Wundeegwaarak 12:16 - Ala Wone Peenok Peebi Mbanak

¹⁶ Ne iyaalok paga inom, ne 7 paga inom, nogo ti, kuwak eeppunuk, nalut eeriyak nduk, an nake leenogo patigin me, ne aa'nduk paga nen nok, 7 ti kuli paga ineyabu ambi eeriyak mondok mage o. Ata, inambi noorak mban pipuk eerogo pako logowak o.

Wundeegwaarak 12:16 Iomraidhean Croise

Wundeegwaarak 16:23

Yori wogo mbareegwa, at Muta nen it yorage, “At Aliku ALA nen ari logonet, O ko'lu ti, yabu eeka'lek yonggonggologo logonet, an mban nalut eeko logorak nduk, nake leenogo pateegirak me, yogondak mban inambi worakkoloorak inikilom mbakwi kenok worakkologwe, ndi, lakkoloorak inikilom mbakwi kenok lakkologwe, eeppunuk, nonggo logonet, eegu kenok ko'lu noorak ake teppatuwak, yegerak o,” yinuk, yoragagerak.

Wundeegwaarak 16:29

Naliku an ALA nen nogo 6 yinuk, ko'lu paga kit yonggonggologo logonet, nalut eeko logomunggup nduk, wokkiragagirak me, Ne 6 paga ti, mbi ne mbere noorak ake wo'nirage logogin o, yinuk, liippogo logonet, ko'lu ti paga kit ambit nen endekem wundi naga'lek kiname mban aret puk logomunggup o.”

Wundeegwaarak 16:5

Ndi, nogo 5 yinuk, ko'lu paga kuwak eerogo kiname pi woroorak nogo ti, ne mbere noorak ake mban kuwak eerogo pati woraamunggup o,” yinuk, yoreegerak.

Wundeegwaarak 20:10

ko'lu paga ti, Naliku an kinogoba Ala nake leenogo pateegirak me, kit inom, kinapuri kumi-aap inom, kinayeloman kumi-aap inom, kinaanggumi inom, aap nggiru ambi kiniya wogwe iinok inom, kit apit aret ne ti paga yi eekak ndi eekak eeko logorak mage o.

Wundeegwaarak 34:18

Tut aa'nduk Abip penenak paga o Metit nen wundi wogogutak me, Tut ti penenak, tanggal ndi paga laago oroti Piika'lek Mendek lako logomunggup o, yinuk, koonogo pereegirak nogo, kinale'nggen paga lako logonet, an yokkiragagirak nogo ndak-ndak ne iyaalok nen nok ne 7 paga oroti piiruwak nduk, ragi pega'lek kagak oroti worarogo nunggo logomunggup o.

Yetaya 1:13

It nen warogo wo'niri wogwe ti, inomaluk inoba lenggenak kagak wo'niri wogwe me, Aanom warogo eekwi ti, mbo puwak o. Kani kunggwi obari ti, ogole warak lombok kage agarik o. Tut ngget penengge paga lakwi, Ne 7 paga yonggonggologo logonet lakwi, It kuwak eeko logonet lakwi, Eekwi ti, Inomaluk wonage kagak eekwi me, pekkoorak meek lombok ee'nake,

Ala Unde 23:21

Ne ti eyom paga aret yabu eeka'lek, Ala alut eeruwok nduk, kuwak eeruwok o, yinuk, kuwak eeppunuk nalut eeko logowak o. Ti eeko logorak ti, it logowam time abok aret wonogo logonet, it inom, inapuri-inombowologwe nda'narit nogo logogun inom, mondok-mondok eeko logowak o.

Ala Unde 23:27

“Tut 7 penenak tanggal 10 paga ti, it aakumi inomaluk lek eerogo piinok, an ninom lambunggo logorak nogo abeko logorak aret me, tanggal ti ari wage kenok, an nalut eerumunggup nduk, kuwak eeppunuk, kinambe mage negen logonet, kinamendek ambi Naliku ALA nake kani kuniyak nduk, wo'niri wogo logomunggup o.

Ala Unde 23:35

laago ne iyaalok lakwi nen nugwa 7 kuli yi mendek ndi mendek Naliku ALA nake kani kuniyak nduk, pi wogo logowak o. Ne iyaalok paga inom, ti'nuk, nogo 7 yinuk, ko'lu irip paga inom, nogo ti, yabu eeka'lek yi mendek ndi mendek kani kuniyak nduk, Naliku ALA nake pi wogo logomenggaarik, kuwak eeppunuk, nalut eeko logowak o.

Linggineegwaarak 28:18

Lako logonet, ne iyaalok togon yabu nggwok eeka'lek kuwak eeppunuk, nalut eeko logowak o.

Linggineegwaarak 28:25

Nogo 6 yippunuk, ko'lu paga perak, yabu eeka'lek kuwak eeppunuk, nalut eeko logowak, yegerak, yoret o,” yinuk, yoreegerak.

Linggineegwaarak 28:26

Yoge nagagerik, ambi yoge logonet, “Tamban 7 eeppunuk, laago endage Anggen Iyaalok Mbanggwi paga lako logonet, gandum anggen iyaalok ambi mbanogo nake pi wogwe ne ti paga yabu nggwok eeka'lek kuwak eeppunuk nalut eeko logowak o.

Linggineegwaarak 29:1

Yoge nagagerik, ambi yoge logonet, “Tut 7 penenak tanggal 1 ari wage kenok, yabu nggwok eeka'lek kuwak eeppunuk, nalut eeko logowak o. Ne ti paga oone nggwok eeka trompet nogo oone pu eeko logowak o.

Linggineegwaarak 29:12

Ambi yoge logonet, “Tut 7 penenak tanggal 15 tut ti paga yabu nggwok eeka'lek kuwak eeppunuk, Naliku ALA nalut eeko logowak o. Eeko logonet, inale'nggen nen nelaago lakwi iigak, ne 7 ari nawak o.

Yaya 19:31

Laago Obaga Mbo Nagagerak lariyak pipuk eekwi iigak, ko'lu it Yakuri mendek tamban nggwok iniki liippunuk eeriyak nduk wonogogwaarak me, it Yakuri tamban eekwi paga ineebe eyo karo-karo aago paga logorak, “Nineebi o,” yinuk, inowak kalenogo ineebe wogoret nawak nduk, it aap Yakuri mendek nen Pilatut yori wogogwaarak.

Pelaareegerak 16:8

Nogo logomonggotik, ne 1 nen nok 6 paga ti, oroti piika ragi inom pega'lek logonet, worarak nunggo logomonggotik, ne ambi 7 paga ti, kit yabu eeka'lek kuwak eeppunuk, Aliku kinogoba Ala alut eeko logomunggup o,” yinuk, yoragagerak.