2 Tamuwen 13:28 - Ala Wone Peenok Peebi Mbanak

²⁸ “E o,” yoge mbareegi, inom nogo nogogwaarik, at Abatalom nen ayeloman mini yorage logonet, “Wologwe wae! Kinaruk logonip o. At Amonon nogo anggur amburu nengge logomenggerik, iniki lek aremenggerak paga an nen, Warinip o, yokkirage neenok, At nen aret wariyak, yo'nirage me, waruwi o, yinuk, kinagabiti mbaka'lek kinogogumbuk eeppunuk, warumunggup o,” yinuk, yoragagerak.

2 Tamuwen 13:28 Iomraidhean Croise

Wakkagagerak 9:21

Yake nagagerik, ti'nuk, anggur amburu mburunogo nengge logonet, iniki abu lek a'nuk kumili kungge nagagerik, ayum yirik lek awooliyana wonagagerak.

2 Tamuwen 11:13

wonage me, ko'lu at Ndawut nen mbi imbirak nawok nduk, “Omok o,” yoge nagagerik, mbi inom, amburu inom, imbirak nonggo logonet, at Ndawut nogo nen Uriya kumili kunuwak nduk, anggur amburu wogoreegerak ambik aret nengge nagagerik, kumili kuneegerak kwe, oonikiya ame noolik. At ogoba ayeloman mini ame arum menggaarak inom nogo yereegim nogome nogo yi nagagerak.

2 Tamuwen 11:15

“Yowap wae. Aap Uriya ti, waremenggaarak kambuwak nduk, kat nen wonok wim eenggabit kumbunuk nambukwi iigak, aa'nduk eeppunuk, pi nage logomenggendik, kat kakom niru yi wundi wa'nuo,” yinuk, liiru mbanogo wogoreegerak wonok Yowap iri nagagerak.

2 Tamuwen 12:10

An, Meek, nombake logonet, aap Ket mendek endage Uriya akwe nogo, at aret waganggerak me, aakumi inawooluwak at apurilogwe-ombowologwe wiganak ineebe paga andokon age logogin areto, yinuk, yegerak me, yokkigio.

2 Tamuwen 13:27

Yoreegerak kwe, at Abatalom nogo oone nabenak mban yoge mbareegi, at Ndawut apuri nogwe me, Amonon nogo inom nawak nduk, “E o,” yoreegerak.

2 Tamuwen 14:6

Ndi, an kayeloman naagalogwe ti, aap mbere aret kwe, ne ambi paga imbirak yabume wuk eekkologwe me, aap ambi ogoorinaburak lek me, at ambi nen at ambi wakerak aret kanggerak o.

1 Endagembogut 20:16

o liingge it aap inoweewi o lombok unde inawuri nogo, inaa'nduk nogwe iigak, aap inoweewi inendagembogut 32 at Mben-Karat inom ogogwaarak nogo, inom inawooliyana niyo kumili aganaka mendek nonggo nogogwaarik, kumili negen kuneegwaarak wonogwe me, it Iterali wogwe iyo at Mben-Karat nen awuri nappiya wagagerak nogo, owagam nogo nogogwaarik, yogo logonet, “Aap o Tamariya nen wundi wogo agaarik o.”

Etet 1:10

Lakugak nogo 6 yippunuk, ko'lu ari wage mbareegi, aap endagembogut Akatiwerot nogo amburu toolak nengge nagagerik, iniki ale'nggen mbake logonet, at akwe kwe nggwok Wati nogo abu kigirikwe lombok me, aakumi abok inom, aap nagawan-nagawan inom, etenggen kigirikwe inigen kaawak nen aap endagembogut inakuwi nggare-nggare yiriko menggaarak at kwe Wati yirik kagak wonok woraawak nduk, aap at ake eeko menggaarak inooli wogo ineebe 7 Mekuman, Mbitata, Karobona, Mbigata, Abagata, Tetat, Karakat nogo yoragagerak.

Ndawi 104:15

Aakumi inale'nggen mbaruwak nduk, anggur amburu magarage, Inete teretak eeke logowak nduk tayitun amburu wogorage, Aakumi inomaawi logowak nduk, mbi magarage, Eeke menggerak o.

Wundeegwaarak 1:18

Togop eeko mbareegwa, aap endagembogut Metit mendek nogo nen kumi elege ndaganaka nogo wiiragagerak wogo mbareegwa, yorage logonet, “Elege aap nda'nogwe iinok, inooriyak yokkiragagirak kagak, kit nonggop nduk ineenik teppiigo ogotik?”

Wone Alom Kibingga 10:19

Laago lakwi ti, inale'nggen mbariyak ake, Anggur amburu ti, inale'nggen nen inoone ugun agan nugu logorak ake, Aret menggerak kwe, Wu ti perak, yi mendek ndi mendek eeriyak ake aret menggerak o.

Wone Alom Kibingga 9:7

Togop aret me, kit eekwi nogo Ala nen, “Op aret o,” yinuk, o yogondak aret kinombake me, kinale'nggen nen kinambi nunggwi, Kinale'nggen paga kinanggur amburu nunggwi, Eeko logonip o.

