Aliku inogoba Ala nogo nen kat nikkeya wagaarak abet aret kombaruwak nduk, togop aret eeri namunggun o.”

Yetaya 19:1

O Metit mendek eeppiyoorak Ala nen abinggaanggo paga yoreegerak nogo yi aret. Ndugwi mbe agan nage ti paga Aliku ALA kwi'na'nuk o Metit nage yi, kaanip o. It Metit mendek inagugi ogut aago nogo inaganak wake, It aakumi Metit mendek iniki ma'nage, Eeko agaarik o.

Linggineegwaarak 12:5

at Aliku ALA nogo ndugwi logonak enggela'me nen wambi wage nagagerik, ooliya wurik tungga paga taa'nogo mi'ndak logonet, “Kit Karun Miriyam kimbirak yime panggo yi woraanip o,” yorage mbareegi, imbirak panggo yi nogo mbareegwa,

Matiyut 17:5

Wone awo yoge kagak, ameraakot abinak mendek nobappiya wage kagak, enggela'me nen oone ambi yorage logonet, “An naput niniki kunik nale'nggen ee'nake nogo yi aret me, at oone kinaruk liirogon konenggo logonip o.”

Marakut 9:7

Yoge mbareegi, ameraakot nobappiya wage nagagerik, enggela'me nogome nen oone ambi ari logonet, “An naput niniki kunik yi aret me, at oone kinaruk liirogon konenggo logonip o,” yinuk, ari koneneegwaarak.

Lukat 10:16

Yorage nagagerik, at oone waganggwi mendek ambinom yorage logonet, “It aakumi kit kinoone konenggwi kenok ti, an noone aret konenggwi, kit mbo pinagagwi kenok ti, an aret mbo panugwi, ndi, it nen an mbo panugwi kenok ti, at nappani wagagerak nogo aret mbo pugwi, eeko menggaarak aret o,” yinuk, yorage nagagerik, nappiyareegerak.

Pelaareegerak 4:10

At Aliku kinogoba Ala enggaanom puut Korep paga mi'ndak kiigak, Aliku ALA nen an yo'nege logonet, It aakumi Iterali ti, an noone yorage inaruk liirogon konembunuk, an inagabiti nombako logomenggaarik, kangga'lek awo ineenik wonogo logonet, inapurilogwe mamuninako logowak nduk, aakumi Iterali ti, an nowagam kuwak ari woraawak nen yoret o, yinuk, yo'nereegerak eyom nogo abeko logonip o.

Pelaareegerak 4:36

Agi mbogut paga nen at oone ari kinaruk konenumunggup nduk, kinaruk wake, ndi, o nggween paga yime nen kinigen kaamunggup nduk, kani omoonuk iya negen wuninogo pege, kani omoonuk enggela'me at oone ari kinaruk konenggwi, eerumunggup nduk, eereegerak kineenu nogo o.

Wayu 1:7

At ndugwi paga wage kenok, it aakumi o nggween paga menggaarak inanebunu lombok at wareegwaarak nogo mendek inom abok aret inalitak lombok nen inigen kogo logomenggaarik, leenggu maako logogun me, liippogo logonip o, yinuk, abet aret yokkiragi o. Amin.