Nappiigak 1:8 - Ala Wone Peenok Peebi Mbanak

⁸ Kit nogo Aberiniki kinoba wambi wage logonet, at omaawi eeppinagage kenok, o Yerutalem inom, o Yureya abok inom, o Tamariya inom, yi awi ndi awi irip-irip time abok aret inom, an eerit nege kinigen neego nogogutak wone nogo yoranet nugu logomunggup o,” yinuk, yoragagerak.

Nappiigak 1:8 Iomraidhean Croise

Ndawi 22:27

Kaliku ALA yi o ndi o unde wonage, Yi aakumi ndi aakumi abok aret Wone lengganogo yorage, Eeke menggendak me, It aakumi o irip-irip menggaarak nogo Kaliku ALA koba abeppunuk, Melak togon kowagam wogwe, Yi aakumi ndi aakumi inanebunu lombok kat kabu'me tebe yi wa'nuk kayuk wukwi, Eeko logogun o.

Ndawi 98:3

At apuri Iterali iniki kunik aganabit nage, Yoragaatak liirogon eeppiinet wundi wage, Eeke nagagerak nogo abeke logonet, Ninogoba Ala eegin tiyak yegerak nogo Yi aakumi ndi aakumi o irip-irip wonogwe Abok aret inigen kagaarak o.

Yetaya 42:10

Kit aakumi nggween irip-irip wonogwe yi, wae. Ndawi ngget mendek Aliku ALA ake wakwi, At mban alut eekwi, Eeko logonip o. Kat niyo laut kinikime wonogwe kinom yi wae. At alut eekwi, Laut iniki me kit nggween ku'mbanak inom, it kit paga wonogwe inom, at alut eekwi, Eeko logonip o.

Yetaya 49:6

“At Yakup paga wiganak inanebunu aa'nduk ninom kunik wonogogwa kwak eerogo piige, It aakumi Iterali ando yumbunik nogo iniyokan wogoret piya wage, Eerenok nduk, Nayeloman eerogo pagage nagarik, unde eeppagagirak nogo ti, yabu mbuuluk kagak unde eeppagagirak me, Aakumi inagap ndarogo piyoorak wone koonogo piyareegirak nogo It aakumi inanebunu lombok o irip-irip wonogwe inenggela'me eya eerogo piige logonok nduk, unde eerogo pagagin o,” yinuk, yo'negerak o.

Yetaya 52:10

Aliku ALA nen yi aakumi ndi aakumi inenggaanom paga at eenggi abu omaawi alik leenak tiyappunuk wonage kenok, Aakumi o nggween irip-irip wonogwe abok aret ninogoba Ala ninagap ndari wage inigen kaagun o.

Yetaya 66:19

Eeppiinet naminggirak ineebe yumbunik inenggela'me ineenu agak ambi eerigin o. It aakumi inanebunu lombok o Taritit, Pun, Lut inom, o Metek, Iroti inom, Tuban, Yawan inom, nggween ku'mbanak o nda irip-irip time an eeke minggirak wone awo inaruk konengga'lek wonogwe, an tiyanak lombok minggirak nogo inigen kaga'lek wonogwe, eekwi nogo inom, it yumbunogo piyaminggirak nogo nappiyaminggirak aakumi inanebunu lombok inenggela'me time an tiyanak lombok logonet, iya tit eeppiige minggirak nogo yoranet nugu logogun o.

Yeremiya 16:19

Kaliku ALA wae. Kat komaawi eeppanega, Nobak wurik kwak wonaga, aaninggin noba age kenok, neebe op logokit nduk, kabu'me panega, kat aret o. Yi aakumi ndi aakumi kat kowagam ari wogwe, O nggween irip-irip me nen kat keya wogwe, Eeko logomenggaarik, Kat yokkogo logonet, “Ninombomini ti, abe mendek ambi porogo logolik o. Ata, inambokan lagangga abe eeppiyoorak lek aanom warogo kagak inagugiwak ti mban porogo wonogogwaarak o.

Mika 3:8

Togop kwe, an perak, it Yakup mendek Ala wone taganogo pit nugwi, It Iterali mendek maluk eerit nugwi, eekwi nogo Inaruk wake logokit nduk, Aliku ALA Aberiniki paga nomaawi lombok eerogo panege, A'me nggelok eeppiinet nage logonet, nagabiti lek yoranet nage logokit nduk, eeppanege, Eeke agaarik o.

Takariya 4:6

Yoge mbaki, at nen an yo'nege logonet, “At Aliku ALA nen at Terubaben yoriyak yo'negerak nogo yi aret. At alilaakwi paga, at omaawi paga, eerigin lek o. Ata, an Naberiniki paga eeppege neegak eerigin o, yinuk, at Omaawi Lombok Menggerak Aliku ALA nen aret yegerak, yoru o.

Matiyut 24:14

Ala abu'me piyoorak obeelom wone yi, aakumi anebunu lombok ineenu aruwak nduk, yi awi ndi awi abok aret abu paganogo yoranet nogwe kiinok perak, o age yobok aret arigin o,” yinuk, yoragagerak.

Matiyut 28:19

kit nen yi aakumi ndi aakumi inanebunu lombok an noone waganggo logowak nduk, eerogo piinet nogo logonet, nogoba Ala endage paga, aput an nendage paga, Aberiniki endage paga, yiime wuppiigwi,

Marakut 16:15

Mberirage nagagerik, yorage logonet, “Kit yi awi ndi awi o nggween paga yime abok aret nogo logomonggotik, it yi aakumi ndi aakumi wone obeelom wone yoranet nugu logonu o.