Ndaniyen 5:30

Ne oonikiya ti eyom aret aap Meriya mendek endage Ndariyut nogo, ndarak tahun 62 ari nagagerak kagak at Mbelitiyatat abu'me piige menggim tebenggola unggwage logonet, aakumi o Mbaben inowe endagembogut Mbelitiyatat nogo warogo pereegwaarak.

Nakum 1:10

Alok ndele aago menggi kwak, Niyo kumili kunggwi mendek nenok neyak-kweyak agan nogo mengga kwak, at inom wim mbanak ti, togop aret agan nogwe iigak, Wiiringga wiirik kani ne ambit pup eerogo nengge menggi kwak, it togop aret lek eerogo piyaagin o.

Lukat 21:34

Wone ambinom yorage logonet, “Ta'na pugu ne ambit paga pagi aan mbelek togon wake menggi kwak, Ne ti paga ndogop eekkinabigin o, yinuk, wone yokkiragarak nogo, kit aakumi o nggween paga abok aret ne ambit perak togon eekkinabi woraagin me, yi mendek ndi mendek kinaanoguma'le ndenok yogoorak nenet nugwi, amburu kumili eeginake mendek nenet nugwi, Namendek nonggop kolaakit o, yinuk, kiniki koonit nugwi, eeko logonet, kiniki ugun kobak arumonggotak wonogwe kiyo, kiniki tum wakkologo logonip o.

Nappiigak 5:29

Yorage mbareegi, at Peterut inom, it nappiigak ando nogo inom, nen wone onggo yorogo logonet, “Ninogobamini o. Aakumi nen yo'nirogwe ti, nit koneniyak lek o. Ala nen yo'nirage kenok mban koneniyak o.

Yotuwa 1:9

Kat kogogumbuk kiniki mondok nu'lek eeppatinuk logot o, yinuk, yokkigirak nogo lek a? Kat ambime nage keegak, Naliku kogoba Ala an nimbirak nagin me, kat kagabiti mbake, eerit nage logonet anggon eekkake, eeriyak ti mondok mage o,” yinuk, yoreegerak.

Owak Loongga 19:22

Nonggo nogogwaarik, iniki ale'nggen agagerak wonogwe me, aakumi inobaabut abu maluk kota time mendek wogo nogogwaarik, aap anggok nogo awi inaagan-ambokan wanggeppunuk, arungga'nggi nogo ineenggi omaawi paga panggonggagak eeko logonet, at o unde aap anggok nogo yogwi, “Aap keya wagaarak wonage ti, nit nen wuruwok nduk, wumbi mok o.”

Owak Loongga 19:6

Yorage mbareegi, inom kwi'na'nuk, mbi inom, niyo inom, nonggo logonet, kolaga ogoba nogo nen aap nogo yoge, “Ne yogondak mban kiniki ale'nggen paga ninom nogo yuwok o.”

Owak Loongga 19:9

Nonggo nogogwaarik, ayeloman nogo inom, ayeloman mendek akwe kolagagerak nogo inom, woraawok nduk, eeko mbareegwa, kwe ogoba arugelo nogo nen yorage logonet, “O abu yumaak arit nage yi, kaanip o. Logonuk lek aret o kiip arigin me, nogo yinuk, ko'lu kuuben kiname namunggup nduk, kiniki ale'nggen paga yime ninom nogo yuwok o.”

Urut 3:7

Nagagerak wonage kagak, at Mbowat nogo mbi inom, amburu inom, abu aret nengge nagagerik, ale'nggen eeke mbareegi, waabuk negen jelai anggen menenak logonogo pugume irip me time winnagagerak nogo yege me, kwe Urut nogo mbawok aret owagam nage nagagerik, yum Mbowat iyok paga lenggenak nogo pilaappege nagagerik, winnagagerak.

1 Tamuwen 18:22

Yoreegerak kwe, “E,” yaga'lek kenok, awuri inom yabu eeko menggaarak wone yori nawak nduk, nappiige logonet, “Kit Ndawut wonage me nogo logomonggotik, alik me yogo logonet, Kat kowe endagembogut Tawun inom, awuri inom yabu eekwi nit inom, kat eerit nage paga ninikilom kombakoorak me, kat ninaru ariyak op aret, yorumunggup o,” yinuk, wone eerogo nappiyareegerak.

1 Tamuwen 28:10

Yoge mbareegi, Tawun nen at yoge logonet, “Kat yi eeke paga, Aaninggin ambi noba arigin mondok lek, abet aret mbarenok nduk, at eenik menggerak Aliku ALA owak o,” yinuk, kumbuk mbaneegerak.

1 Tamuwen 28:13

Yoge mbareegi, at endagembogut Tawun nen kwe nogo yoge logonet, “Kagabiti mbarugun o. Kat kenegen ngge kage agandik?” Yoge mbareegi, kwe nogo nen, “Kugi ambi nggween enoona nen wundi wage kagi o.”