Lukat 1:35

Yoge mbareegi, malayikat nogo nen, “Aberiniki koba wambi wage kagak, at Tiyanak Lombok Menggerak omaawi nobakkabi wage mbaremenggi, kabila aret age logomenggendik, at mondok kikak nakeelik Ala ake leenak ndaremenggendak nogo, aakumi nen, Yi Ala aput aret, yogo logogun o.

Lukat 10:19

Waalo aakumi inooka inom, nggitamuru inom, kiniyok paga aan mbelenogo pugwi, at kinom wim mbanak nogo omaawi lek eerogo tebenogo pugwi, eeko logobagip nduk, an nawone kilikkiragarak. Nawone kilikkiragarak me, maluk ambi kinoba arigin mondok lek aret o.

Lukat 24:29

tebembunuk, yogo logonet, “Oonegen abu kilu yi nagaarak o kiip age me, ninom aret logowok o,” yogo mbareegwa, inom logowok nduk, iname aret unggwi nagagerak.

Yaya 15:27

Kit o aa'nduk nen ninom wonogogutak me, kit kunduk, an nabok paganogo yoranet nugu logomunggup o,” yinuk, yoragagerak.

Nappiigak 13:31

Mippege mbareegi, at inom Nggalileya nen Yerutalem nogogwaarak nogo eebe inigen kaawak nduk nigiige logonet, nogo ambik yereegerak. Ndi, it inigen kogogwaarak nogo nen yogondak nit aakumi Iterali mendek paganogo yo'nirenet nogo agaarik o.

Nappiigak 2:32

Yetut warogo pogotak ti, Ala nen eenik agago mippegerak nit abok ninigen kogoorak me, paganogo yokkirogo ogoorik o.

Nappiigak 22:15

Kenegen kage, ari karuk konengge, eeremenggendak nogo paganogo yi aakumi ndi aakumi abok yoranet nege logonok nduk, leenogo pagagerak o.

Nappiigak 3:15

Nineenik ee'ninake menggerak alom nogo at aret kagak wakotak kwe, Ala nen kanggo menggam nen eenik agago mippegerak nogo ninigen kogoorak me, paganogo yokkirogo ogoorik o.

Nappiigak 4:33

It nappiigak nogo nen, “Ninogoba Yetut eenik a'nuk mi'nagaarak o,” yinuk, inagabiti mbaka'lek inoone omaawi paga wone nogo paganogo yoranet nogo nogogwaarak. Yoranet nogwe iigak, Ala nen ale'nggen ambik inoba piige nagagerak.

Nappiigak 5:32

Ala nen yo'nirage nit liirogon eekwi niinok, Aberiniki wo'niragaarak nogo ninom logonet, eerit wage kogoorak nogo abok aret paganogo yokkirogo ogoorik o,” yinuk, yorogogwaarak.

Nappiigak 6:8

At Tepanut nogo Ala nen ale'nggen alik negen oba pege, omaawi ambik eeppege, eeke mbareegi, eerubok mendek eeke, ineenu ariyak inagabiti warak mendek eeke, eerit nage kagak kwe,

Nappiigak 8:1

At Tawulut kunduk Tepanut wakwi ti op aret mbareegerak. At wareegwaarak ti eyom paga, it Ala apuri o Yerutalem kuwak eerit nogo nogogwaarak nogo, inooruwok nduk, iya lombok ale-pale eeginabit nogo mbareegwa, o Yureya Tamariya enaagan-ambokan time kole ma'narit nogogwaarak kwe, it nappiigak nogo perak, mbaganulik aret puk ogogwaarak.

Oroma 10:18

Togop kwe, it abok obeelom wone awo konengga'lek aret wonogogwaarak kenok, yokkirage mbako ogotik? Lek o. “It inoone nogo o nggween paga yime abok aret wiganinuk, nage, Iname yoragaatak nogo, o irip-irip ndak wa'narit nage, Eereegerak o,” yinuk, liiru mbanak ti paga it abok koneneegwaarak aret kenok yokkiragi o.

Oroma 15:19

Aberiniki nen omaawi eeppanege kagak, inagabiti warak mendek eeke, eerubok mendek eeke, eerit nage nagagirak nogo, ti mban mbininogo yokkirage agarik o. Ti eerit nege logonet, o Yerutalem enaagan-ambokan time nen o Ilirikum kuli aret Keritut eeke nagagerak obeelom wone nogo abok aret yoranet nege nagagirak o.

Kolote 1:23

Keritut ti eereegerak nogo paga, Ala kinom lambumbinagareegerak me, wone obeelom wone kit konenggo nogogutik, abet mbako logonet, “Ala nen togop eeppinanigin kagi,” yinuk, kiniki lunik wonogwe nogo, mbo puurak mage o. Ata, o eyak wurabak kwak Keritut paga kiniki panggombunuk, wone abet mbareegutak nogo, kiniki nu'lek logonet, mugurok nogo logonip o. Ndi, obeelom wone yi awi ndi awi abok aret wiganinuk nage nogo ti, an Pawulut ninom aret yorage logokit nduk, Ala ayeloman agago paneegerak aret o.